នៅពេលដែលអ្នកមានជំងឺលើសសម្ពាធឈាម អ្នកអាចកែប្រែទម្លាប់នៃការរស់នៅរបស់អ្នកបាន ព្រោះវាអាចជួយអ្នកឲ្យចុះសំពាធឈាមបាន ប៉ុន្តែបើអ្នកកែប្រែទម្លាប់នៃការរស់នៅហើយ វានៅតែឡើង ហើយមិនចុះ នោះអ្នកអាចពិគ្រោះជាមួយគ្រូពេទ្យ រួចអាចពិសារថ្នាំដើម្បីឲ្យវាចុះបាន។ ដូចនេះបើមិនទាន់ទៅជួបគ្រូពេទ្យ តើអ្នកគួរតែធ្វើដូចម្តេចទើបអាចបញ្ចុះសំពាធឈាមបាននោះ?
អាហារ
អ្នកអាចបរិភោគស្រូវសាលី មីអ៊ីតាលី ឬអង្ករសម្រូបបាន។
អ្នកអាចបរិភោគបន្លែ និងផ្លែឈើឲ្យបានច្រើន ហើយអ្នក៏អាចផឹកទឹកផ្លែឈើស្រស់ដែរ។
អ្នកអាចបរិភោគត្រី និងសាច់មាន់បាន ប៉ុន្តែមួយថ្ងៃមិនត្រូវឲ្យលើសពី១៦០ក្រាមនោះទេ។
អ្នកមិនត្រូវបរិភោគអាហារដែលមានខ្លាញ់ច្រើននោះទេ ព្រោះវាអាចធ្វើឲ្យអ្នកលើសសំពាធឈាមយ៉ាងងាយ។
មិនត្រូវបរិភោគអាហារដែលផ្អែមច្រើននោះទេ ជាពិសេសបង្អែម ព្រោះវាងាយធ្វើឲ្យសំពាធឈាមអ្នកឡើងខ្ពស់ណាស់។
កាត់បន្ថយការទទួលទានជាតិសូដ្យូម
នៅក្នុងអាហារដែលអ្នកបរិភោគរាល់ថ្ងៃ មិនត្រូវឲ្យមានជាតិអំបិលលើសពី២៣០០មីលីក្រាមនោះទេ។
មិនត្រូវបរិភោគសាច់កំប៉ុងច្រើននោះទេ ព្រោះវាមានជាតិអំបិលច្រើន បើចង់បរិភោគ គួរតែបរិភោគសាច់ស្រស់ទើបល្អ។
ត្រូវញ៉ាំជាតិប៉ូតាស្យូមច្រើនបន្តិច
អ្នកត្រូវតែឲ្យរាងកាយអ្នកស្រូបយកប៉ូតាស្យូមឲ្យបានច្រើនបន្តិច ព្រោះវាអាចជួយឲ្យសំពាធឈាមអ្នកចុះបាន ហើយអាហារដែលមានប៉ូតាស្យូមមានដូចជា ៖ ចេក ប៉េងប៉ោះ ទឹកការ៉ុតជាដើម។
មិនត្រូវឲ្យឡើងទម្ងន់
អ្នកត្រូវតែរក្សាទម្ងន់អ្នកឲ្យថេរ មិនត្រូវធាត់ពេក ហើយក៏មិនត្រូវស្គមពេកដែរ ព្រោះវាសុទ្ធតែអាចធ្វើឲ្យសំពាធឈាមអ្នកឡើងដូចគ្នា។
ហាត់ប្រាណ
អ្នកត្រូវតែហាត់ប្រាណឲ្យបានច្រើន ដោយមួយអាទិត្យត្រូវហាត់៥ដង ហើយក្នុងម្តងត្រូវតែហាត់ពីកន្លះម៉ោងទៅមួយម៉ោងទើបល្អ។
មិនត្រូវផឹកគ្រឿងស្រវឹងច្រើន
អ្នកអាចផឹកតែមួយកែវតូចនៃស្រារក្រហមទេ ព្រោះវាល្អចំពោះសុខភាពអ្នក ប៉ុន្តែបើអ្នកផឹកច្រើន វានឹងងាយបំផ្លាញសុខភាពអ្នកខ្លាំងណាស់។
មិនត្រូវជក់បារី
បារីពិតជាបំផ្លាញសុខភាពអ្នកណាស់ ដូចនេះអ្នកមិនគួរជក់ច្រើនឡើយ បើអាច សូមកុំជក់ឲ្យសោះ។
បន្ថយភាពតានតឹង
អ្នកត្រូវតែចេះបន្ធូរអារម្មណ៍ ព្រោះបើអ្នកតែងតែមានអារម្មណ៍តានតឹង មិនសប្បាយចិត្ត ពិបាកចិត្តច្រើន គិតច្រើន នោះសំពាធឈាមអ្នកនឹងងាយឡើងខ្លាំងណាស់៕