ជាធម្មតាស្ត្រីមានផ្ទៃពោះងាយនឹងប្រឈមមុខជាមួយហានិភ័យនៃបញ្ហាទល់លាមកណាស់។ ទោះជាយ៉ាងណាកុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះទប់ស្កាត់ហានិភ័យនៃបញ្ហាទល់លាមកចំពោះស្ត្រីមានផ្ទៃពោះ ៖
១. បង្កើនការទទួលទានអាហារសម្បូរជាតិសសៃ
ការទល់លាមកជាអ្វីមួយដែលបង្កើនហានិភ័យនៃជំងឺឬសដូងបាតចំពោះស្ត្រីមានផ្ទៃពោះ។ ហើយមួយក្នុងចំណោមគន្លឹះដ៏ងាយបំផុតសម្រាប់ទប់ស្កាត់ជំងឺទល់លាមក គឺតាមរយៈការទទួលទានអាហារសម្បូរជាតិសសៃ។ បន្លែផ្លែឈើជាប្រភពដ៏ប្រសើរបំផុតនៃជាតិសសៃ។
២. ទទួលទានទឹកឱ្យបានច្រើន
ត្រូវប្រាកដថាអ្នកទទួលទានទឹកបានច្រើនគ្រប់គ្រាន់ប្រមាណ ២លីត្រក្នុងមួយថ្ងៃ។ ការទទួលទានទឹកឱ្យបានច្រើនគ្រប់គ្រាន់អាចជួយទប់ស្កាត់អាការៈទល់លាមកកាត់បន្ថយហានិភ័យនៃជំងឺឬសដូងបាតកំឡុងពេលមានផ្ទៃពោះ។
៣. កុំទ្រាំទប់មិនបត់ជើងភ្លាមៗ
នៅពេលមានអារម្មណ៍ចង់ចូលបន្ទប់ទឹកបត់ជើង កុំទ្រាំ! ឆាប់ទៅភ្លាម។ ការពន្យារពេល ឬទ្រាំមិនទៅបត់ជើងអាចបណ្ដាលឱ្យទល់លាមកដែលបង្កើនហានិភ័យនៃជំងឺឬសដូងបាត។
៤. រក្សាឱ្យបាននូវភាពសកម្មនៃរាងកាយ
កំឡុងពេលមានផ្ទៃពោះ អ្នកក៏ចាំបាច់រក្សាឱ្យបាននូវភាពសកម្មនៃរាងកាយដើម្បីចៀសផុតពីបញ្ហាផ្សេងៗ។ ការរក្សាឱ្យបាននូវភាពសកម្មនៃរាងកាយ គឺជាវិធីដ៏ប្រសើរបំផុតដើម្បីប្រាកដថាប្រព័ន្ធរំលាយអាហាររបស់អ្នកអាចដំណើរការមុខងារបានត្រឹមត្រូវប្រក្រតីកាត់បន្ថយហានិភ័យនៃជំងឺឬសដូងបាត។
៥. ចៀសវាងអង្គុយ ឬឈរយូរពេក
ដោយសារគភ៌ក្នុងផ្ទៃដាក់សម្ពាធលើផ្នែកខាងក្រោមនៃរាងកាយ ក្នុងន័យនេះអ្នកចាំបាច់ត្រូវចៀសវាងការឈរ ឬអង្គុយសម្រាប់រយៈពេលយូរៗពេកដើម្បីទប់ស្កាត់ហានិភ័យនៃជំងឺឬសដូងបាតកុំឱ្យកើតឡើង។
៦. ទទួលទានអាហារសម្បូរខ្លាញ់ល្អ
ការទទួលទានខ្លាញ់សុខភាពល្អគ្រប់គ្រាន់អាចជួយសម្រួលចលនាពោះវៀនបានយ៉ាងប្រសើរចៀសផុតបញ្ហាទល់លាមក។ អ្នកអាចរួមបញ្ចូលផ្លែបឺរ ឬអាហារសម្បូរខ្លាញ់ល្អផ្សេងទៀតដូចជាគ្រាប់ធញ្ញជាតិក្នុងរបបអាហារប្រចាំថ្ងៃ៕