ឆាប់អស់កម្លាំងណាស់ឬ? ត្រូវខំញ៊ាំអាហារប្រភេទនេះ

កំពុងជួបប្រទះអាការៈអស់កម្លាំងជាញឹកញយមែនទេ? កុំបារម្ភ! ជំនួសឱ្យការជ្រើសរើសទទួលទានភេសជ្ជៈប៉ូវកម្លាំងផ្សេងៗ អ្នកក៏អាចដោះស្រាយបញ្ហានេះបានយ៉ាងងាយជាមួយគន្លឹះមួយចំនួន។ ថាតើគន្លឹះទាំងនោះមានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗដោះស្រាយបញ្ហាឧស្សាហ៍មានអារម្មណ៍អស់កម្លាំង ៖

១. អាហារសម្បូរប្រូតេអ៊ីន

អ្នកដែលប្រឈមមុខនឹងបញ្ហាអស់កម្លាំងជាប្រចាំចូរព្យាយាមបង្កើនការទទួលទានអាហារសម្បូរប្រូតេអ៊ីនគុណភាពខ្ពស់។ នេះក៏ព្រោះតែប្រូតេអ៊ីនគឺចាំបាច់ណាស់ក្នុងការបង្កើនកម្រិតនៃថាមពលដោយវាជួយដល់ការលូតលាស់នៃសាច់ដុំគ្មានខ្លាញ់ដែលធ្វើឱ្យអ្នកកាន់តែរឹងមាំ ហើយជាពិសេសនោះរាងកាយបំលែងប្រូតេអ៊ីនទៅជាថាមពលបម្រុងផងដែរ។

២. អាហារមានផ្ទុកអាស៊ីតខ្លាញ់សុខភាពល្អ

អាស៊ីតខ្លាញ់សុខភាពល្អដូចជាអាស៊ីតខ្លាញ់អូមេហ្កា ៣ ដែលមានផ្ទុកក្នុងត្រីសម្បូរខ្លាញ់ គ្រាប់ធញ្ញជាតិ និងគ្រាប់ពូជអាចផ្ដល់អត្ថប្រយោជន៍យ៉ាងប្រសើរចំពោះបេះដូងនិងខួរក្បាល។ វាជាការសំខាន់ក្នុងការរក្សាឱ្យបាននូវសុខភាពបេះដូងនិងខួរក្បាលប្រសើរដើម្បីអាចផ្គត់ផ្គង់ឱ្យរាងកាយនូវឈាមដែលមានផ្ទុកអុកស៊ីសែននិងសារធាតុចិញ្ចឹមគ្រប់គ្រាន់។ ខណៈដែលរាងកាយត្រូវការអុកស៊ីសែននិងសារធាតុចិញ្ចឹមដើម្បីដំណើរការមុខងារត្រឹមត្រូវ ហើយអាចជួយទប់ស្កាត់និងដោះស្រាយបញ្ហាអស់កម្លាំងគួរឱ្យកត់សម្គាល់។

៣. អាហារសម្បូរជាតិដែក

មួយក្នុងចំណោមវិធីដ៏ងាយដើម្បីកម្ចាត់អាការៈអស់កម្លាំង គឺការផ្គត់ផ្គង់ជាតិដែកឱ្យបានគ្រប់គ្រាន់ក្នុងរាងកាយ។ ជាតិរ៉ែនេះចាំបាច់សម្រាប់បង្កើនកោសិកាគ្រាប់ឈាមក្រហមដើម្បីប្រាកដថាអុកស៊ីសែនត្រូវបានផ្គត់ផ្គង់ទៅសព្វពេញរាងកាយ។ រាល់កោសិការាងកាយត្រូវការទទួលបានអុកស៊ីហ្សែនគ្រប់គ្រាប់ដើម្បីបំពេញមុខងារភារកិច្ច។ កង្វះជាតិដែកផ្ដល់បញ្ហាសុខភាពជាច្រើន រួមទាំងភាពអស់កម្លាំងឆាប់ហត់ ពិបាកផ្ដោតអារម្មណ៍ និងសូម្បីតែភាពអំណត់ស៊ូទ្រាំ។ ប្រសិនបើអ្នកមិនចង់ឱ្យបញ្ហាទាំងនេះកើតឡើងទេ ចូរទទួលទានអាហារដែលមានផ្ទុកសម្បូរទៅដោយជាតិដែក។

៤. អាហារសម្បូរវីតាមីន B12 ក្នុងរបបអាហារប្រចាំថ្ងៃ

វីតាមីន B12 ក៏សំខាន់ណាស់ដែរសម្រាប់ផលិតកោសិកាគ្រាប់ឈាមក្រហម ខណៈដែលមួយក្នុងចំណោមវិធីដ៏ងាយដើម្បីកម្ចាត់អាការៈអស់កម្លាំង គឺការផ្គត់ផ្គង់ជាតិដែកឱ្យបានគ្រប់គ្រាន់ក្នុងរាងកាយ។ វីតាមីន B12 ក៏ជួយបំលែងកាបូអ៊ីដ្រាតទៅជាថាមពលសម្រាប់រាងកាយផងដែរ។

៥. អាហារសម្បូរជាតិសសៃ

ធ្លាប់ដឹងទេថាការទល់លាមកក៏អាចធ្វើឱ្យអ្នកមានអារម្មណ៍អស់កម្លាំងផងដែរ។ នេះជាអ្វីដែលអ្នកចាំបាច់គួរព្យាយាមទទួលទានអាហារសម្បូរជាតិសសៃជាប្រចាំដើម្បីសម្រួលចលនាពោះវៀន។ បន្លែផ្លែឈើជាប្រភពដ៏ប្រសើរនៃជាតិសសៃ។

៦. ទទួលទានតែបៃតងឆុងរួចថ្មីៗ

អ្នកក៏គួរព្យាយាមទទួលទានតែបៃតងជាប្រចាំផងដែរ ប្រសិនបើចង់ប្រឆាំងអាការៈអស់កម្លាំង។ ភេសជ្ជៈនេះមានផ្ទុកបរិមាណនៃជាតិកាហ្វេអ៊ីនទាបដែលល្អណាស់សម្រាប់ជួយឱ្យអ្នកមានអារម្មណ៍ថាមានថាមពល។ តែបៃតងក៏មានប្រសិទ្ធភាពជួយសម្រួលការរំលាយអាហារ។ ជាលទ្ធផលទប់ស្កាត់អាការៈទល់លាមកដែលកត្តាបង្កបញ្ហាអស់កម្លាំងបានផងដែរ។

កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh សូមមិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕