មិនចង់មានបញ្ហាមាត់ធ្មេញគួរធ្វើបែបណា? កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗទប់ស្កាត់បញ្ហាមាត់ធ្មេញ ៖
១. បន្ថែមទឹកដោះគោក្នុងកាហ្វេនិងតែ
ដើម្បីរក្សាភាពភ្លឹនៃធ្មេញនោះការជ្រើសរើសអាហារ ឬភេសជ្ជៈឱ្យបានត្រឹមត្រូវមុនទទួលទាន គឺចាំបាច់ណាស់។ អាហារ និងភេសជ្ជៈមួយចំនួនអាចនាំឱ្យមានស្នាមប្រឡាក់ជាប់ធ្មេញ, អាហារ និងភេសជ្ជៈខ្លះទៀតដែលមានជាតិអាស៊ីតអាចបង្កបញ្ហាខូចកាចាធ្មេញ ខណៈដែលអាហារនិងភេសជ្ជៈមានផ្ទុកសារធាតុ tannins ខ្ពស់ដូចជាកាហ្វេ ឬតែ បង្កស្នាមប្រឡាក់ជាប់ធ្មេញដោយធ្វើឱ្យកម្រិត pH ក្នុងមាត់មានភាពប្រែប្រួល។ ទោះជាយ៉ាងណាអ្នកអាចរក្សាតុល្យភាពនៃកម្រិត pH ក្នុងមាត់តាមរយៈការទទួលទានអ្វីដែលមានផ្ទុកសម្បូរទៅដោយកាល់ស្យូម ក្រោយពេលញ៊ាំអាហារ ឬភេសជ្ជៈមានជាតិអាស៊ីត។ បន្ថែមពីនេះការបន្ថែមទឹកដោះគោក្នុងកាហ្វេ ឬតែ គឺល្អណាស់សម្រាប់បន្ថយឥទ្ធិពលនៃជាតិអាស៊ីតរបស់ភេសជ្ជៈនេះ។
២. ញ៊ាំម្នាស់
ក្នុងកម្រិតមធ្យម ការទទួលទានអាហារមានផ្ទុកសារធាតុ bromelain ដូចជាម្នាស់ គឺល្អណាស់សម្រាប់ការពារកាចាធ្មេញ និងកាត់បន្ថយស្នាមប្រឡាក់ជាប់ធ្មេញ។ វាក៏ជួយកាត់បន្ថយអាការៈឈឺចាប់និងហើមនៃអញ្ចាញផងដែរតាមរយៈលក្ខណៈសម្បត្តិប្រឆាំងអុកស៊ីតកម្មដែលមានផ្ទុក។
៣. រក្សាបរិមាណនៃទឹកមាត់ ឬសំណើមក្នុងមាត់
ទឹកមាត់ជួយការពារធ្មេញតាមរយៈការសម្អាតជាប់ជានិច្ច, កម្ចាត់បាក់តេរី ព្រមទាំងពង្រឹងកាចាធ្មេញជាមួយជាតិកាល់ស្យូម និងផូស្វ័រ។ ប្រសិនបើមាត់ឈប់ផលិតទឹកមាត់ឱ្យបានគ្រប់គ្រាន់ ធ្មេញនឹងប្រែជាស្ងួត ហើយកម្រិតនៃ pH ក្នុងមាត់ប្រាកដជាប្រែប្រួល ខណៈដែលបាក់តេរីបំផ្លាញកាចាធ្មេញកាន់តែលុកលុយ។ ដូច្នេះដើម្បីជាការប្រសើរ ចូរព្យាយាមទទួលទានទឹកធម្មតាឱ្យបានច្រើនគ្រប់គ្រាន់រាល់ថ្ងៃ។ អ្នកក៏អាចទំពារស្ករកៅស៊ូគ្មានជាតិស្ករដើម្បីជម្រុញការផលិតទឹកមាត់ផងដែរ។
៤. ប្រើប្រាស់បំពង់បឺតនៅពេលទទួលទានភេសជ្ជៈ
មិនត្រឹមតែប្រភេទនៃភេសជ្ជៈប៉ុណ្ណោះទេដែលជះផលប៉ះពាល់លើសុខភាពធ្មេញ ប៉ុន្តែរបៀបនៃការទទួលទានវាក៏មានឥទ្ធិពលដូចគ្នា។ ក្រៅពីធ្វើឱ្យធ្មេញជាប់ស្នាមប្រឡាក់ ការទទួលទានភេសជ្ជៈមួយចំនួនដោយមិនប្រើទុយោរ ឬបំពង់បឺតអាចបង្កបញ្ហាសឹកកាចាធ្មេញ ខណៈដែលធ្មេញត្រូវប៉ះផ្ទាល់នឹងជាតិស្ករ ឬអាស៊ីតក្នុងភេសជ្ជៈ។
៥. ដុសធ្មេញមុនពេលចូលគេង
ការដុសសម្អាតធ្មេញឱ្យបាន ២ដងក្នុងមួយថ្ងៃ គឹចាំបាច់ណាស់។ ប៉ុន្តែក្នុងករណីអ្នកអាចធ្វើវាបានារដុសសម្អាតធ្មេញឱ្យបាន ២ដងក្នុងមួយថ្ងៃ គឹចាំបាច់ណាស់។ ប៉ុន្តែក្នុងករណីអ្នកអាចធ្វើវាបានតែម្ដង ចូរជ្រើសរើសដុសសម្អាតធ្មេញនៅមុនពេលចូលគេង។ ខណៈដែលនៅពេលគេងបាក់តេរីក្នុងមាត់នឹងកើនឡើង។ ហើយបាក់តេរីនេះ គឺទទួលខុសត្រូវលើការបង្កជាកំណកកំបោរជាប់ធ្មេញដែលជាមូលហេតុធ្វើឱ្យអ្នកតែងក្រោកមកមានក្លិនខ្យល់ដង្ហើមមិនល្អ ព្រមជាមួយរសជាតិអាក្រក់ក្នុងមាត់។ វាថែមទាំងបង្កបញ្ហាស្ងួតក្នុងមាត់ និងបង្កើនហានិភ័យនៃជំងឺពុកធ្មេញ។ អ្នកក៏ចាំបាច់ត្រូវដុសធ្មេញឱ្យបានយូរគ្រប់គ្រាន់ផងទើបប្រសើរ។ ២នាទីជារយៈពេលដែលត្រូវបានណែនាំ ហើយកុំភ្លេចប្រើប្រាស់ឧបករណ៍សម្អាតអណ្ដាត និងប្រើប្រាស់ខ្សែរ៉ូតសម្អាតតាមចន្លោះធ្មេញផង។
៦. កុំដុសធ្មេញខ្លាំងពេកៗ
ការដុសសម្អាតធ្មេញខ្លាំងៗពេកមិនត្រឹមតែបង្កគ្រោះថ្នាក់ចំពោះកាចាធ្មេញប៉ុណ្ណោះទេ ប៉ុន្តែវាក៏ធ្វើឱ្យស្រៀវធ្មេញផងដែរ។ ការជ្រើសរើសច្រាសដុសធ្មេញឱ្យបានត្រឹមត្រូវក៏ចាំបាច់ណាស់ដែរ។
៧. កុំដុសធ្មេញភ្លាមក្រោយញ៊ាំអាហារ
សូមចាំថាការដុសសម្អាតធ្មេញភ្លាមៗក្រោយទទួលទានអាហារអាចជះផលប៉ះពាល់ខ្លាំងណាស់សម្រាប់កាចាធ្មេញ ជាពិសេសប្រសិនបើអ្នកបានទទួលទានអ្វីដែលមានផ្ទុកជាតិអាស៊ីត។ សូមរងចាំឱ្យបាន ៣០នាទីក្រោយទទួលទានសិន សឹមដុសធ្មេញ។
កំណត់សម្គាល់៖ នេះជាអត្ថបទស្រាវជ្រាវដែលមានបំណងផ្តល់ជូននូវព័ត៌មាន និងចែករំលែកចំណេះដឹង មិនមែនសម្រាប់ជំនួសឱ្យការព្យាបាលដោយគ្រូពេទ្យជំនាញតែម្ដងឡើយ។ វេបសាយសុខភាព Health.com.kh សូមមិនទទួលខុសត្រូវចំពោះការព្យាបាលដោយខ្លួនឯងតាមអត្ថបទខាងលើនោះទេ។ ក្នុងករណីមានបញ្ហាសុខភាព ឬការសង្ស័យពាក់ព័ន្ធណាមួយ សូមធ្វើការណាត់ជួបពិគ្រោះជាមួយគ្រូពេទ្យជំនាញដើម្បីទទួលការពិនិត្យនិងព្យាបាលឱ្យបានត្រឹមត្រូវទើបប្រសើរ៕