ទោះបីជាស្គាល់ និងឧស្សាហ៍ទទួលទាន ប៉ុន្តែភាគច្រើននៃពួកយើងប្រហែលជាមិនធ្លាប់ដឹងទេថា ផ្នែកពណ៌លឿងនៃស៊ុត និងគ្រឿងផ្សំធម្មជាតិមួយចំនួនអាចជួយព្យាបាលបញ្ហាស្បែកមុខស្ងួត។ កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះប្រើផ្នែកពណ៌លឿងនៃស៊ុត និងគ្រឿងផ្សំផ្សេងទៀតផ្ដល់សំណើមដល់ស្បែក ៖
១. ផ្នែកពណ៌លឿងនៃស៊ុត
អ្វីដែលអ្នកត្រូវធ្វើ គឺគ្រាន់តែលាយផ្នែកពណ៌លឿង ១គ្រាប់ជាមួយទឹកឃ្មុំ ១ស្លាបព្រាកាហ្វេឱ្យសព្វចូលគ្នា។ បន្ទាប់មកសឹមលាបល្បាយលើស្បែកមុខ និងរងចាំរហូតដល់ស្ងួតសម្រាប់រយៈពេលពី ១០ ទៅ ១៥នាទី។ លាងសម្អាតចេញជាមួយទឹកធម្មតា និងអនុវត្តឱ្យបានម្ដង ឬ ២ដងក្នុងមួយសប្តាហ៍។
២. ចេកទុំ
អ្វីដែលអ្នកត្រូវធ្វើ គឺគ្រាន់តែកិនលាយចេកទុំម្ខាងជាមួយទឹកឃ្មុំ ១ស្លាបព្រាបាយ និងប្រេងអូលីវ ១ស្លាបព្រាកាហ្វេឱ្យសព្វចូលគ្នា។ លាបល្បាយពេញលើស្បែកមុខ និងលាងសម្អាតចេញជាមួយទឹកធម្មតាក្រោយរយៈពេល ១០នាទី។ អនុវត្តឱ្យបានម្ដងក្នុងមួយសប្តាហ៍។
៣. ឪឡឹក
អ្វីដែលអ្នកត្រូវធ្វើ គឺគ្រាន់តែលាយទឹកផ្លែឪឡឹកស្រស់ៗ ១ស្លាបព្រាបាយជាមួយទឺកឃ្មុំ ១ស្លាបព្រាបាយ ឱ្យសព្វចូលគ្នា។ បន្ទាប់មកលាបម៉ាស្សាល្បាយលើស្បែកមុខ និងរងចាំសម្រាប់រយៈពេលប្រហែល ២០ នាទី សឹមលាងសម្អាតចេញ។ អ្នកអាចប្រើប្រាស់រូបមន្តនេះបានដល់ទៅ ៣ដងក្នុងមួយសប្តាហ៍ ដោយអាស្រ័យលើផលឆ្លើយតបនៃស្បែកចំពោះល្បាយម៉ាសនេះ។
៤. ប្រទាលកន្ទុយក្រពើ
អ្វីដែលអ្នកត្រូវធ្វើ គឺគ្រាន់តែលាយជែលប្រទាលកន្ទុយក្រពើស្រស់ ២ស្លាបព្រាបាយជាមួយទឹកឃ្មុំ ១ស្លាបព្រាកាហ្វេឱ្យសព្វចូលគ្នា។ បន្ទាប់មកលាបល្បាយលើស្បែកមុខ និងរងចាំសម្រាប់រយៈពេល ១៥នាទី សឹមលាងសម្អាតចេញជាមួយទឹកក្ដៅឧណ្ហៗ។
៥. រមៀត
អ្វីដែលអ្នកត្រូវធ្វើ គឺគ្រាន់តែលាយរមៀតម៉ដ្ឋ ១ចិបជាមួយទឹកដោះគោស្រស់ ឬទឹកដោះគោឆៅ ២ស្លាបព្រាកាហ្វេ។ បន្ទាប់មកលាបល្បាយលើស្បែកមុខដោយប្រើប្រាស់ដុំសំឡី។ រងចាំសម្រាប់រយៈពេលប្រមាណ ១០នាទី សឹមលាងសម្អាតចេញ។ អនុវត្តម្ដងរៀងរាល់ពី ២ ទៅ ៣ថ្ងៃ។ ទោះជាយ៉ាងណារូបមន្តនេះមិនសាកសមសម្រាប់អ្នកដែលមានអាឡែកស៊ីនឹងផលិតផលផ្សំឡើងពីទឹកដោះគោឡើយ។
កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh មិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕