កូនតូចៗ ជាធម្មតាតែងតែនោមច្រើនមិនថាថ្ងៃឫយប់។ ទោះជាយ៉ាងណាក៏ដោយ ម្តាយប្រាកដជាមិនអាចគេងលក់ស្រួលប្រសិនបើកូនតូចនោមយប់ញឹកញាប់។ ម្យ៉ាងទៀតបើកូននៅតែគេងនោមយប់ច្រើននោះពួកគេនៅតែត្រូវការប្រើខោទឹកនោមជាចាំបាច់។ ការប្រើខោទឹកនោមយូរពេកក៏អាចមានផលប៉ះពាលដល់ដំណើររបស់ក្មេងផងដែរ។ ដូច្នេះ អត្ថបទនេះ នឹងលាតត្រដាងគន្លឹះដ៏មានប្រសិទ្ធភាព ជួយអ្នកម្តាយគេងលក់ស្រួលពេលយប់ មិនបាច់បារម្ភរឿងងើបដូរខោអោយកូន ឫ ខ្លាចថាកូនខូចដំណើរអ្វីឡើយ។
-ជាដំបូង មុននឹងអ្នកម្តាយចង់អោយឈប់ងើបនោម ឫនោមច្រើនពេលយប់ សូមអ្នកម្តាយបង្រៀនគាត់អោយចេះប្រើបន្ទប់ទឹកជាមុនសិន។ អ្នកម្តាយក៏ត្រូវបង្ហាតកូនអោយដឹងថា ពេលគាត់ត្រូវការបត់ជើងគឺត្រូវតែទៅបន្ទប់ទឹក។ មិនពិបាកទេ! អ្នកម្តាយអាចនាំកូនចូលបន្ទប់ទឹកជាមួយ នៅពេលត្រូវបត់ជើង នោះគាត់នឹងមើល ហើយចងចាំថា ពេលគាត់ត្រូវនោម ឫបន្ទោរបង់ យូរទៅគាត់នឹងអាចប្រើបន្ទប់ទឹកបានដោយខ្លួនឯង។ ប្រសិនបើពេលថ្ងៃគាត់អាចនឹងទៅរកបន្ទប់ដោយខ្លួនឯង ហើយបើពេលយប់គាត់ក៏នឹងភ្ញាក់ឡើងហើយដាស់ជូនទៅបន្ទប់ទឹក ពេលនោះកូនអ្នកមិនបាច់ត្រូវប្រើខោទឹកនោមនៅពេលយប់ទៀតឡើយ។
-ដើម្បីកាត់បន្ថយការងើបនោមពេលយប់ អ្នកម្តាយសូមកុំផ្តល់ទឹកដោះគោ ឫទឹក ក៏ដូចជាសារធាតុរាវផ្សេងៗអោយកូនផឹកនៅពេលយប់ ដែលជាហេតុធ្វើអោយកុមារមានទំនោរងើបនោមច្រើនដងនៅពេលយប់។
-ដំបូងៗកុមារមិនទាន់ឈប់នោមពេលយប់ទាំងស្រុងទេ តែការងើបនោមពេលយប់នឹងថយចុះ ដោយមួយយប់គាត់អាចនោមតែម្តង។ អ្នកម្តាយអាចចំណាំពេលវេលាដែលកូននោមពេលយប់ ហើយដល់ពេលនោះសូមលើកគាត់ទៅនោម ដោយកុំអោយអោយគាត់ភ្ញាក់ព្រោះថា បើគាត់ភ្ញាក់នឹងរំខានដល់ដំណេកកុមារ ដែលជាពេលវេលាដ៏កក់ក្តៅក្នុងការលូតលាស់ខួរក្បាល។ អ្នកម្តាយមិនបាច់បារម្ភថាកូននឹងមិននោមប្រសិនបើគេមិនភ្ញាក់ដឹងខ្លួនឡើយ កុមារជាទូទៅនឹងអាចដឹងបានថាគេដល់ពេលវេលាត្រូវនោម ហើយគេនឹងនោមដោយមិនចាំបាច់ភ្ញាក់ដឹងខ្លួនឡើយ។
-នៅដំណាក់កាលនេះ ប្រសិនបើម្តាយមិនអាចភ្ញាក់លើកកូនទៅនោមបានទេ ហើយប្រសិនបើគេនោមត្រឹមតែម្តង ឫ ២ដងនៅពេលយប់ មិនចាំបាច់អោយកូនអ្នកស្លៀកខោទឹកនោមទេ។ អ្នកម្តាយគ្រាន់តែរកកម្រាលមួយក្រាស់ល្មមក្រាលអោយកូនគេង។ ធ្វើដូច្នេះ ពេលកូននោមយប់ គឺងាយស្រួលត្រង់ថា វាមិនសើមពូក ដោយគ្រាន់តែត្រូវការជម្រះតែកម្រាលនោះប៉ុណ្ណោះ។
-បន្ទាប់ឆ្លងកាត់ដំណាក់ខាងលើនេះហើយ យូរៗទៅធានាថាកូនអ្នកនឹងលែងងើបនោមនៅពេលយប់។ ទាំងម្តាយ និងកូន ពេលនេះអាចគេងលក់ស្កប់ស្កល់ពេញមួយយប់មិនខាន! សូមចងចាំថា គនឹះ្លទាំងនេះ គួរអនុវត្តនៅពេលកុមារមានអាយុចាប់ពី៣ឆ្នាំឡើង នឹងមានប្រសិទ្ធភាពខ្ពស់៕