ដំបៅ ”ក្តៅក្នុង” ដែលធ្វើឲ្យក្រហាយរាល់ពេលញ៉ាំអាហារ ឬសូម្បីតែនៅស្ងៀមក៏មានអារម្មណ៍ថាវេទនាដែរ។ វាគឺជាដំបៅដែលមនុស្សជាច្រើនធ្លាប់ជួបមកហើយ និងដឹងពីភាពវេទនារបស់ដំបៅនេះ។ អ្នកខ្លះកើតញឹកញាប់ អ្នកខ្លះមិនសូវកើតទេ។ តើអ្វីដែលជាមូលហេតុរបស់ដំបៅក្តៅក្នុងនេះ? តើអ្នកត្រូវធ្វើដូចម្តេចដើម្បីជាសះស្បើយបានលឿន? អញ្ចឹងយើងមកមើលពីរបៀបព្យាបាលទាំងអស់គ្នា៖
មូលហេតុនៃដំបៅក្តៅក្នុង
ដំបៅក្តៅក្នុង ឬដំបៅក្នុងមាត់ គឺជាអាការដែលស្រទាប់សាច់នៃមាត់រលាក។ ពេលខ្លះវាអាចជាដំបៅរលាកខ្លាំង ដំបៅអាចកើតពេញមាត់ មិនថាជាថ្ពាល់ផ្នែកខាងក្នុង ក្រអូមមាត់ អញ្ចាញធ្មេញ អណ្តាតជាដើម។ល។ មានមូលហេតុជាច្រើនដូចជា៖
- ប្រព័ន្ធការពាររាងកាយប្រែប្រួលដូចជាអំឡុងពេលមករដូវដែលអរម៉ូនក្នុងរាងកាយមានការផ្លាស់ប្តូរ។
- ភាពតានតឹងដែលកើតមកក្នុងរយៈពេលយូរ។
- ផឹកទឹកតិចពេក។
- សម្រាកមិនគ្រប់គ្រាន់។
- ធ្មេញសិប្បនិមិ្មតរលុងពេកអាចខាំសាច់មាត់ ឬការពត់ធ្មេញដែលប្រើឧបករណ៍ពត់មិនសមល្មមនឹងធ្មេញ។
វិធីព្យាបាលដំបៅក្តៅក្នុងឲ្យជាសះស្បើយយ៉ាងឆាប់រហ័ស
១. ខ្ពុលមាត់ជាមួយទឹកអំបិលរៀងរាល់ ២ ម៉ោងម្តងឬបន្ទាប់ពីញ៉ាំអាហាររួច។
២. ជៀសវាងការខ្ពុលមាត់ជាមួយទឹកខ្ពុលមាត់ដែលមានជាតិអាល់កុល ព្រោះវានឹងធ្វើឲ្យរបួសខាងក្នុងក្រហាយ។
៣. ប្រើច្រាសដុសធ្មេញដែលមានរោមទន់ ៗ ដុសពីរដងក្នុងមួយថ្ងៃឬបន្ទាប់ពីញ៉ាំអាហាររួច។
៤. ប្រសិនបើដែលកើតពីក្តៅក្នុងរីកធំនិងជ្រៅរហូតមានការឈឺចាប់ខ្លាំង អ្នកអាចប្រើក្រណាត់ស្អាត ដើម្បីរុំចុងម្រាមដៃរបស់អ្នករួចដុសជូតធ្មេញ អញ្ចាញធ្មេញជំនួសការប្រើច្រាសដុសធ្មេញបណ្តោះអាសន្ន។
៥. ជ្រើសរើសថ្នាំដុសធ្មេញដែលមានជាតិហ្វ្លអររាយដើម្បីការពារការពុកធ្មេញ។
៦. ជ្រើសរើសអាហារដែលទន់ងាយស្រួលទំពារងាយស្រួលរំលាយ។
៧. ជៀសវាងអាហារចៀន អាហារដែលមានរសជាតិជូរខ្លាំង ប្រៃខ្លាំង ហឹរខ្លាំង។
៨. ជៀសវាងអាហារដែលត្រជាក់ខ្លាំង និងក្តៅខ្លាំង។
៩. ចៀសវាងអាហារ និងរបស់ដែលធ្វើឲ្យក្រហាយក្នុងមាត់ ដូចជា ស្រា បារី ស្លាម្លូរ ជាដើម
១០. ញ៉ាំទឹកផ្លែឈើដោយច្រោះកាកចេញ ដើម្បីការពារការទល់ឆ្អុល ដែលអាចកើតមាន ក្នុងអំឡុងពេលញ៉ាំអាហារមិនមានច្រើន ឬញ៉ាំផ្លែឈើនិងបន្លែមិនបានច្រើន ដោយសាការឈឺចាប់ ដែលកើតចេញពីដំបៅក្នុងមាត់។
១១. គេងឲ្យបានគ្រប់គ្រាន់យ៉ាងហោចណាស់ ៦ ម៉ោងក្នុងមួយយប់។
១២. ហាត់ប្រាណឲ្យបានទៀងទាត់ ៣០ នាទី – ១ ម៉ោងក្នុងមួយថ្ងៃ យ៉ាងហោចណាស់ ៣-៤ ដងក្នុងមួយសប្តាហ៍។
១៣. ញ៉ាំទឹកឲ្យបានគ្រប់គ្រាន់៊ ពិនិត្យពណ៌ទឹកនោម ញ៉ាំទឹករហូតដល់ទឹកនោមមានពណ៌លឿងខ្ចី។
១៤. ព្យាយាមកាត់បន្ថយភាពតានតឹង តាមរយៈការធ្វើសកម្មភាពណាដែលអ្នកចូល ចិត្តដើម្បីបំបែរអារម្មណ៍អ្នកពីរឿងស្ត្រេស។
១៥. ប្រសិនបើដំបៅមានទំហំរឹតតែធំ ហើយវាមិនប្រសើរឡើងបន្ទាប់ពីធ្វើអ្វីគ្រប់វិធីហើយនោះ គួរទៅជួបគ្រូពេទ្យដើម្បីសុំថ្នាំព្យាបាលឲ្យជាសះស្បើយ។