Join with Health.com.kh on Telegram

ចង់បំបាត់អាការៈអស់កម្លាំងកំឡុងពេលមានផ្ទៃពោះមិនពិបាកឡើយ! គួរធ្វើបែបណាទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗប្រឆាំងបញ្ហានេះ ៖

១. រក្សាជាតិទឹកឱ្យបានគ្រប់គ្រាន់ក្នុងរាងកាយ

ស្ត្រីមានទំនោរនឹងនោមញឹកខ្លាំងកំឡុងពេលមានផ្ទៃពោះ។ ជាលទ្ធផលអាចនាំឱ្យបញ្ហាខ្សោះជាតិទឹកក្នុងរាងកាយកើតមានឡើង។ មួយក្នុងចំណោមអាការៈទូទៅបំផុតនៃកង្វះជាតិទឹកក្នុងរាងកាយនោះ គឺភាពខ្សោយអស់កម្លាំង, ពិបាកផ្ដោត ឬប្រមូលផ្ដុំអារម្មណ៍ និងវិលមុខ។ ដូច្នេះដើម្បីជាការប្រសើរ និងអាចស្ថេរភាពនៃកម្រិតថាមពលរាងកាយបាន ចូរព្យាយាមធ្វើយ៉ាងណាទទួលទានទឹកឱ្យបានច្រើនគ្រប់គ្រាន់ជាប្រចាំ។ អ្នកក៏អាចបន្ថែមគ្រឿងផ្សំមួយចំនួនក្នុងទឹកដើម្បីបង្កើនរសជាតិនិងផ្ដល់ភាពស្រស់ថ្លាដូចជាត្រសក់, ក្រូចឆ្មារ និងផ្លែឈើផ្សេងទៀតជាដើមតាមចំណូលចិត្ត។

២. សម្រាក

បុគ្គលមួយចំនួននៅតែមិនអាចគេងលក់សូម្បីតែនៅពេលពួកគេមានអារម្មណ៍អស់កម្លាំង។ អ្នកមិនចាំបាច់ត្រូវតែគេងទើបអាចស្ដារថាមពលបានមកវិញឡើយ គ្រាន់តែការសម្រាកមួយភ្លែតក៏អាចជួយបានដែរ។ អ្នកក៏អាចនឹងសម្គាល់ឃើញនូវភាពប្រែប្រួលនូវកម្រិតនៃថាមពលភ្លាមនៅពេលអង្គុយចុះ, ដកដង្ហើម, ក្រេបភេសជ្ជៈបន្តិច, សម្រាក និងសម្រួលអារម្មណ៍ឱ្យធូរស្រាល។ នេះក៏ព្រោះតែស្ត្រេស ឬភាពតានតឹងក្នុងអារម្មណ៍ក៏ជាកត្តាមួយអាចបណ្ដាលឱ្យអ្នកអស់កម្លាំង ឬធ្វើឱ្យបញ្ហានេះកាន់តែធ្ងន់ធ្ងរឡើងផងដែរ។ អ្នកអាចធ្វើការហាត់ប្រាណ, ទទួលការម៉ាស្សា, ទៅមើលកុន ឬហាត់យូហ្កាដែលសាកសមសម្រាប់ស្ត្រីមានផ្ទៃពោះដើម្បីបន្ថយកម្រិតនៃភាពស្ត្រេស។

៣. គេងមួយភ្លែត

ការគេងសម្រាកមួយភ្លែត គឺជាវិធីដ៏ប្រសើរសម្រាប់ផ្ដល់ភាពស្រស់ស្រាយ និងថាមពលកំឡុងពេលមានផ្ទៃពោះ។ ការគេងសម្រាកសម្រាប់រយៈពេលប្រហែល ២០នាទី គឺគ្រប់គ្រាន់ហើយដើម្បីស្ដារថាមពលអ្នកមកវិញ។ ទោះជាយ៉ាងណាប្រសិនបើអ្នកចង់សម្រាកឱ្យបានច្រើនគ្រប់គ្រាន់មែនទែននោះ ចូរជ្រើសរើសការគេងសម្រាករយៈពេល ២ម៉ោង។ រយៈពេលខ្លី ឬវែងពេកសុទ្ធតែអាចធ្វើឱ្យអ្នកទទួលបានផលមិនល្អមកវិញ។ ចូរចាំថាអ្នកមិនត្រឹមតែទទួលទានអ្វីសម្រាប់ទ្រទ្រង់ជីវិត ២រូបប៉ុណ្ណោះទេ ប៉ុន្តែក៏ត្រូវការគេងឱ្យគ្រប់សម្រាប់ជីវិត ២ដែរ។

៤. គេងឱ្យបានគ្រប់គ្រាន់ក្នុងមួយយប់ៗ

កំឡុងពេលមានផ្ទៃពោះ អ្នករាងពិបាកនឹងគេងបានស្រួលនៅទីតាំងតែមួយសម្រាប់រយៈពេលយូរ និងថែមទាំងមិនស្រួលនៅពេលចង់ប្រែខ្លួនទៅម្ខាងទៀត។ ជាពិសេសតែងមានអារម្មណ៍ចង់ក្រោកទៅនោម! បញ្ហាទាំងនេះអាចជះឥទ្ធិពលលើគុណភាពនៃការគេងរបស់អ្នក។ ដូច្នេះចូរព្យាយាមធ្វើអ្វីដែលអាចធ្វើឱ្យការគេងរបស់អ្នកភាពប្រសើរឡើង ដូច្នេះទិញខ្នើយពិសេសដែលអាចជួយទ្រខ្នងនិងក្បាលពោះ។ កាត់បន្ថយការទទួលទានទឹកមុនពេលចូលគេង និងជ្រើសរើសគេងលើគ្រែពូកដែលអាចផ្ដល់ផាសុកភាព។

៥. កាត់បន្ថយការញ៊ាំស្ករ

បុគ្គលមួយចំនួនជ្រើសរើសទទួលទានស្ករដើម្បីបង្កើនថាមពលរបស់ពួកគេ ប៉ុន្តែវាអាចផ្ដល់ឱ្យត្រឹមរយៈពេលខ្លីប៉ុណ្ណោះ! ក្រោយពេលកម្រិតនៃជាតិស្ករក្នុងឈាមធ្លាក់ចុះ នោះអ្នកនឹងមានអារម្មណ៍កាន់តែអស់កម្លាំង។ ប្រសិនបើអ្នកចង់បង្កើនកម្រិតថាមពលរាងកាយប្រឆាំងនឹងភាពអស់កម្លាំង ចូរព្យាយាមទទួលទានបន្លែ ផ្លែឈើ ទឹកដោះគោជូរ និងប្រូតេអ៊ីនគ្មានខ្លាញ់។ នេះគឺជាវិធីដ៏ល្អមួយក្នុងការបង្កើនកម្រិតថាមពល កាត់បន្ថយភាពអស់កម្លាំងនៃការមានផ្ទៃពោះ។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕