រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានប្រកាសថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបឆ្នាំនេះ ត្រូវតែមានការរៀបចំប្រឡងជាដាច់ខាត ។
សម្ដេចតេជោ ថ្លែងក្នុងពិធីប្រកាសបិទយុទ្ធនាការចាក់វ៉ាក់សាំងបង្ការជំងឺកូវីដ-១៩ ជុំទី១ សម្រាប់ក្រុមអាយុចាប់ពី ៦ឆ្នាំឡើង ក្នុងក្របខ័ណ្ឌទូទាំងប្រទេស និងប្រកាសបើកយុទ្ធនាការចាក់វ៉ាក់សាំងបង្ការជំងឺកូវីដ-១៩ ជូនកុមារអាយុ ៥ឆ្នាំ នាថ្ងៃទី០១ ខែវិច្ឆិកា ឆ្នាំ២០២១ នៅវិមានសន្តិភាព ។
សម្តេចតេជោ បានថ្លែងបញ្ជាក់ថា ពេលនេះ មានករណីសុំជាប់ដោយស្វ័យប្រវត្តិ ដោយសារខ្លួនបានរៀនតិចតួចត្រូវតែប្រឡង បើមិនចេះត្រូវប្រឹងរៀន ហើយខំរៀនឱ្យចេះដើម្បីទៅប្រឡង ហើយបើប្រឡងមិនជាប់ឆ្នាំនេះទេ ឆ្នាំក្រោយប្រឡងទៀត ។ សម្ដេចតេជោ បានសង្កត់ធ្ងន់ថា «បើគិតតែមកស្នើសុំសម្តេចតា សម្តេចពុក ជួយឱ្យជាប់ដោយស្វ័យប្រវត្តិអីចឹង តើវិស័យអប់រំទៅជាយ៉ាងម៉េច។ ឥឡូវនេះប្រឹងបើកសាលារៀនហើយ»។
លើសពីនេះទៅទៀត សម្តេចតេជោបានលើកឡើងថា បើសិនជាអាចពន្យារពេលបន្តិច មុននឹងប្រឡង តែអាស្រ័យលើរដ្ឋមន្ត្រីក្រសួងអប់រំ យុវជន និងកីឡាទេ ប៉ុន្តែយោបល់ខ្ញុំ ពន្លឿនការៀនដោយផ្ទាល់ឱ្យបានច្រើនដើម្បីឈានទៅរកការប្រឡង ។
សម្តេចតេជោ ក៏បានថ្លែងបន្ថែមថា «មិនអាចទេឆ្នាំណាក៏ទារជាប់ដោយស្វ័យប្រវត្តិ ដែលក្លាយជាទម្លាប់មួយ ហើយឆ្នាំទៅករណីកូនសិស្សបានរៀនស្ទើរតែពេញកម្មវិធីសិក្សារបស់គេតែចាត់តាំងការប្រឡងមិនបាន យើងក៏ពិភាក្សាគ្នាឱ្យជាប់ទាំងអស់ទៅគ្មាននិន្ទេស»។
សម្តេចតេជោនាយករដ្ឋមន្ដ្រីបានបន្ថែមទៀតថា ឆ្នាំនេះសិស្សរៀនបានតិច បើឱ្យជាប់ដោយស្វ័យប្រវត្តិតើទៅប្រឡងនៅមហាវិទ្យាល័យយ៉ាងម៉េច បើមុខវិជ្ជាថ្នាក់ទី១២ ជាថ្នាក់ចុងក្រោយមិនចេះផង តើទៅប្រឡងចូលមហាវិទ្យាយ៉ាងម៉េច៕