តើទឹកទំពាំងបាយជូរផ្តល់នូវអត្ថប្រយោជន៍ចំពោះបេះដូងដូចគ្នាទៅនឹងស្រាក្រហមដែរឬទេ? វាពិតជាអាច ការសិក្សាស្រាវជ្រាវមួយចំនួនបានបង្ហាញថាទឹកទំពាំងបាយជូពណ៌ក្រហម និងពណ៌ស្វាយអាចផ្តល់អត្ថប្រយោជន៍ចំពោះបេះដូងបានដូចគ្នានឹងស្រាក្រហមផងដែរដែលក្នុងនោះរួមមាន៖
- ការកាត់បន្ថយហានិភ័យនៃការមានកំណកឈាម
- ការកាត់បន្ថយកូឡេស្តេរ៉ូលអាក្រក់
- ការការពារការខូចសរសៃឈាមបេះដូង
- ការជួយរក្សាបាននូវសម្ពាធឈាមដែលមានសុខភាពល្អ
ទំពាំងបាយជូគឺសម្បូរទៅដោយសារធាតុប្រឆាំងអុកស៊ីតកម្ម រួមមានដូចជាសារធាតុresveratrol និងសារជាតិflavonoids។ សារធាតុប្រឆាំងអុកស៊ីតកម្មទាំងនេះត្រូវបានរកឃើញជាចម្បងនៅក្នុងស្បែក ដើម ស្លឹក និងគ្រាប់នៃទំពាំងបាយជូជាជាងនៅក្នុងសាច់របស់វា។ ចំនួននៃសារធាតុប្រឆាំងអុកស៊ីតកម្មនៅក្នុងទំពាំងបាយជូគឺអាស្រ័យលើកត្តាជាច្រើនក្នុងនោះរួមមានប្រភេទនៃទំពាំងបាយជូ ដីដែលដាំ និងរបៀបនៃដំណើរការផលិត។ ទំពាំងបាយជូព៌ណក្រហមចាស់ និងស្វាយមានសារជាតិប្រឆាំងអុកស៊ីតកម្មខ្ពស់ជាងទំពាំងបាយជូដែលមានពណ៌ស ឬបៃតង។ ដូចគ្នានេះដែរកម្រិតនៃសារធាតុប្រឆាំងអុកស៊ីតកម្មដូចជា resveratrolបានរកឃើញនៅក្នុងស្រាជាច្រើនប្រភេទ ដោយមានកម្រិតខ្ពស់នៅក្នុងស្រាក្រហម។ ក្រៅតែពីទឹកទំពាំងបាយជូ ផលិតផលរបស់ទំពាំងបាយជូផ្សេងទៀតអាចនឹងផ្ដល់អត្ថប្រយោជន៍ខាងសុខភាពដែលរួមទាំងស្រាក្រហមដែលមិនមានជាតិអាល់កុល ទឹកដមទំពាំងបាយជូ និងម្សៅទំពាំងបាយជូរ។ ចាំទុកក្នុងចិត្តថាវាជាប្រយោជន៍ផងដែរក្នុងការញ៉ាំទំពាំងបាយជូទាំងមូល មិនមែនគ្រាន់តែទឹកទំពាំងបាយជូរនោះទេ។ ការស្រាវជ្រាវមួយចំនួនបានបង្ហាញថាផ្លែទំពាំងបាយជូរទាំងមូល ផ្តល់ចំនួនដូចគ្នានៃសារធាតុប្រឆាំងអុកស៊ីតកម្មដែលមាននៅក្នុងទឹកទំពាំងបាយជូ និងស្រាក្រហម ប៉ុន្តែផលប្រយោជន៍ផ្សេងទៀតនោះគឺវាផ្តល់នូវជាតិសរសៃដែលទឹករបស់វាគ្មាន៕