ប្រយ័ត្នគ្រោះថ្នាក់សុខភាព! បើញ៊ាំអាហារសម្បូរខ្លាញ់មិនល្អច្រើនរួច មិនធ្វើ ៥ចំនុចនេះឱ្យបាន

ភាគច្រើននៃពួកយើងចៀសមិនផុតទេពីការញ៊ាំអាហារចៀនបំពងដែលសម្បូរខ្លាញ់មិនល្អរួមបញ្ចូលទាំងភីហ្សា បឺហ្គឺរ ដំឡូងបំពង និងអាហារផ្អែមជាដើម។ អាហារទាំងនេះមានផ្ទុកសម្បូរទៅដោយជាតិខ្លាញ់មិនល្អប្រភេទ trans fats និង saturated fats ដែលមិនត្រឹមតែធ្វើឱ្យកើនទម្ងន់ប៉ុណ្ណោះទេ ប៉ុន្តែក៏បង្កើនហានិភ័យនៃបញ្ហាកូឡេស្តេរ៉ូលឡើង, សម្ពាធឈាម, ជំងឺទឹកនោមផ្អែមប្រភេទទី ២ និងជំងឺបេះដូងផងដែរ។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះដែលអ្នកចាំបាច់គួរធ្វើក្រោយទទួលទានអាហារសម្បូរខ្លាញ់មិនល្អច្រើន ៖

១. ទទួលទានទឹកក្ដៅឧណ្ហៗ

ការទទួលទានទឹកក្ដៅឧណ្ហៗក្រោយញ៊ាំអាហារសម្បូរខ្លាញ់មិនល្អជួយសម្រួលនិងផ្ដល់ភាពសកម្មដល់ប្រព័ន្ធរំលាយអាហារ។ ទឹកដើរតួនាទីដឹកនាំសារធាតុចិញ្ចឹមនិងកាកសំណល់។ ការទទួលទានទឹកក្ដៅឧណ្ហៗក៏ជួយបំបែកសារធាតុចិញ្ចឹមគួរឱ្យកត់សម្គាល់ផងដែរ។ ប្រសិនបើអ្នកទទួលទានទឹកមិនបានគ្រប់គ្រាន់ទេនោះ ពោះវៀនតូចនឹងស្រូបយកជាតិទឹកពីអាហារសម្រាប់ការរំលាយអាហារបង្កជាបញ្ហាខ្សោះជាតិទឹកក្នុងរាងកាយ និងទល់លាមក។

២. ទទួលទានភេសជ្ជៈបន្សាបជាតិពុល

ភេសជ្ជៈបន្សាបជាតិពុលជួយកម្ចាត់ជាតិពុលដែលប្រមូលផ្ដុំក្នុងប្រព័ន្ធរាងកាយក្រោយពេលអ្នកញ៊ាំអាហារសម្បូរខ្លាញ់មិនល្អ។ ដូច្នេះដើម្បីជាការប្រសើរអ្នកអាចជ្រើសរើសរួមបញ្ចូលភេសជ្ជៈបន្សាបជាតិពុលផ្សេងៗដូចជាភេសជ្ជៈទឹកក្រូចឆ្មារក៏បានក្នុងរបបអាហារប្រចាំថ្ងៃ ដើម្បីកាត់បន្ថយជាតិខ្លាញ់រាងកាយ ព្រមទាំងធ្វើឱ្យភាពធន់នឹងអាំងស៊ុយលីនមានលក្ខណៈប្រសើរឡើង។

៣. កុំខ្ជិលនឹងដើរ

ការដើរត្រឹមតែ ៣០នាទីកក្រោយពេលញ៊ាំអាហារច្រើនអាចជួយសម្រួលដល់ការរំលាយអាហារគួរឱ្យកត់សម្គាល់។ វាក៏ធ្វើឱ្យចលនាក្រពះកាន់តែមានលក្ខណៈប្រសើរឡើងល្អសម្រាប់ការរំលាយអាហារ និងការស្រកទម្ងន់ដែលលើស។ អ្នកគ្រាន់តែដើរលេងៗសម្រាប់រយៈពេល ៣០នាទី ក្រោយញ៊ាំអាហារសម្បូរខ្លាញ់មិនល្អជាការស្រេច។

៤. ញ៊ាំអាហារសម្បូរប្រូបាយអូទិក

រួមមានយ៉ាអួរជាដើម គឺជាប្រភពដ៏ប្រសើរនៃប្រូបាយអូិកដែលជួយរក្សាតុល្យភាពប្រព័ន្ធរំលាយអាហារធ្វើឱ្យបាក់តេរីល្អក្នុងពោះវៀនមានភាពប្រសើរឡើង និងពង្រឹងប្រព័ន្ធភាពស៊ាំរាងកាយ។ អ្នកអាចទទួលទានយ៉ាអួរ ១ពែងជាប្រចាំដើម្បីពង្រឹងសុខភាពពោះវៀនក្រោយញ៊ាំអាហារសម្បូរខ្លាញ់មិនល្អ។

៥. បង្កើនការទទួលទានបន្លែផ្លែឈើ

ការទទួលទានបន្លែផ្លែឈើជួយផ្ដល់ឱ្យរាងកាយនូវវីតាមីន, ជាតិរ៉ែ និងជាតិសសៃដើម្បីរក្សាភាពរឹងមាំដំណើរការមុខងារបានត្រឹមត្រូវ។ ការទទួលទានអាហារសម្បូរខ្លាញ់មិនល្អដែលគ្មានផ្ទុកនូវជាតិសសៃ​ និងសារធាតុចិញ្ចឹមចាំបាច់អាចបង្កើនហានិភ័យនៃបញ្ហាទល់លាមក។ ដើម្បីជាការប្រសើរ ចូរព្យាយាមរួមបញ្ចូលបន្លែផ្លែឈើក្នុងរបបអាហារប្រចាំថ្ងៃ។ ការទទួលទានផ្លែឈើមួយចានគោមជាមួយគ្រាប់ធញ្ញជាតិនិងគ្រាប់ពូជខ្លះ ក៏ល្អសម្រាប់អាហារសម្រន់ពេលព្រឹក។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕