ការក្អែរទឹកដោះចេញមកវិញគឺជារឿងធម្មតារបស់ទារកគ្រប់រូប ប៉ុន្តែដើម្បីសុខភាពកូន ហើយដើម្បីការមិនចាំបាច់លំបាកក្នុងការសម្អាត អ្នកអាចធ្វើតាមរបៀបខាងក្រោម នោះកូនអ្នកនឹងមិនក្អែរឡើយ។តើមានវិធីអ្វីខ្លះដែលអាចធ្វើឲ្យកូនមិនក្អែរ?
- អ្នកត្រូវតែជ្រើសរើសក្បាលដោះដែលមានប្រហោងប៉ុនមាត់របស់កូន បើប្រហោងតូចពេក កូនអាចបឺតខ្យល់រួមជាមួយទឹកដោះគោ ដែលងាយធ្វើឲ្យកូនក្អែរ តែបើធំពេកវានឹងធ្វើឲ្យកូនបឺតមិនទាន់ កូនអាចក្អែរចេញដូចគ្នា។
- នៅពេលដែលអ្នកដាក់ឲ្យកូនផឹក អ្នកត្រូវតែចាក់ទឹកដោះគោឲ្យដល់ក្បាលដោះសិន ទើបឲ្យកូនបៅ បន្ទាប់មកត្រូវតែលើកដបផ្នែកខាងក្រោយឲ្យខ្ពស់ជាងខាងមុខ ដោយមិនត្រូវឲ្យខ្យល់ចូលបានឡើយ ទើបកូនមិនមានអាការៈក្អែរទឹកដោះគោចេញមកវិញ។
- នៅពេលដែលអ្នកឲ្យកូនបៅទឹកដោះគោ អ្នកត្រូវតែពរកូនរាងផ្តេកលើដៃអ្នកទើបឲ្យកូនបៅ នោះកូននឹងមិនងាយក្អែរទឹកដោះចេញតាមមាត់ឡើយ។
- នៅក្រោយពេលដែលអ្នកឲ្យកូនបៅទឹកដោះគោរួច អ្នកត្រូវតែពរកូនឲ្យត្រង់ចំនួនពី២០នាទីដល់៣០នាទីទើបឲ្យកូនគេង ព្រោះបើកូនបៅអស់ភ្លាម គេងភ្លាម កូនអ្នកងាយនឹងក្អែរចេញមកវិញណាស់។
- នៅមុនពេលដែលអ្នកឲ្យកូនបៅទឹកដោះគោ អ្នកត្រូវតែប្តូរខោទឹកនោម ងូតទឹកឲ្យកូនឲ្យហើយ ព្រោះបើអ្នកឲ្យកូនបៅទឹកដោះគោរួច ទើបធ្វើរឿងទាំងនោះ នោះកូនអ្នកងាយនឹងក្អែរទឹកដោះគោចេញមកវិញណាស់ដោយសារតែអ្នកក្រឡាប់កូនចុះឡើង។
- បើកូនតែងតែមានអាការៈក្អែរទឹកដោះ អ្នកអាចបំបៅកូនច្រើនដងដោយក្នុងម្តង អ្នកអាចបំបៅគេតិចៗបានហើយ។
- នៅក្រោយពេលដែលកូនបៅរួច អ្នកអាចគោះខ្នងកូនតិចៗដើម្បីឲ្យគេត្អើក ទើបកូនមិនងាយក្អែរទឹកដោះគោចេញមកក្រៅ។
- នៅក្រោយពេលដែលបំបៅដោះកូនរួច អ្នកមិនត្រូវលេងជាមួយកូនដោយប្រើកម្លាំងខ្លាំងៗនោះទេ ព្រោះកូននឹងក្អែរទឹកដោះគោចេញមកអស់ជាមិនខានឡើយ៕