មើលទៅការរត់ហាក់ដូចជាៗវិធីប្រសើរមួយនៅក្នុងការដុតបញ្ឆេះកាឡូរី ក៏ប៉ុន្តែវាមិនមែនចេះតែល្អចំពោះមនុស្សគ្រប់រូបនោះទេ។ ការដើររាងញាប់បន្តិចគឺជាលំហាត់មួយដែលល្អចំពោះសរសៃឈាមបេះដូង ហើយបើទោះបីជាគេត្រូវដើរអស់ពេលយូរជាងបន្តិចក្តី ក៏ការសិក្សាជាច្រើនបានបញ្ជាក់ថាការដើរផ្តល់ផលល្អជាងការរត់ រួមទាំងការរត់ជ្រំជើងតិចៗផងដែរ។
១- រត់អាចធ្វើឱ្យមានរបួសស្នាមច្រើនជាងដើរ
ពួកអ្នករត់និយាយថាគេតែងតែមានរបួសស្នាមយ៉ាងតិចណាស់ក៏ម្តងដែរក្នុង១ឆ្នាំៗ ហើយច្រើនតែរបួសនៅក្បាលជង្គង់។ ម្យ៉ាងទៀត រត់តម្រូវថាត្រូវពាក់ស្បែកជើងឃ្លប់ផង។ រត់ច្រើនពេកអាចប៉ះពាល់ដល់សុខភាព។
២- ដើរ វាងាយស្រួលនឹងអនុវត្តជាង
កាលណាគេនៅក្មេង ការរត់តិចៗអាចជាលំហាត់មួយល្អមែន ក៏ប៉ុន្តែសម្រាប់តែរយៈពេលមួយខ្លី ប៉ុណ្ណោះ។ អាស្រ័យដោយការរត់អាចធ្វើឱ្យមានរបួសស្នាម ដែលនឹងតម្រូវឱ្យគេត្រូវតែអាក់ខានឈប់សម្រាកឱ្យរបួសសះជាសិន ការដើរគឺជាវិធីល្អបំផុត ព្រោះគេអាចអនុវត្តបានជាប់រហូត គ្មានឈប់។
៣- ការដើរជួយសម្រួលសុខភាពផ្លូវចិត្ត
ការដើរអាចប្រៀបបានទៅនឹងការអង្គុយធ្វើសមាធិដូច្នោះដែរ ព្រោះវាធ្វើឱ្យមានសុខភាពខាងផ្លូវចិត្ត និងវេទនារម្មណ៍ ជាពិសេសបើគេដើរនៅក្នុងធម្មជាតិ។ ពួកអ្នកធ្វើការសិក្សានិយាយថា ការដើរក្នុងធម្មជាតិត្រឹមតែ១ម៉ោង អាចបង្កើនសមត្ថភាពប្រមូលផ្តុំអារម្មណ៍និងការចងចាំរហូតដល់ទៅ១៦%បាន។
៤- ការរត់តម្រូវថាអ្នកត្រូវបរិភោគអាហារច្រើនជាង
ការរត់គឺជាលំហាត់ដែលមានអាំងតង់ស៊ីតេខ្លាំង ម្ល៉ោះហើយតម្រូវថាត្រូវបរិភោគអាហារឱ្យបានច្រើន ដែរ។ ផ្ទុយទៅវិញ ការដើរមិនទាមទារឱ្យបរិភោគច្រើនពេកទេ ម្ល៉ោះហើយក៏គ្មានបញ្ហាឡើងធាត់ នោះទេ។
៥- ការដើរអាចជួយបញ្ចៀសជំងឺមួយចំនួនបាន
ការដើរជាលំហាត់មួយដែលធ្វើឱ្យឆ្អឹងនិងសាច់ដុំជើងរឹងមាំ ដូច្នេះវាកាត់បន្ថយអត្រាកើតជំងឺពុកឆ្អឹងបានបន្តិចដែរ។ ម្យ៉ាងទៀត ការដើរអាចឱ្យយើងគ្រប់គ្រងកង្វល់ ស្ត្រេស និងបង្ការជំងឺ Alzheimer បាន ថែមទៀតផង។ ការសិក្សាមួយថ្មីៗនេះរបស់ American Heart Association បានបង្ហាញឱ្យដឹងថា ការដើរធ្វើឱ្យសម្ពាធឈាមថយចុះ កាត់បន្ថយកូឡេស្តរ៉ុល និងហានិភ័យនៃការកើតជំងឺទឹកនោមផ្អែម បានល្អប្រសើរជាងការរត់ ទៀតផង។