ការទទួលទានគ្រាប់ធញ្ញជាតិវ៉លណាត់ (Walnuts) កន្លះពែងជាប្រចាំអាចជួយបន្ថយកម្រិតកូឡេស្តេរ៉ូល និងផ្ដល់អត្ថប្រយោជន៍ជាច្រើនផ្សេងទៀតចំពោះសុខភាព។ ដូច្នេះភាគច្រើននៃពួកយើងប្រហែលជាមិនធ្លាប់ដឹងទេថា គ្រាប់ធញ្ញជាតិនេះអាចផ្ដល់ផលល្អៗចំពោះសម្រស់ស្បែកដែរ។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីផលស្មានមិនដល់នៃការទទួលទានគ្រាប់ធញ្ញជាតិវ៉លណាត់ចំពោះស្បែក ៖
១. ទប់ស្កាត់បញ្ហាស្បែកចាស់មុនវ័យ
នេះក៏ព្រោះតែគ្រាប់ធញ្ញជាតិនេះមានផ្ទុកសម្បូរទៅដោយសារធាតុប្រឆាំងអុកស៊ីតកម្មច្រើនជាងគ្រាប់ធញ្ញជាតិដទៃទៀត។ សារធាតុប្រឆាំងអុកស៊ីតកម្មជួយការពារស្បែកប្រឆាំងការបំផ្លាញពីសំណាក់កម្ដៅថ្ងៃ ឬពន្លឺព្រះអាទិត្យ។ ការទទួលទានគ្រាប់ធញ្ញជាតិវ៉លណាត់ពី ២ ទៅ ៣គ្រាប់ក្នុងមួយថ្ងៃអាចជួយការពារស្បែកឱ្យមើលទៅក្មេងជាងវ័យបានយូរ។ គ្រាប់ធញ្ញជាតិនេះក៏ជាប្រភពដ៏ប្រសើរនៃវីតាមីន B ដែលជួយកាត់បន្ថយការលេចឡើងនូវស្នាមជាំនិងជួយរាងកាយផលិតកោសិកាស្បែកមានសុខភាពល្អថ្មី។
២. រក្សាសំណើមស្បែក
គ្រាប់ធញ្ញជាតិវ៉លណាត់មានផ្ទុកសម្បូរទៅដោយអាស៊ីតខ្លាញ់អូមេហ្កា ៣ ច្រើនជាងគ្រាប់ធញ្ញជាតិដទៃទៀត។ អាស៊ីតខ្លាញ់អូមេហ្កា ៣ គឺចាំបាច់ណាស់សម្រាប់សុខភាពស្បែកដោយសារវាជួយរក្សាតុល្យភាពនៃការផលិតជាតិប្រេង ឬខ្លាញ់នៃស្បែក, កម្ចាត់ជាតិពុល និងរក្សាសំណើមស្បែកធ្វើឱ្យទន់រលោង ហើយគ្មានស្នាមជ្រីវជ្រួញ។
៣. ទប់ស្កាត់ការឡើងមុនលើស្បែក
ការទទួលទានគ្រាប់ធញ្ញជាតិវ៉លណាត់អាចជួយព្យាបាលស្បែកពីខាងក្នុង ហើយកាត់បន្ថយហានិភ័យនៃការលេចឡើងនូវរោគមុន។ អាស៊ីតខ្លាញ់សុខភាពល្អក្នុងគ្រាប់ធញ្ញជាតិនេះអាចជួយព្យាបាលការរលាកនិងសូម្បីតែបញ្ហាស្បែកមួយចំនួនទៀតដូចជាជំងឺសើស្បែក dermatitis។ សារធាតុមួយចំនួនទៀតក្នុងគ្រាប់វ៉លណាត់ជួយប្រឆាំងការរលាកពីខាងក្នុងមកក្រៅ ជួយឱ្យស្បែករក្សាបាននូវភាពភ្លឺរលោងនិងគ្មានមុន។
៤. កាត់បន្ថយស្នាមរង្វង់ខ្មៅនិងថ្នក់ក្រោមភ្នែក
នេះក៏ព្រោះតែគ្រាប់ធញ្ញជាតិវ៉លណាត់មានផ្ទុកវីតាមីន E ដែលអាចជួយកាត់បន្ថយស្នាមរង្វង់ខ្មៅនិងថ្នក់ក្រោមភ្នែកបានយ៉ាងប្រសើរ។
៥. ជួយឱ្យស្បែកស្រស់ថ្លាជាងមុន
ការទទួលទានគ្រាប់ធញ្ញជាតិផ្ដល់សារធាតុចិញ្ចឹមដល់ពោះវៀន ហើយបង្កើនបរិមាណនៃបាក់តេរីសុខភាពល្អដែលសំខាន់សម្រាប់ការរំលាយអាហារនិងសុខភាពរាងកាយទាំងមូល។ ជាលទ្ធផលស្បែកនឹងមានភាពស្រស់ថ្លាពីខាងក្នុងតែម្ដង។
៦. ល្អសម្រាប់ស្បែកក្បាល
ការរួមបញ្ចូលគ្រាប់ធញ្ញជាតិវ៉លណាត់អាចផ្ដល់អត្ថប្រយោជន៍គួរឱ្យកត់សម្គាល់ដល់ស្បែកក្បាលដោយទប់ស្កាត់អង្គែនិងភាពរមាស់ផងដែរ។ សារធាតុប្រឆាំងអុកស៊ីតកម្មនិងអាស៊ីតខ្លាញ់សុខភាពល្អក្នុងគ្រាប់ធញ្ញជាតិនេះអាចជួយរំញោចឬសសក់ធ្វើឱ្យមានសភាពភ្លឺរលោង ហើយកាន់តែមានទម្ងន់៕