មនុស្សគ្រប់គ្នាចង់ឲ្យខ្លួនឯងមើលទៅស្អាត មើលទៅក្មេងគ្រប់ពេលវេលា ថ្ងៃនេះទើបយើង មាន គន្លឹះល្អៗមកណែនាំដល់នារីៗដែលស្រលាញ់សុខភាពហើយចង់ស្អាតមិនចាស់។
១. ផ្លាស់ប្តូររបៀបការញ៉ាំ
ញ៉ាំអាហារឲ្យគ្រប់ទាំង ៥ ក្រុម ប៉ុន្តែត្រូវមើលឲ្យមានតុល្យភាពតាមអាយុ ព្រោះនៅពេល អាយុ កាន់តែ ច្រើន អត្រានៃការរំលាយអាហារនៅក្នុងរាងកាយមានការថយចុះ ដូច្នេះប្រសិនបើអ្នកញ៉ាំច្រើន ដូចពេលនៅក្មេង អាចបណ្តាលឲ្យងាយស្រួលនឹងធាត់ សំខាន់គួរកាត់បន្ថយការញ៉ាំ អាហារពពួក កាបូអ៊ីដ្រាត និងស្ករនៅពេលល្ងាច ផ្ទុយទៅវិញយកល្អគួរតែញ៉ាំបន្លែនិងផ្លែឈើដែល ងាយរំលាយ ប្រសើរជាង។
២. ធ្វើលំហាត់ប្រាណឲ្យបានទៀងទាត់
ការហាត់ប្រាណមិនចាំបាច់ត្រូវធ្វើរាល់ថ្ងៃទេ ប៉ុន្តែអ្នកគួរតែព្យាយាម ហាត់ប្រាណ យ៉ាងតិច មួយសប្តាហ៍ ៥ ថ្ងៃ មួយថ្ងៃ ៣០ នាទី ប៉ុន្តែប្រសិនបើអ្នកមិនមានពេល គួរប្រើការដើរជំនួសដូចជា ដើរឡើងចុះជណ្តើរ ឬដើរទិញឥវ៉ាន់នៅផ្សារ ផ្សារទំនើប ជាដើម។
៣. ផឹកទឹកឲ្យបានច្រើន
ទឹកគឺចាំបាច់ណាស់សម្រាប់មនុស្ស ហើយទឹកក៏ជាសារធាតុដែលធ្វើឲ្យស្បែកមានសំណើមនិងមិនស្ងួត អ្នកគួរផឹកទឹក ៨ កែវក្នុងមួយថ្ងៃហើយព្យាយាមជៀសវាងភេសជ្ជៈមានជាតិអាល់កុលនិងជាតិកាហ្វេអ៊ីន ដោយសារតែភេសជ្ជៈពពួកនេះមិនល្អសម្រាប់សុខភាព។
៤. សម្រាកឲ្យបានគ្រប់គ្រាន់
គួរគេងឲ្យបាន ៧-៨ ម៉ោងក្នុងមួយថ្ងៃ ព្រោះរាងកាយនឹងជួសជុលខ្លួនឯងក្នុងអំឡុងពេលគេង។ ក្រៅពីនេះនៅមានការស្រាវជ្រាវបង្ហាញថាការគេងជាមធ្យម ៧-៨ ម៉ោងក្នុងមួយថ្ងៃអាចកាត់បន្ថយ ហានិភ័យនៃជំងឺទឹកនោមផ្អែម និងជំងឺកកឈាមសរសៃឈាមបេះដូង ស្ត្រេស និងជំងឺធាត់បានទៀតផង។
៥. លាងសម្អាតគ្រឿងសម្អាងរាល់ពេលមុនចូលគេង
មិនថានឿយហត់ប៉ុណ្ណាទេ យកល្អគួរតែចំណាយពេល ៥-១០ នាទីដើម្បីលាងសម្អាត មុខឲ្យបានស្អាតមុនពេលចូលគេង ព្រោះគ្រឿងសម្អាងដែលបន្សល់ទុកនៅលើផ្ទៃមុខ ធ្វើឲ្យកើតកកស្ទះនៅក្រោមស្បែក អាចបណ្តាលកើតមុននិងស្នាមជ្រួញនៅពេលក្រោយបាន។
៦. លាបឡេការពារកម្តៅថ្ងៃរាល់ពេលមុនពេលចេញពីផ្ទះ
ដោយសារពន្លឺព្រះអាទិត្យគឺជាដើមហេតុនៃបញ្ហាស្បែកមុខ មិនថាបញ្ហាស្នាមជាំ អាចម៍រុយ និងស្នាមជ្រួញ ដែលបញ្ហាទាំងនេះនឹងធ្វើឲ្យនារីៗមើលទៅផ្ទៃមុខខ្មៅស្រអាប់ មិនស្រស់ថ្លា ហើយមើលទៅកាន់តែចាស់។
៧. ចៀសវាងស្ត្រេស
អារម្មណ៍ហាក់ដូចជាមិនមានចំណែកធ្វើឲ្យចាស់ឬមិនចាស់បាន ប៉ុន្តែការពិតនៅពេលអ្នកមាន អារម្មណ៍ស្រ្តេសឬអារម្មណ៍មិនល្អ តែងតែបង្ហាញចេញនៅលើទឹកមុខ ដែលឥរិយាបថនេះរឹតតែ បង្កើនឲ្យកើតភាពជ្រីវជ្រួញកាន់តែងាយឡើង ដូច្នេះព្យាយាមកុំស្ត្រេស ព្យាយាមធ្វើអ្វីដែលសប្បាយ និងអារម្មណ៍ល្អ។
គន្លឹះទាំង ៧ ដែលបានរៀបរាប់ខាងលើប្រសិនបើនារីៗណាធ្វើតាមជាប្រចាំ ធានាថាអ្នកនឹងមើល ទៅស្អាត មើលទៅក្មេងជាងវ័យគ្រប់ពេលវេលា អស់ការបារម្ភពីរឿងស្នាមជ្រួញ។