រាជធានីភ្នំពេញ ៖ ក្រសួងអប់រំ យុវជន និងកីឡាបានប្រកាសច្រានចោលទាំងស្រុង ចំពោះលិខិតក្លែងក្លាយដែលសម្រេចឲ្យសិស្សប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) និងសញ្ញាបត្រមធ្យមសិក្សាបឋមភូមិ (ឌីប្លូម) កំណត់ឲ្យជាប់ជាស្ថាពរដោយមិនកំណត់និទ្ទេស ។
បើយោងតាមលិខិតក្រសួងអប់រំ យុវជន និងកីឡា នៅថ្ងៃទី២៧ ខែតុលា ឆ្នាំ២០២១ បានប្រកាសឲ្យដឹងថា លិខិតដែលចេញផ្សាយថា ការប្រឡងសញ្ញាបត្របឋមភូមិ (ឌីប្លូម) និងសញ្ញាបត្រទុតិយភូមិ (បាក់ឌុប) សម្រាប់ឆ្នាំ២០២១-២០២២ ជាប់ជាស្ថាពរ ជាលិខិតក្លែងក្លាយ ។
គួររំលឹកថា ក្រសួងអប់រំ យុវជន និងកីឡា បានកំណត់កាលបរិច្ឆេទប្រឡងសញ្ញាបត្រមធ្យមសិក្សាបឋមភូមិ (ឌីប្លូម) នៅថ្ងៃទី១៥ ខែវិច្ឆិកា ឆ្នាំ២០២១ ដោយប្រកាសលទ្ធផលនៅថ្ងៃទី២២ ខែវិច្ឆិកា ឆ្នាំ២០២១ និងប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី០៦ ខែធ្នូ ឆ្នាំ២០២១ ដោយប្រកាសលទ្ធផលនៅថ្ងៃទី២៨-២៩ ខែធ្នូ ឆ្នាំ២០២១ ៕