ភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានស្នើឱ្យរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងអភិបាលខេត្តមួយធ្វើការស្រាវជ្រាវ និងបំភ្លឺចំពោះការហាមឃាត់ពលរដ្ឋ មិនឱ្យសម្លាប់សត្វពពែយកសាច់ទទួលទាន ក្រោយមានអាជ្ញាធរមួយក្រុមបានរឹបអូសសាច់ពពែរបស់ប្រជាពលរដ្ឋ ដោយចោទថា ការកាប់សាច់ពពែលក់ គឺជារឿងខុសច្បាប់ ខណៈដែលកម្ពុជាពុំមានច្បាប់ណាហាមមិនឱ្យពលរដ្ឋចិញ្ចឹមពពែ និងកាប់សាច់លក់នោះទេ ។
នេះបើយោងតាមហ្វេកប៊ុករបស់សម្តេចតេជោ បានបង្ហោះនាព្រឹកថ្ងៃទី១៨ ខែកញ្ញានេះ ដោយបានបង្ហោះ វីដេអូ ដោយមានមន្ត្រីមួយក្រុមបានចុះរឹបអូសយកសាច់សត្វពពែ ដែលប្រជាពលរដ្ឋសម្លាប់ដោយចោទថា «តើមន្ត្រីយើងធ្វើដល់ថ្នាក់នេះជាមួយប្រជាជនមែនទេ? រដ្ឋមន្ត្រីក្រសួងកសិកម្ម និងអភិបាលខេត្តដឹងរឿងនេះឬទេ? តើរាជរដ្ឋាភិបាលមានដែលហាមឃាត់ប្រជាជនមិនអោយសម្លាប់ពពែយកសាច់ជាអាហារពីពេលណាមក ទើបបានជាមន្ត្រីយើងធ្វើមកលើប្រជាជនបែបនេះ?»
សម្តេចតេជោ បានបន្តថា យើងលើកទឹកចិត្តអោយប្រជាជនចិញ្ចឹមសត្វ មិនមែនទុកសម្រាប់ទុកតាំងពិព័រណ៍ទេ គឺសម្រាប់ជាចំណីអាហារ ។ ហេតុអីបានប្រជាជនចិញ្ចឹមសត្វគ្មានសិទ្ធិសម្លាប់សត្វយកសាច់ទទួលទានហើយតម្រូវឱ្យសុំច្បាប់ ។ បើមានក្នុងច្បាប់ គឺត្រូវធ្វើវិសោធនកម្មច្បាប់ ។
សម្តេចបានបញ្ជាក់ទៀតថា «ខ្ញុំមិនដឹងថា រូបភាពក្នុងវីដេអូនេះកើតនៅក្នុងខេត្តណាទេ ។ សុំរដ្ឋមន្ត្រីក្រសួងកសិកម្ម និងអភិបាលខេត្តស្រាវជ្រាវហើយចូលមកបំភ្លឺអោយខ្ញុំតាមហ្វេសបុកនេះ ដើម្បីអោយប្រជាជនបានដឹងជាទូទៅ ។ ខ្ញុំហួសចិត្ត និងអាណិតប្រជាជនជាទីគោរពស្រលាញ់របស់ខ្ញុំ។»
ជាមួយគ្នានោះដែរ ឯកឧត្តមវេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ ក៏បានខមិន បញ្ជាក់ទៅសម្តេចតេជោថា« ក្នុងនាមក្រសួង កសិកម្ម រុក្ខាប្រមាញ់ និងនេសាទ ខ្ញុំសូមអនុញ្ញាតគោរពជម្រាបជូនសម្តេច តេជោ មេត្តាជ្រាបដ៏ខ្ពង់ខ្ពស់ថា ៖ ការចិញ្ចឹមសត្វ និងការសម្លាប់ សត្វក្នុងគោលបំណងដើម្បីផ្គត់ផ្គង់ជីវភាពក្នុងគ្រួសារ គឺពុំមានទោសទណ្ឌ និងមានចែងនៅក្នុងច្បាប់ស្តីពីសុខភាពសត្វ និងផលិតកម្មសត្វ នោះទេ ហើយក៏គ្មានជាប់ពាក់ព័ន្ធទៅនឹងការប្រព្រឹត្តបទល្មើសអ្វីដែរ លើកលែងតែការ សម្លាប់សត្វក្នុងគោលបំណងធ្វើអាជីកម្មតែប៉ុណ្ណោះ។
ទាក់ទងទៅនឹងបញ្ហាខាងលើនេះ ឯកឧត្តមរដ្ឋមន្ត្រីសង្ឃឹមថា អាជ្ញាធរមូលដ្ឋាន ខេត្តកណ្តាល ដែលបានធ្វើកិច្ចការនេះផ្ទាល់ នឹងផ្តល់ជូនរបាយការណ៍លម្អិត ជូនសម្តេចតេជោ បានជ្រាបដ៏ខ្ពង់ខ្ពស់បន្ថែម ដោយក្តីគោរពដ៏ខ្ពង់ខ្ពង់បំផុតពីខ្ញុំបាទ ៕