Join with Health.com.kh on Telegram

ចង់បានស្បែកមុខស្រស់ស្អាតភ្លឺថ្លាដោយប្រើគ្រាប់ថ្នាំវីតាមីន E មិនពិបាកឡើយ។ ត្រូវធ្វើបែបណាខ្លះ? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងគន្លឹះប្រើគ្រាប់ថ្នាំវីតាមីន E ថែសម្រស់ ៖

១. សម្រាប់ជួយឱ្យស្បែកមុខភ្លឺស្រស់ថ្លា

អ្វីដែលអ្នកត្រូវធ្វើ គឺគ្រាន់តែច្របាច់យកប្រេងវីតាមីន E ២គ្រាប់លាយជាមួយយ៉ាអួរសុទ្ធធម្មជាតិ ២ស្លាបព្រាបាយ និងបន្ថែមទឹកក្រូចឆ្មារស្រស់ពី ២ ទៅ ៣ ដំណក់ចូល។ កូរឱ្យសព្វ សឹមលាបម៉ាស្សាល្បាយលើស្បែកមុខ និងរងចាំសម្រាប់រយៈពេល ១៥នាទី។ លាងសម្អាតចេញជាមួយទឹកធម្មតា និងអនុវត្តឱ្យបាន ២ដងក្នុងមួយសប្តាហ៍។ ប្រសិនបើអ្នកមានស្បែកឆាប់ប្រតិកម្មមិនគួរប្រើប្រាស់រូបមន្តនេះឡើយ ខណៈដែលក្រូចឆ្មារអាចធ្វើឱ្យស្បែកមុខប្រែជាក្រហមនិងរលាក។

២. កាត់បន្ថយស្នាមមុន

អ្វីដែលអ្នកត្រូវធ្វើ គឺគ្រាន់តែលាយម៉ាស្សាប្រេងវីតាមីន E ដោយផ្ទាល់លើស្បែកមុខដែលមានបញ្ហាស្នាមមុន ​និងទុកចោលសម្រាប់រយៈពេលពេញមួយយប់។ អនុវត្តបែបនេះជាប្រចាំរហូតដល់ទទួលបានលទ្ធផលគាប់ចិត្ត។

៣. បំបាត់ស្នាមខ្មៅជុំវិញភ្នែក

អ្វីដែលអ្នកត្រូវធ្វើ គឺគ្រាន់តែលាបប្រេងវីតាមីន E ដោយផ្ទាល់ជុំវិញតំបន់ភ្នែកដែលមានបញ្ហា។ ម៉ាស្សាវាថ្នមៗ និងទុកចោលសម្រាប់រយៈពេលពេញមួយយប់។ អនុវត្តជាប្រចាំយ៉ាងហោចណាស់សម្រាប់រយៈពេលពី ២ ទៅ ៣សប្តាហ៍ អ្នកនឹងសម្គាល់ឃើញលទ្ធផលដ៏ប្រសើរ។

៤. ជួយឱ្យស្បែកភ្លឺរលោង

អ្វីដែលអ្នកត្រូវធ្វើ គឺគ្រាន់តែលាយប្រេងវីតាមីន E ពី ៣ ទៅ ៤គ្រាប់ជាមួយល្ហុងទុំដែលកិនម៉ដ្ឋ ២ស្លាបព្រាបាយ និងទឹកឃ្មុំធម្មជាតិ ១ស្លាបព្រាកាហ្វេ។ កូរឱ្យសព្វចូលគ្នា រួចសឹមលាបម៉ាស្សាលើស្បែកមុខ និងក។ រងចាំសម្រាប់រយៈពេលពី ២០ ទៅ ២៥ នាទី សឹមលាងសម្អាតចេញ និងអនុវត្តឱ្យបាន ៣ដងក្នុងមួយសប្តាហ៍។

៥. សម្រាប់ព្យាបាលស្បែកស្ងួត

លាយប្រេងវីតាមីន E ២ គ្រាប់ជាមួយជាមួយទឹកឃ្មុំធម្មជាតិ ១ស្លាបព្រាកាហ្វេ និងទឹកដោះគោឆៅ ឬទឹកដោះគោស្រស់ ២ស្លាបព្រាបាយ។ កូរឱ្យសព្វ សឹមលាបម៉ាស្សាល្បាយលើស្បែកមុខ។ រងចាំសម្រាប់រយៈពេល ២០នាទី សឹមលាងសម្អាតចេញ និងអនុវត្តឱ្យបាន ៣ដងក្នុងមួយសប្តាហ៍។

៦. សម្រាប់បំបាត់ស្នាមអ៊ុចខ្មៅ

អ្វីដែលអ្នកត្រូវធ្វើ គឺគ្រាន់តែលាយប្រេងវីតាមីន E ២គ្រាប់ជាមួយជែលប្រទាលកន្ទុយក្រពើស្រស់ ១ស្លាបព្រាបាយឱ្យសព្វចូលគ្នា។ លាបម៉ាស្សាល្បាយលើស្បែក និងរងចាំសម្រាប់រយៈពេលពី​ ១៥ ទៅ ២០នាទី សឹមលាងសម្អាតចេញជាការស្រេច។

៧. ជួយឱ្យស្បែកមុខក្មេងជាងវ័យ

អ្វីដែលអ្នកត្រូវធ្វើ គឺគ្រាន់តែលាយយ៉ាអួរ ២ ស្លាបព្រាបាយជាមួយទឹកឃ្មុំ ១ ស្លាបព្រាកាហ្វេ ទឹកក្រូចឆ្មារស្រស់ ១ ស្លាបព្រាកាហ្វេ និងរមៀត ១ ស្លាបព្រាកាហ្វេ ឱ្យសព្វចូលគ្នា។ រួចច្របាច់ ឬកាត់ថ្នាំគ្រាប់វីតាមីន E ចំនួន ១គ្រាប់ចូល។ កូរល្បាយឱ្យសព្វម្ដងទៀតសឹមលាបម៉ាស្សាលើស្បែកមុខ។ រងចាំសម្រាប់រយៈពេលពី ១០ ទៅ ១៥ នាទីសិន សឹមលាងសម្អាតចេញជាមួយទឹកធម្មតា។ អនុវត្តឱ្យបានយ៉ាងហោចណាស់ ៣ ដងក្នុងមួយសប្តាហ៍។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕