ខ្ទឹមស គឺមិនត្រឹមតែជាគ្រឿងផ្សំមួយជួយបង្កើនឱជារសអាហារឡើយ។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)ភាគច្រើននៃពួកយើងសុទ្ធតែបានដឹងហើយថា ខ្ទឹមស មានផ្ទុកសម្បូរទៅដោយសារធាតុចិញ្ចឹមសំខាន់ៗសម្រាប់រក្សាសុខភាពរឹងមាំប្រសើរជៀសឆ្ងាយពីបញ្ហាសុខភាពផ្សេងៗ។ ប៉ុន្តែប្រសិនបើអ្នកជាមនុស្សស្ថិតក្នុងស្ថានភាពសុខភាពទាំង ៦ ខាងក្រោមនេះ ចូរបញ្ឈប់ ឬប្រយ័ត្នឲ្យមែនទែនមុនពេលទទួលទានខ្ទឹមស ក៏ព្រោះវាអាចបង្កជាបញ្ហាគួរឲ្យព្រួយបារម្ភ! ថាតើមនុស្សបែបណាទៅដែលមិនគួរទទួលទានខ្ទឹមស? ខាងក្រោមវេបសាយសុខភាព Health.com.kh នឹងបង្ហាញឲ្យដឹងនូវប្រភេទមនុស្សទាំង ៦ នោះ ៖

១. អ្នកដែលមានបញ្ហាថ្លើម

ដោយសារតែជាអាហារដែលមានផ្ទុកសារធាតុប្រឆាំងបាក់តេរី និងវីរុស មនុស្សជាច្រើនគិតថា ការទទួលទានខ្ទឹមសជួយទប់ស្កាត់សម្លាប់វីរុសនៃជំងឺរលាកថ្លើមបាន។ ប៉ុន្តែការពិតនោះ គឺខុសស្រឡះ ដោយខ្ទឹមសមិនអាចជួយព្យាបាល ឬទប់ស្កាត់កម្ចាត់វីរុសនៃជំងឺថ្លើមបានឡើយ។ ផ្ទុយទៅវិញការទទួលទានខ្ទឹមសបែរជាជម្រុញរំញោចក្រពះ និងពោះវៀន កាត់បន្ថយបរិមាណនៃទឹកអាស៊ីតក្រពះផ្ដល់ផលវិបាកដល់ដំណើរការនៃការរំលាយអាហារ ហើយបង្កជាអាការៈចង្អោរចង់ក្អួត។

២. អ្នកជំងឺរាគ

ប្រសិនបើអ្នកជំងឺរាគទទួលទានខ្ទឹមសឆៅ នោះជាតិហឹរនៃខ្ទឹមឆៅប្រាកដជាផ្ដល់ការរំញោចដល់ពោះវៀនដែលអាចបណ្ដាលឲ្យកើតមានបញ្ហាហូរឈាមក្នុងពោះវៀន និងហើម ហើយធ្វើឲ្យស្ថានភាពនៃជំងឺកាន់តែអាក្រក់ឡើង។ ដូច្នេះដើម្បីជាការប្រសើរ ប្រសិនបើអ្នកកំពុងរាគ គួរជៀសវាងទទួលទានខ្ទឹមសជាដាច់ខាត។

៣. អ្នកជំងឺមុនពេលវះកាត់

អ្នកជំងឺដែលនឹងត្រូវទទួលការវះកាត់ណាមួយនោះ គួរចាំទុកក្នុងចិត្តថា ត្រូវផ្អាក ឬបញ្ឈប់ការទទួលទានខ្ទឹមសយ៉ាងហោចណាស់ ២ សប្តាហ៍មុនពេលថ្ងៃវះកាត់ឈានមកដល់ ក៏ព្រោះតែខ្ទឹមស អាចបណ្ដាលឲ្យមានហូរឈាមច្រើនមិនឈប់។

៤. ស្ត្រីមានផ្ទៃពោះ និងស្ត្រីកំពុងបំបៅដោះកូន

ការទទួលទានខ្ទឹមសក្នុងបរិមាណតិចតួច គឺមិនផ្ដល់ផលវិបាកអ្វីកំឡុងពេលមានផ្ទៃពោះឡើយ ប៉ុន្តែការប្រើប្រាស់ ឬទទួលទានច្រើនអាចបង្កបញ្ហាគួរឲ្យព្រួយបារម្ភគ្មានសុវត្ថិភាពឡើយសម្រាប់ស្ត្រីមានផ្ទៃពោះ ក៏ដូចជាស្ត្រីកំពុងបំបៅដោះ។

៥. អ្នកដែលមានសម្ពាធឈាមទាប

ខ្ទឹមស កាត់បន្ថយសម្ពាធឈាម។ ដូច្នេះចំពោះអ្នកដែលមានបញ្ហាសម្ពាធឈាមទាបស្រាប់ មិនគួរទទួលទានខ្ទឹមសឡើយជៀសវាងធ្វើឲ្យស្ថានភាពកាន់តែអាក្រក់ឡើង។

៦. អ្នកមានជំងឺភ្នែក

អ្នកមានជំងឺភ្នែក មិនគួរទទួលទានខ្ទឹមសឡើយ ក៏ព្រោះវាបណ្ដាលឲ្យអាការៈនៃជំងឺកាន់តែយ៉ាប់យ៊ឺនឡើងរហូតដល់មានការហូរឈាម និងអាចឈានដល់ថ្នាក់ពិការភ្នែកបាន! លើសពីនេះទៅទៀត ការទទួលទានខ្ទឹមសច្រើនលើសយូរទៅ ក៏អាចបណ្ដាលឲ្យភ្នែកទទួលរងការបំផ្លាញ ឬខូចភ្នែកផងដែរ៕