សព្វថ្ងៃនេះមានការប្រើថ្នាំផ្សេងៗដើម្បីធ្វើឱ្យផ្លែឈើនិងបន្លែនៅមានសភាពស្រស់ញញឹម ដដែល ថ្នាំទាំងអស់នោះបង្កផលប៉ះពាល់ជាខ្លាំងមកលើប្រព័ន្ធខួរក្បាល ប្រព័ន្ធបន្តពូជ ប្រព័ន្ធអ៊ីមុយនីតេ ហើយក៏អាចធ្វើឱ្យកើតជម្ងឺមហារីក និងធ្វើឱ្យកូនកើតមកមានរាងកាយមិនល្អ ថែមទៀត។
បើទោះជាយ៉ាងណាក្តី បើកាលណាអ្នកមានការសង្ស័យថាផ្លែឈើឬបន្លែដែលអ្នកទិញមកមានថ្នាំពុល អ្នកអាចអនុវត្តវិធីសាមញ្ញ៣យ៉ាងខាងក្រោមនេះ។
ការលាងផ្លែឈើឬបន្លែ
ការលាងផ្លែឈើឬបន្លែដោយទឹកត្រជាក់អាចកាត់បន្ថយថ្នាំពុលបានពី៧៥ទៅ៨០%។ ត្រូវយកម្រាមដៃដុសសំបកផ្លែឈើឬបន្លែផង។ ការលាងអាចនឹងកាន់តែល្អជាមួយនឹងការដាក់អំបិលលាយបន្តិច។
ដាក់ផ្លែឈើឬបន្លែត្រាំក្នុងទឹកខ្មេះ
លាយទឹក៩០%ជាមួយទឹកខ្មេះ១០%។ យកផ្លែឈើឬបន្លែមកដាក់ត្រាំ ដោយដុសលាងតិចៗ ផង។ បន្ទាប់មក បាញ់ទឹកលាងសម្អាតចេញ។ ពេលដុសត្រូវដុសដោយប្រុងប្រយ័ត្ន ព្រោះទឹកខ្មេះអាចធ្វើឱ្យដាច់ដោចផ្លែឈើឬបន្លែបាន។
ចិតយកសំបកចេញ
វិធីកំចាត់ថ្នាំពុលល្អបំផុតគឺចិតយកសំបកផ្លែឈើឬបន្លែចេញ ជាពិសេសបើមានស្នាមប្រេះ។ ហើយបើសិនជាត្រូវដាក់ផ្លែឈើឬបន្លែស្លជាមួយសាច់មាន់ អ្នកត្រូវបកស្បែកមាន់ចេញ ព្រោះវាងាយបឺតស្រូបយកជាតិថ្នាំពុលខ្លាំងណាស់៕