Join with Health.com.kh on Telegram

តើ​ចង្កេះ​របស់​អ្នក តែងតែ​ឈឺ​គ្រប់ពេល​មែនដែរ​ទេ ? តើ​អ្នក​យល់​ថា វា​ពិតជា​ពិបាក​សម្រាប់​អ្នក ក្នុង​ការ​អង្គុយ​ក្នុង​មួយ​កន្លែង ក្នុង​រយៈពេល​យូរ​ដែរ​ឬទេ? តើ​អ្នកមាន​អារម្មណ៍​ថា ឈឺចាប់​ខ្លាំង នៅ​ត្រង់​ចង្កេះ​ទេ? ដូចនេះ អ្នក​នឹង​ឆ្លងកាត់​នូវ ភាព​ឈឺចាប់​ត្រង់​ចង្កេះ ដែល​ពេល​ខ្លះ វា​ធ្វើ​អោយ​អ្នក ស្ទើរតែ​មិន​អាច​ទ្រាំ​បាន ។ ចំណុច​ខាងក្រោម​នេះ គឺជា​មូលហេតុ​ទូទៅ ដែល​តែងតែ​អាច ធ្វើ​អោយ​ស្ត្រី​ឈឺចង្កេះ បាន ៖

១. បញ្ហា​ចុក​រោយ
មូលហេតុ​ជា​ទូទៅ​បំផុត ដែល​ធ្វើ​អោយ​ស្ត្រី​ឈឺចង្កេះ​នោះ​គឺ បញ្ហា​នៃ​ការ​ចុក​រោយ​។ មិន​ថា ប្រភេទ សកម្មភាព​ដែល​ត្រូវ​ទាញ​សន្ធឹង ឬ សម្ពាធ​ណាមួយ ដែល​មាននៅ​លើ សាច់ដុំ​, ស​សៃ​ពួរ និង ស​សៃ​ចំណង ដែល​ស្ថិត​នៅ​ខាងក្រោយ ខួរ​ឆ្នឹ​ង​ខ្នង អាច​ទទួល​រង​នូវ​ឥទ្ធិពល​មិនល្អ ចំពោះ​សុខុមាលភាព របស់​ចង្កេះ​អ្នក​។

២. ការ​រង​របួស
ការ​រង​របួស ចំពោះ​ឆ្អឹង ដោយសារ​តែ​គ្រោះថ្នាក់​, ការ​វះកាត់ ឬ ការ​ប៉ះទង្គិច គឺ​ក៏​អាច​ប៉ះពាល់​ដល់​ស្ថានភាព​ចង្កេះ​របស់​អ្នក បាន​ផង​ដែរ​។ កត្តា​ធម្មតា​មួយ​ចំនួន​ដូច​ជា ការ​លើក​របស់​អ្វីមួយ​ធ្ងន់ ក្នុង​ស្ថានភាព​មិន​ត្រឹមត្រូវ គឺ​អាច បណ្តាល​អោយ​មានការ​រង​របួស ឬ ក៏​ការ​បុក​ទង្គិច​នឹង​របស់​រឹង​អ្វីមួយ នោះ​វា​ក៏​អាច​នឹង ធ្វើ​អោយ​ចង្កេះ​អ្នក ឈឺចាប់​បាន​ផង​ដែរ​។

៣. ស្ថានភាព​ផ្នែក​វេជ្ជសាស្ត្រ
ស្ថានភាព​ផ្នែក​វេជ្ជសាស្ត្រ​មួយ​ចំនួន មាន​ដូច​ជាៈ​ជំងឺ​រលាក​សន្លាក់ និង ជំងឺ​ឈឺ​គន្លាក់​ឆ្អឹង គឺ​អាច​ធ្វើ​អោយ​អ្នក ឈឺចង្កេះ​បាន​។

៤. ដុំ​សាច់
ដុំ​សាច់​ដែល​មាន​ដុះ​ឡើង នៅ​ជិត តំបន់​ឆ្អឹង​អាង​ត្រគាក ឬ នៅ​ក្នុង​ឆ្អឹង នៃ​ខួរឆ្អឹងខ្នង​គឺ អាច​ធ្វើ​អោយ អ្នក​ឈឺចាប់​ចង្កេះ​បាន​។ ដុំ​សាច់​ប្រភេទ​មហារីក ក៏​អាច​រួមចំណែក​នៅ​ក្នុង​ការ​ឈឺចាប់​ចង្កេះ​នេះ​បាន​ផង ដែរ ។

៥. បញ្ហា​របស់​អូវែ
ដុំ​សាច់​ដែល​ដុះ​នៅ​លើ​អូវែ គឺជា​បញ្ហា ចំពោះ​សុខភាព និង សុខុមាលភាព​ជា​ទូទៅ​របស់​អ្នក ក៏​អាច ធ្វើ​អោយ​អ្នក ឈឺចាប់​ចង្កេះ​ជា​ខ្លាំង​បាន​ផង​ដែរ​។ នា​ពេល​ខ្លះ ដុំ​សាច់​ដែល​ដុះ​នៅ​លើ​អូវែ​នេះ គឺ​មិន​ត្រូវ បាន​គេ​ដឹង​នោះ​ទេ ដោយសារ​តែ​មាន​មនុស្ស​ស្រី​មួយ​ចំនួន មិន​បាន​យល់​ពី​ទំនាក់ទំនង រវាង ការ​ឈឺចាប់ ចង្កេះ និង ការ​ទៅ​អោយ​គ្រូពេទ្យ​ជំនាញ​ខាង​ផ្នែក​រោគ​ស្ត្រី​ធ្វើការ​ពិនិត្យ​។

៦. ការ​បង្ក​រោគ
ការ​បង្ក​រោគ​នៅ​ក្នុង​បំពង់​បង្ហូរ​នោម​, ប្លោក​នោម​, ជំងឺ​រលាក​ខ្នែងពោះវៀន និង បញ្ហា​នៃ​ការ​រលាក​ផ្សេង​ៗ ទៀត ក៏​អាច​បណ្តាល​អោយ​អ្នក ឈឺចាប់​ចង្កេះ​បាន​ផង​ដែរ​។ ប្រសិនបើ​អ្នក ធ្លាប់​បាន​ប្រឈម​នឹង ការ​បង្ក រោគ​ណាមួយ និង មានការ​ឈឺចាប់​ជា​ខ្លាំង នោះ​អ្នក​ត្រូវ​តែ​ប្រញាប់​ទៅ​ធ្វើការ ពិគ្រោះ​នឹង​គ្រូពេទ្យ អោយ​បាន​ឆាប់​ៗ តាម​ដែល​អាច​ធ្វើ​បាន​។

៧. ការ​មាន​ផ្ទៃពោះ
ការ​មាន​ផ្ទៃពោះ គឺជា​មូលហេតុ​ចំបង​មួយ ដែល​អាច​ធ្វើ​អោយ​ស្ត្រី​ឈឺចង្កេះ​បាន​។ ដោយសារ​តែ គភ៌ ចេះ​តែ​មានការ​រីក​ធំធាត់ នៅ​ខាងក្នុង​ស្បូន​របស់​ម្តាយ​,​ស្ត្រី​មានការ​កើន​ទម្ងន់ ហើយ​នាង​ក៏​ត្រូវ អត់ធន់ នឹង ការ​ទាញ​សន្ធឹង​នៃ​ស្បូន​ទៅ​មុខ ដោយ​ការ​ត្រូវ​ទម្រេត​ខ្លួន​ទៅ​ក្រោយ​។ ជា​លទ្ធផល វា​នឹង​មានការ ចុក​រោយ​ជា​ខ្លាំង កើត​មាននៅ​លើ​ចង្កេះ ដែល​នឹង​បង្ក​អោយ​មានការ​ឈឺចាប់​។

៨. បញ្ហា​តម្រងនោម
ជំងឺ​គ្រួ​ស ក្នុង​តម្រងនោម​, ការ​បង្ក​រោគ នៅ​ក្នុង​តម្រងនោម និង បញ្ហា​ដែល​ទាក់ទង​ផ្សេង​ៗ​ទៀត គឺ​ក៏ អាច​បណ្តាល​អោយ​មានការ ឈឺចាប់​ចង្កេះ​នេះ​ដែរ​។ ក្រៅពី​នេះ​ការ​ហូរ​ឈាម នៅ​ក្នុង​តម្រងនោម ក៏​អាច ជា​មូលហេតុ​មួយ នៅ​ខាងក្រោយ​បញ្ហា​នៃ​ការ​ឈឺចង្កេះ​នេះ​បាន​ផង​ដែរ​។

៩. ស្ថានភាព​រាង​កាយ
ការ​ដាក់​ស្ថានភាព និង ការ​ធ្វើ​ចលនា​រាង​កាយ មិន​បាន​ត្រឹមត្រូវ​ល្អ ក៏​អាច​បណ្តាល​អោយ​មាន ការ​ចុក​រោយ​ទៅ​លើ​សាច់ដុំ នៃ​ខួរ​ឆ្នឹ​ង​ខ្នង និង សន្លាក់​។ បញ្ហា​នេះ នឹង​រួមចំណែក​ធ្វើ​អោយ ចង្កេះ​អ្នក​ឈឺ ចាប់​បាន​ដែរ ។

១០.​ស្ត្រេ​ស
ស្ត្រេ​ស​, ជំងឺ​ធ្លាក់​ទឹកចិត្ត និង ការ​ថប់​បារម្ភ ក៏​អាច​រួមចំណែក ធ្វើ​អោយ​ចង្កេះ​អ្នក​ឈឺចាប់​បាន​ដែរ​។ បញ្ហា​ផ្នែក​ផ្លូវចិត្ត​ទាំងនេះ នឹង​អាច​ដោះស្រាយ​បាន​ដោយ ការ​ជួប​ពិគ្រោះ​នឹង អ្នក​ប្រឹក្សា​យោបល់ ។

បញ្ហា​ចុក​រោយ​ចង្កេះ គឺ​ហាក់ដូចជា រោគ​សញ្ញា​សាមញ្ញ​ធម្មតា មួយ ប៉ុន្តែ​វា​អាច​នឹង​មាន​សភាព ឈឺ ចាប់​ជា​ខ្លាំង ក្នុង​រយៈពេល​ជា​ច្រើន​ថ្ងៃ ហើយ​វា​ក៏​អាច​នឹង​បង្ក​អោយ​មាន​បញ្ហា​សុខភាព​ចំបង​ៗ ផ្សេង​ទៀត បាន​ផង​ដែរ ។​វា​ក៏​អាច ជះ​ឥទ្ធិពល ទៅ​លើ​ទម្លាប់​នៃ​ការ​រស់នៅ​ប្រចាំ​ថ្ងៃ និង សុខុមាលភាព​ជា​ទូទៅ របស់​អ្នក​បាន​ដែរ​។ ដូច្នេះ វា​ពិតជា​ចាំបាច់ ក្នុង​ការ​យកចិត្តទុកដាក់ ចំពោះ​បញ្ហា​នៃ​ការ​ឈឺចាប់​ចង្កេះ អោយ​បាន​ឆាប់ នៅ​ពេល​ដែល​អ្នក​សម្គាល់​បាន​វា ៕