Join with Health.com.kh on Telegram

អ្នក​ប្រហែលជា​ធ្លាប់បាន​ឮ​ពាក្យ​សរីរាង្គ​ហើយ​។ សព្វថ្ងៃនេះ នរណាៗ​ក៏​ចង់​តែ​ទិញ​អ្វីដែល​គេ​ថា​សរីរាង្គ ដែរ ព្រោះ​គេ​ជឿ​ថា​វា​ល្អ​ចំពោះ​សុខភាព​ជាង​ផលិតផល​ដែល​មាន​ជាតិគីមី​។ ក៏ប៉ុន្តែ តើ​អ្នក​បាន​យល់​ច្បាស់​អំពី​ពាក្យ​ថា​សរីរាង្គ​ហើយ​ឬ​នៅ​?


​នៅ​សហរដ្ឋអាមេរិក ចាប់តាំងពី​ថ្ងៃ​ទី​២១ ខែតុលា ឆ្នាំ​២០១២​មក គ្រប់​ចំណីអាហារ​ទាំងអស់ ទាំង​ផលិតផល​ក្នុងស្រុក ទាំង​ផលិតផល​នាំចូល​ពី​ក្រៅ ត្រូវតែ​បំពេញ​បទដ្ឋាន​ជាក់លាក់​មួយចំនួន ទើប​ត្រូវបាន​ក្រសួង​កសិកម្ម (U.S. Department of Agriculture -USDA)​ចាត់ទុកថា​ជា​សរីរាង្គ​។​


​ចំណីអាហារ​សរីរាង្គ​ត្រូវបាន​ផលិតឡើង​ខុស​ពី​ចំណីអាហារ​ធម្មតា​។ ក្រសួង​កសិកម្ម​អាមេរិក​បាន​ឱ្យ​និយមន័យ​យ៉ាង​ដូច្នេះ​៖
​ចំណីអាហារ​សរីរាង្គ​ត្រូវបាន​ផលិតឡើង​ដោយ​កសិករ​ដែល​ផ្តោត​ការយកចិត្តទុកដាក់​ទៅលើ​ការប្រើប្រាស់​ធនធាន​ដែល​អាច​ប្រើ​សារជាថ្មី​ឡើងវិញ​បាន សំដៅ​ថែរក្សា​គុណភាព​ទឹក​និង​ដី ដើម្បី​លើកកម្ពស់​គុណភាព​របស់​បរិស្ថាន​សម្រាប់​មនុស្ស​ជំនាន់​ក្រោយៗ​ទៀត​។ សាច់​សរីរាង្គ មាន់​ទា​សរីរាង្គ ផលិតផល​ទឹកដោះ​សរីរាង្គ ទាំងអស់នេះ​បានមក​ពី​សត្វ​ដែល​គេ​មិន​បាន​ផ្តល់​អង់​ទី​ប៊ីយ៉ូ​ទិកឱ្យ ឬ​អ័រម៉ូន​ធ្វើឱ្យ​ធំធាត់ នោះទេ​។ ចំណីអាហារ​សរីរាង្គ​ផលិត​ឡើង​ដោយ​គ្មាន​ការប្រើ​ថ្នាំ​សម្លាប់​សត្វល្អិត ជីរ​សំយោគ ទឹក​កក្វក់ ជីវ​វិស្វកម្ម ឬ​កាំរស្មី​អ៊ីយ៉ុង​អ្វី​ទេ​។​


​មុន​នឹង​ទទួលស្គាល់ថា​ផលិតផល​មួយ​ជា​ផលិតផល​សរីរាង្គ មន្ត្រី​របស់​រដ្ឋាភិបាល​ត្រូវ​ចុះទៅ​ពិនិត្យ​ចម្ការ​ឬ​ទីកន្លែង​ផលិត​សិន ថា​តើ​បាន​បំពេញ​គ្រប់​លក្ខណៈ​ដែល​ក្រសួង​កសិកម្ម​កំណត់​ហើយ​ឬ​នៅ​។​


​ក្រសួង​កសិកម្ម​អាមេរិក​នៅ​បាន​បញ្ជាក់​ថែម​ទៀត​ថា សូម​កុំ​ច្រឡំ​ពាក្យ​”​ធម្មជាតិ​” “​គ្មាន​ប្រើ​ថ្នាំ​សម្លាប់​សត្វល្អិត​” ឬ​”​គ្មាន​ជាតិ​អ័រម៉ូន​” ជាមួយ​នឹង​ពាក្យ​”​សរីរាង្គ​” ឱ្យសោះ​។