Join with Health.com.kh on Telegram

ដុំពកក្លៀក គឺជាការហើម ឬឡើងដុំពកក្រោមស្បែកក្លៀក។ វាបណ្ដាលមកពីការហើមក្រពេញទឹករង៉ៃ ឬកូនកណ្ដុរ ហើយអាចនាំឱ្យមានការឈឺចាប់ផងដែរ។ ក្នុងករណីខ្លះ ដុំពកអាចបាត់ទៅវិញដោយឯកឯងក្នុងរយៈពេលពី ២ ទៅ ៣ថ្ងៃ ខណៈដែលមួយចំនួនទៀតកើនទំហំ និងបង្កភាពឈឺចាប់។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗជួយបំបាត់បញ្ហានេះ (ទោះជាយ៉ាងណាប្រសិនបើដុំពកមិនព្រមបាត់ទៅវិញ ឬប្រែជាធំឡើងៗ ចូរកុំស្ទាក់ស្ទើនឹងជួបទទួលការពិនិត្យពីសំណាក់គ្រូពេទ្យជំនាញ) ៖

១. ខ្ទឹមស

អ្វីដែលអ្នកត្រូវធ្វើ គឺគ្រាន់តែបុក ឬចិញ្ច្រាំខ្ទឹមសពី ២ ទៅ ៣កំពឹសឱ្យម៉ដ្ឋល្អ។ បន្ទាប់មកសឹមញ៊ាំវាជាមួយទឹកក្ដៅឧណ្ហៗ ១កែវនៅពេលព្រឹកមុនញ៊ាំអ្វីផ្សេង។ អ្នកក៏អាចរួមបញ្ចូលខ្ទឹមសក្នុងរបបអាហារប្រចាំថ្ងៃផងដែរ។

២. ទឹកក្ដៅឧណ្ហៗ

អ្វីដែលអ្នកត្រូវធ្វើ គឺគ្រាន់តែប្រើប្រាស់កូនកន្សែង ឬក្រណាត់ស្អាតមួយជ្រលក់ក្នុងទឹកក្ដៅ រួចពូតទឹកចេញសិន សឹមដាក់ស្អំលើក្លៀកដែលមានបញ្ហាសម្រាប់រយៈពេលពី ១០ ទៅ ១៥នាទី។ អនុវត្តសារឡើងវិញឱ្យបានពី ២ ទៅ ៣ដងក្នុងមួយថ្ងៃ។

៣. ម៉ាស្សា

ការម៉ាស្សាអាចជួយកាត់បន្ថយការឈឺចាប់ ហើយវាក៏ជួយសម្រួលចរន្តឈាមរត់ទៅកាន់តំបន់ដែលទទួលរងផលប៉ះពាល់និងកាត់បន្ថយការហើម។ អ្វីដែលអ្នកត្រូវធ្វើ គឺគ្រាន់តែចាក់ប្រេងអូលីវ ឬប្រេងដូង ១ ឬ ២ដំណក់លើចុងម្រាមដៃ រួចសឹមលាបម៉ាស្សាត្រង់តំបន់ក្លៀកថ្នមៗសម្រាប់រយៈពេលពី ២ ទៅ ៣នាទី។ អនុវត្តឱ្យបាន ២ដងក្នុងមួយថ្ងៃ។

៤. ឪឡឹក

ផ្លែឈើនេះមានលក្ខណៈសម្បត្តិប្រឆាំងអុកស៊ីតកម្មនិងប្រឆាំងការរលាកជួយបន្សាបជាតិពុលពីក្នុងឈាម ហើយកម្ចាត់បាក់តេរីដែលបង្កឱ្យមានដុំពក ព្រមទាំងការត់បន្ថយការហើមត្រង់តំបន់ដែលទទួលរងផលប៉ះពាល់ផងដែរ។ អ្វីដែលអ្នកត្រូវធ្វើ គឺគ្រាន់តែទតួលទានទឹកឪឡឹកស្រស់ៗ ១កែវ រាល់ព្រឹក។

៥. ទឹកក្រូចឆ្មារស្រស់

មានផ្ទុកសម្បូរទៅដោយវីតាមីន C, សារធាតុប្រឆាំងអុកស៊ីតកម្ម និងលក្ខណៈសម្បត្តិប្រឆាំងការរលាកដែលជួយកាត់បន្ថយការហើមឈឺចាប់នៃដុំពក ព្រមទាំងពន្លឿនការជាសះស្បើយ។ អ្វីដែលអ្នកត្រូវធ្វើ គឺគ្រាន់តែលាយទឹកក្រូចឆ្មារស្រស់ជាមួយទឹកធម្មតាក្នុងបរិមាណស្មើគ្នា រួចសឹមប្រើប្រាស់ដុំសំឡីជ្រលក់លាបល្បាយទឹកក្រូចឆ្មារស្រស់នេះលើដុំពក។ ទុកឱ្យស្ងួតដោយឯកឯងជាការស្រេច។ អនុវត្តឱ្យបានពី ៣ ទៅ ៤ដងក្នុងមួយថ្ងៃ។ អ្នកក៏អាចលាយទឹកក្រូចឆ្មារស្រស់ពី ១ ទៅ ២ ស្លាបព្រាកាហ្វេក្នុងទឹកក្ដៅឧណ្ហៗ រួចទទួលទានរាល់ព្រឹកផងដែរ។

៦. រមៀត

អ្វីដែលអ្នកត្រូវធ្វើ គឺគ្រាន់តែលាយម្សៅរមៀត ឬរមៀតម៉ដ្ឋ ១ស្លាបព្រាកាហ្វេក្នុងទឹកដោះគោក្ដៅៗ ១ពែង។ កូរឱ្យសព្វ សឹមទទួលទានរាល់ថ្ងៃមុនចូលគេង។ អ្នកក៏អាចលាយម្សៅរមៀត ឬរមៀតម៉ដ្ឋជាមួយទឹកធម្មតាឱ្យក្លាយជាល្បាយខាប់ រួចសឹមលាបលើដុំពក និងរងចាំសម្រាប់រយៈពេលពី ១០ ទៅ ១៥នាទី សឹមលាងសម្អាតចេញជាមួយទឺកធម្មតាជាការស្រេច។ អនុវត្តឱ្យបាន ២ដងក្នុងមួយថ្ងៃ។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕