Join with Health.com.kh on Telegram

ការ​ចាស់​ទៅ​តាម​អាយុ និង​ការ​រាំងរដូវ អាច​ធ្វើ​អោយ​ចំណង់​ផ្លូវភេទ​របស់​ស្ត្រី​ផ្លាស់​ប្តូរ​បាន​គ្រប់ពេលវេលា​ទាំងអស់​។ ការ​ផ្លាស់​ប្តូរ​នេះ​មិនមែន​ដោយសារ​តែ​ជំងឺ​លើ​រាង​កាយ​ទេ ប៉ុន្តែ​មាន​កត្តា​ជា​ច្រើន​ផ្សេង​ៗ​ទៀត​ផង​ដែរ​ដូច​ជា ការ​មាន​ផ្ទៃពោះ​, ការ​បំបៅ​ដោះ​កូន​, ការ​រាំងរដូវ​, ស្ត្រេ​ស​, បាក់ទឹកចិត្ត និង​ការ​ផ្លាស់​ប្តូរ​របៀប​រស់នៅ​។

ការ​រាំងរដូវ
ក្នុង​ពេល​ដែល​មានការ​ផ្លាស់​ប្តូរ​បណ្តោះអាសន្ន​មួយ​ទៅ​កាន់​ដំណាក់កាល​រាំងរដូវ​ហើយ កម្រិត​អ័រម៉ូន​ភេទ​របស់​មនុស្ស​ស្រី (Estrogen) ត្រូវ​បាន​ថយ​ចុះ​។ ការ​ថយ​ចុះ​បែប​នេះ​ច្រើន​តែ​បណ្តាល​អោយ​មាន​បញ្ហា​ស្ងួត​ទ្វារមាស​ដែល​នឹង​ទៅ​ជា​គ្មាន​ផា​សុខភាព​ក្នុង​ពេល​រួម​ភេទ ឬ​ឈឺ​ក្នុង​ទ្វារមាស​។ កត្តា​ទាំងនេះ​នឹង​កាត់​បន្ថយ​ការ​ចង់​រួម​ភេទ​របស់​ស្ត្រី​តែ​ម្តង​។ ខណៈ​ពេល​ដែល​ស្ត្រី​ជា​ច្រើន​បន្ត​ទទួល​បាន​ជីវិត​ផ្លូវភេទ​ដ៏​សប្បាយ​រីករាយ​របស់​គេ​ទៀត​ក្នុង​ពេល និង​ក្រោយ​ពេល​រាំងរដូវ​ហើយ​នោះ ក៏​មាន​អ្នកខ្លះ​ទៀត​បែរជា​បាត់បង់​ចំណង់​ផ្លូវភេទ​ទៅ​វិញ​ដោយសារ​តែ​ការ​ផ្លាស់​ប្តូរ​អ័រម៉ូន​ដ៏​សំខាន់​។

ការ​មាន​ផ្ទៃពោះ និង​បំបៅ​ដោះ​កូន
រាង​កាយ​របស់​មនុស្ស​ស្រី​ម្នាក់​នឹង​ត្រូវ​ឆ្លងកាត់​ការ​ផ្លាស់​ប្តូរ​អ័រម៉ូន​ជា​ច្រើន​ក្នុង​ពេល​មាន​ផ្ទៃពោះ​ដែល​វា​ជា​ហេតុផល​មួយ​បង្ក​អោយទៅ​ជា​កង្វះ​ចំណង់​ផ្លូវភេទ​បាន​។ ការ​បំបៅ​ដោះ​កូន​គឺជា​បញ្ហា​មួយ​ផ្សេង​ទៀត​ដែល​ចំណង់​ផ្លូវភេទ​ត្រូវ​ផ្លាស់​ប្តូរ​ដែរ​។ ការ​មាន​ផ្ទៃពោះ និង​បំបៅ​ដោះ​កូន ក៏​មាន​ឥទ្ធិពល​ទៅ​លើ​ទស្សនៈ​របស់​ស្ត្រី​ចំពោះ​រាង​កាយ​នាង​ដែរ​។ ក្រៅពី​នេះ ការ​បន្ថែម​នូវ​ការ​ទទួលខុសត្រូវ​ចំពោះ​រឿង​រាវ​ក្រោយ​ពេល​សម្រាលកូន​រួច​ក៏​ប្រហែលជា​ដាក់​សម្ពាធ​ដល់​នាង​មិន​មាន​ចំណង់​ផ្លូវភេទ​គ្រប់គ្រាន់​ផង​ដែរ​។

បញ្ហា​ផ្លូវ​កាយ
ជំងឺ​, ការ​ផ្លាស់​ប្តូរ​រាង​កាយ និង​ការ​ប្រើប្រាស់​ថ្នាំ​ច្រើន​តែ​បណ្តាល​អោយ​ចំណង់​ផ្លូវភេទ​របស់​ស្ត្រី​ថយ​ចុះ​។ កត្តា​មួយ​ចំនួន​ដូច​ជា​៖

  • បញ្ហា​ផ្លូវភេទ​៖ ការ​ឈឺ​ទ្វារមាស​, ការ​ស្ងួត​ទ្វារមាស ឬ​មិន​អាច​ទទួល​បាន​ចំនុចកំពូល​ក្នុង​ពេល​រួម​ភេទ​បាន​ប្រហែលជា​រំខាន​ដល់​ចំណង់​ផ្លូវភេទ​របស់​គេ​ហើយ​។
  • បញ្ហា​សុខភាព​៖ មាន​ជំងឺ​ជា​ច្រើន​ដូច​ជា ជំងឺ​រលាក​សន្លាក់​, មហារីក​, ទឹកនោមផ្អែម​, សម្ពាធ​ឈាម​ឡើង​ខ្ពស់​, ជំងឺ​សរសៃឈាម​បេះដូង និង​ជំងឺសរសៃប្រសាទ​ប្រហែលជា​ប៉ះពាល់​ដល់​ចំណង់​ផ្លូវភេទ​របស់​ស្ត្រី​។
  • ការ​ប្រើ​ថ្នាំ​៖ ថ្នាំ​ដែល​មាន​វេជ្ជបញ្ជា​សម្រាប់​ព្យាបាល​បញ្ហា​ផ្លូវភេទ ឬ​បញ្ហា​សុខភាព​ផ្សេង​ៗ​អាច​ទៅ​បំផ្លាញ​ចំណង់​ផ្លូវភេទ​របស់​ស្ត្រី​ក្នុង​រឿង​រួម​ភេទ​បាន​។ ថ្នាំ​ប្រឆាំង​នឹង​ការ​បាក់ទឹកចិត្ត និង​ថ្នាំ​បំបាត់​ការ​ប្រកាច់​ក៏​ជាដើម​ហេតុ​ដ៏​អាក្រក់​របស់​ចំណង់​ផ្លូវភេទ​ថយ​ចុះ​ដែរ​។
  • ការ​វះកាត់​នៅ​ប្រដាប់​ភេទ​៖ ការ​វះកាត់​ក្នុង​តំបន់​ប្រដាប់​ភេទ និង​សុដន​នឹង​អាច​អោយ​អ្នកជំងឺ​មិន​ចង់​រួម​ភេទ​តែ​ម្តង​ក្រោយ​ពី​វះកាត់​រួច​ដោយសារ​តែ​ការ​ឈឺចាប់​។
  • អស់កម្លាំង​៖ ការ​ហត់នឿយ​គឺជា​បញ្ហា​របស់​រឿង​គ្រប់យ៉ាង​។ ដល់​ពេល​ដែល​ស្ត្រី​មក​ដល់​លើ​គ្រែ​ហើយ បូក​រួម​នឹង​ការ​អស់កម្លាំង​ទៀត ពេល​នោះ​អាច​ជា​ការ​ថយ​ចុះ​នៃ​ចំណង់​ផ្លូវភេទ​ហើយ​។

បញ្ហា​ទំនាក់ទំនង
ភាព​ស្និទ្ធស្នាល​ដោយ​ប្រើ​អារម្មណ៍​គឺជា​រឿង​មួយ​សំខាន់​សម្រាប់​ស្ត្រី​ជា​ច្រើន​ដើម្បី​ឈាន​ចូល​ទៅ​ក្នុង​រឿង​រួម​ភេទ​។ ការ​ដែល​មាន​បញ្ហា​លើ​ទំនាក់ទំនង​របស់​ពួក​គេ​ដូច​ជា ការ​មិន​ព្រមព្រៀង​គ្នា​ជាមួយ​ដៃគូ​, កង្វះ​ការ​ធ្វើ​ប្រាស្រ័យ​ទាក់ទង​គ្នា​ជាមួយ​ដៃគូ​, ការ​យល់​ច្រឡំ​, មិន​ដោះស្រាយ​បញ្ហា​, ការ​ភិត​ក្បត់​, ការ​សង្ស័យ​គ្នា​, ការ​ឈ្លោះ​គ្នា និង​ពុំ​សូវ​មាន​ជំនាញ​ខាង​ផ្លូវភេទ​សុទ្ធតែ​ដើរតួ​យ៉ាង​សំខាន់​ក្នុង​ការ​កាត់​បន្ថយ​ចំណង់​ផ្លូវភេទ​របស់​មនុស្ស​ស្រី​។

បញ្ហា​ចិត្តសាស្ត្រ
មូលហេតុ​ផ្លូវចិត្ត​មិនមែន​គ្រាន់តែ​ប៉ះពាល់​ទៅ​ដល់​អារម្មណ៍​សប្បាយ​រីករាយ​របស់​មនុស្ស​មួយ​មុខ​នោះ​ទេ តែ​វា​ក៏​មាន​ឥទ្ធិពល​ទៅ​លើ​ការ​សប្បាយ​រីករាយ​ខាង​រាង​កាយ​ផង​ដែរ ហើយ​អាច​បណ្តាល​អោយ​ចំណង់​ផ្លូវភេទ​ថយ​ចុះ​ទៀត​ផង​។ បញ្ហា​ចិត្តសាស្ត្រ​មួយ​ចំនួន​ដែល​មាន​ឥ​ទ្ធ​ពិល​ទៅ​លើ​ចំណង់​ផ្លូវភេទ​មនុស្ស​ស្រី​មាន​ដូច​ជា​៖

  • បញ្ហា​សុខភាព​ផ្លូវចិត្ត​ដូច​ជា ថប់​អារម្មណ៍ ឬ​បាក់ទឹកចិត្ត
  • ស្ត្រេ​ស​ដូច​ជា តានតឹង​ក្នុង​អារម្មណ៍​នៅ​កន្លែងធ្វើការ ឬ​រឿង​លុយកាក
  • រូបសម្បត្តិ​មិនសូវ​បាន
  • ខ្វះ​កាត់​ទុកចិត្ត​លើ​ខ្លួនឯង
  • ធ្លាប់​មាន​ប្រវត្តិ​គេ​ចាប់បង្ខំ​ខាង​ផ្លូវភេទ ឬ​រាង​កាយ​អ្វីមួយ​៕