នៅពេលមនុស្សម្នាក់ឆក់ខ្សែភ្លើង ចរន្តអគ្គិសនី នឹងឆ្លងចូលក្នុងរាងកាយ ហើយវាក៏បង្កជាការស្ពឹក និងឈឺឈៀបៗ រហូតដល់បេះដូង ឈប់ដើរមួយរំពេចដែរ។ វាអាចបង្កជារបួស នៅកន្លែងដែលឆក់ដូចជា រលាក ឬដំបៅស្បែក។ យ៉ាងណាមិញ ចំពោះករណីឆក់ចរន្តដែលខ្លាំងវិញ វាអាចប៉ះពាល់ដល់ខួរក្បាល និងបេះដូងដែរ។ ចំពោះបេះដូង អាចនាំឲ្យបេះដូងលោតញាប់ ដែលឈានទៅរកការគាំងបេះដូង និងស្លាប់ភ្លាមៗ។ ចំពោះខួរក្បាលវិញ អាចទៅជាប្រកាច់ និងមានជំងឺខួរក្បាលថែមទៀត។ ដូច្នេះហើយ ការយល់ដឹងអំពី វិធីសង្គ្រោះបឋមលើករណីឆក់ខ្សែភ្លើង យ៉ាងហោចណាស់ ក៏អាចជួយជនរងគ្រោះ ពីបញ្ហាខាងលើបានដែរ។
![](https://www.health.com.kh/wp-content/uploads/2021/10/unnamed-2.jpg)
ខាងក្រោមនេះ គឺជាអ្វីដែលអ្នកគួរតែធ្វើ នៅពេលជួបមនុស្សឆក់ខ្សែភ្លើង ៖
- មុនពេលអ្នកជួយគេ ចូរមើលជុំវិញខ្លួនសិនថា មានអ្វីគួរឲ្យគ្រោះថ្នាក់ឬអត់ ព្រោះចរន្តអគ្គិសនីអាចឆ្លងមកឆក់អ្នកបាន តាមរយៈទឹក ឬដែក។ ចូរទូរស័ព្ទ ហៅឡានសង្គ្រោះភ្លាមៗ។
- បន្ទាប់មក ចូរព្យាយាមទាញជនរងគ្រោះ ពីប្រភពឆក់។ អ្នកកអាចផ្តាច់ចរន្តអគ្គិសនីបានដែរ។ បើសិនជាមិនអាចធ្វើបានទេ ចូរឈរនៅលើកន្លែង ឬរបស់ដែលមិនឆ្លងចរន្តដូចជាដុំឈើ ឬកន្លែងដែលស្ងួត និងប្រើឈើរុញជនរងគ្រោះ ពីប្រភពចរន្តអគ្គិសនី។ មិនត្រូវប៉ះជនរងគ្រោះដោយដៃទរទេឡើយ ព្រោះវាអាចឆក់បាន។
- ក្រោយពីយកជនរងគ្រោះ ចេញពីប្រភពអគ្គិសនីហើយ ចូរដាក់គេឲ្យគេងផ្អៀង ហើយដាក់ក្បាលកើយលើដៃខ្លួនឯង។ ចូរច្បត់ជង្គង់របស់ជនរងគ្រោះ និងពិនិត្យមើលការដកដង្ហើមរបស់គេផង។
- បើសិនជាជនរងគ្រោះ នៅមានដង្ហើម តែមានការរលាកតិចតួច អ្នកអាចលាងវា ជាមួយទឹកចេញក្បាលរ៉ូប៊ីណេបាន។ មិនត្រូវប្រើភួយ គ្របលើជនរងគ្រោះឡើយ ព្រោះវាជាតិអំបោះរបស់ភួយ អាចជាប់នៅកន្លែងដែលរលាកបាន។
- បើសិនជាមានការហូរឈាម ចូរគ្រប់គ្រងការហូរឈាម តាមរយៈប្រើក្រណាត់ស្ងួត និងស្អាតខ្ទប់នៅកន្លែងហូរឈាម ហើយប្រើវិធីចង់រឹងកុំឲ្យហូរឈាម។
- ចូរចាប់ផ្តើមធ្វើការម៉ាស្សាបេះដូង និងសួត (CPR) បើសិនជាជនរងគ្រោះ មិនមានដង្ហើម។ មិនត្រូវធ្វើ CPR នៅពេលជនរងគ្រោះ កំពុងដកដង្ហើមឡើយ។
![](https://www.health.com.kh/wp-content/uploads/2021/10/2.jpg)
ចូរចាំថា មនុស្សម្នាក់ដែលមានរបួស ដោយសារឆក់ខ្សែភ្លើង ត្រូវការការយកចិត្តទុកដាក់ខាងផ្នែកវេជ្ជសាស្ត្រជាបន្ទាន់ ទោះបីជាគេមើលទៅ មានសភាពល្អប្រសើរ ក្រោយពីជួបគ្រោះថ្នាក់រួចក៏ដោយ។ គ្រូពេទ្យអាចនឹងពិនិត្យមើលការរលាក បាក់ឆ្អឹង និងរបួសផ្សេងៗទៀត ហើយបើសិនចាំបាច់ អាចនឹងត្រូវធ្វើតេស្តបន្ថែមទៀតដូចជា ECG, តេស្តឈាម CT Scan ឬ MRI៕