Join with Health.com.kh on Telegram

ភាគច្រើននៃពួកយើងប្រហែលជាមិនធ្លាប់គិតដល់ទេថា គ្រាន់តែការគេងផ្ងារក៏អាចផ្ដល់អត្ថប្រយោជន៍ចំពោះសម្រស់បានដែរ។ ថាតើវាអាចផ្ដល់ផលល្អៗអ្វីខ្លះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកគួរព្យាយាមគេងផ្ងារ ៖

១. កាត់បន្ថយស្នាមជ្រីវជ្រួញ ឬស្នាមខ្សែលើស្បែកមុខ

ការគេងបែរទៅម្ខាង ឬផ្អៀងនិងការគេងផ្កាប់មុខជាកត្តាចម្បងបំផុតមួយនៃបញ្ហាលេចឡើងនូវស្នាមខ្សែលើស្បែក ព្រមទាំងភាពជ្រីវជ្រួញខណៈដែលផ្ទៃមុខត្រូវផ្អឹបជាប់នឹងខ្នើយជាច្រើនម៉ោងកំឡុងពេលអ្នកគេង។

២. ទប់ស្កាត់ស្នាមជ្រីវជ្រួញលើស្បែក-ក និងទ្រូង

មិនត្រឹមតែស្បែកមុខរបស់អ្នកប៉ុណ្ណោះទេដែលនឹងទទួលរងគ្រោះដោយសារទម្លាប់នៃការគេងផ្អៀង ប៉ុន្តែស្បែក-ក និងទ្រូងរបស់អ្នកក៏អាចជួបបញ្ហាដូចគ្នា ហើយស្នាមជ្រីវជ្រួញអាចនឹងលេចឡើងយ៉ាងច្បាស់តែម្ដង។

៣. កាត់បន្ថយការហើម

ការគេងផ្អៀង ឬផ្កាប់មុខអាចបណ្ដាលឱ្យមុខរបស់អ្នកប្រែជាមើលទៅហើមៗនៅពេលព្រឹក។ ទោះជាយ៉ាងណាវាគ្រាន់តែលេចឡើងមួយខណៈពេលប៉ុណ្ណោះ។

៤​. កាត់បន្ថយរោគមុន និងស្នាមមុន

នៅពេលអ្នកគេងផ្អៀង ស្បែកមុខប្រាកដជាត្រូវផ្អឹបជាប់នឹងស្រោមខ្នើយ ឬសក់ជាច្រើនម៉ោង។ ជាលទ្ធផលបណ្ដាលឱ្យងាយឡើងមុនលើស្បែកមុខដោយសារភាពកខ្វក់ ឬធូលីដែលមានជាប់លើស្រោមខ្នើយ។

៥. បង្កើនប្រសិទ្ធភាពនៃផលិតផលថែរក្សាសម្រស់

ថាតើអ្នកមានធ្លាប់ប្រើប្រាស់ផលិតផលថែរក្សាស្បែកមុខជាប្រចាំមុនពេលចូលគេងមែនទេ? ដូច្នេះដើម្បីកុំឱ្យខ្ជះខ្ជាយ ចូរព្យាយាមគេងផ្ងារ ខណៈដែលការគេងផ្អៀងអាចបណ្ដាលឱ្យអ្វីដែលអ្នកលាបលើមុខអាចជាប់នឹងខ្នើយ ឬសក់នៅពេលគេងផ្អឹបលើ៕