បង្គាគឺជាអាហារសមុទ្រដ៏ពេញនិយម ដែលប្រជាជនទាំងស្រុកគេ ទាំងស្រុកយើង តែងតែចូលចិត្តញ៉ាំ ។ អ្វីដែលជាដំណឹងល្អនោះគឺថា បង្គាផ្តល់ឱ្យ ហេតុផលដល់មនុស្សយើងច្រើនជាងរសជាតិដ៏ឆ្ងាញ់របស់វាទៅទៀត នោះគឺវាផ្ទុកទៅដោយជីវជាតិដែលល្អចំពោះសុខភាពយ៉ាងច្រើន។ ចាប់តាំងពីបង្គាអាចប្រឆាំងនឹងជំងឺមហារីករហូតដល់ជួយឱ្យស្បែកភ្លឺថ្លាមក ការញ៉ាំអាហារបែបនេះប្រហែលជាមានប្រយោជន៍ច្រើនជារសជាតិរបស់វាទៅ ទៀត។
បញ្ឈប់ជំងឺស្លេកស្លាំង
ជំងឺស្លេកស្លាំងកើតឡើងដោយសារតែកង្វះគ្រាប់ឈាមក្រហម។ បង្គាមានជាតិដែក និងសារធាតុ Cobalamin (វីតាមីន B12) ដែលមានសារៈសំខាន់ក្នុងការផលិតធាតុផ្សំដ៏សំខាន់បំផុតរបស់គ្រាប់ឈាម និងដឹកជញ្ជូនអុកស៊ីសែនទៅសរីរាង្គសំខាន់។
ពង្រឹងភាពរឹងមាំរបស់ឆ្អឹង
បង្គាមានសារធាតុផូស្វ័រ ដែលជាជាតិរ៉ែដ៏សំខាន់សម្រាប់សុខភាពឆ្អឹង។ សារធាតុកាល់ស្យូម និងផូ ស្វ័រទាំងពីរនេះសុទ្ធតែជួយបង្កើតកោសិកាឆ្អឹងព្រមទាំងព្រឹងដល់ជាលិកាឆ្អឹងទាំងអស់។
ប្រឆាំងនឹងជំងឺមហារីក
មានជាតិរ៉ែច្រើនណាស់ដែលត្រូវបានគេយល់ថាអាចលុបបំបាត់ជំងឺមហារីកបាន ហើយមួយចំនួននៃជាតិរ៉ែទាំងនេះគឺស័ង្គសី និងសេឡាញ៉ូមដែលមានក្នុងបង្គា។ ជាតិរ៉ែទាំងពីរនេះមានប្រយោជន៍ជាពិសេសចំពោះបុរសតែម្តងព្រោះវាជួយកាត់បន្ថយការកើតមហារីកក្រពេញប្រូស្តាត។ បង្គាក៏មានសារធាតុស្ពាន់ធ័រ ដែលជាជាតុរ៉ែប្រឆាំងនឹងជំងឺមហារីកដ៏ពេញនិយមផងដែរ។
ជំនួយដល់សុខភាពស្បែក
សមាសធាតុជាអង់ទីអុកស៊ីដង់ និងប្រឆាំងការរលាករបស់បង្គាធ្វើឱ្យអាហារសមុទ្រមួយនេះល្អចំពោះស្បែកតែម្តង។ អង់ទីអុកស៊ីដង់ជួយថែរក្សាស្បែកឱ្យនៅក្មេង ខណៈពេលដែលវាក៏ជួយលុបបំបាត់ការរលាករ៉ាំរ៉ៃក្នុងរាងកាយដើម្បីបង្ការបញ្ហាផ្សេងៗដល់ស្បែកថែមទៀតដែរដូចជា ជំងឺមុន និងតាអកជា ដើម។
បំបាត់ការបាក់ទឹកចិត្ត
បង្គានឹងផ្តល់ជាអាស៊ីតខ្លាញ់អូមេហ្គាបី ដែលមានដូចគ្នានឹងត្រី ផ្លែបឺរ និងគ្រាប់ធញ្ញជាតិដែរ។ ខ្លាញ់ប្រភេទនេះត្រូវបានគេស្គាល់ថាជួយពង្រឹងដល់សុខភាពផ្លូវចិត្ត និងបំបាត់ការបាក់ទឹកចិត្ត។
ថែរក្សាសុខភាពក្រពេញទីរ៉ូអ៊ីត
អ្នកជំនាញនិយាយថា ជំងឺក្រពេញទីរ៉ូអ៊ីតជាច្រើនកើតចេញពីការកង្វះជាតិទង់ដែង។ សំណាងដែរ បង្គាមានជាតិទង់ដែងច្រើនដែលអាចជួយបំប៉នសុខភាពក្រពេញទីរ៉ូអ៊ីតបានយ៉ាងល្អ។ ទង់ដែងគឺជាជាតិរ៉ែមួយដែលល្អចំពោះឆ្អឹង បេះដូង និងឈាមផងដែរ។
ផ្តល់ថាមពល
បង្គាមានប្រូតេអ៊ីនច្រើនដែលផ្តល់ជាថាមពលទៅតាមតម្រូវការប្រចាំថ្ងៃបាន។ វាក៏មានសារធាតុ Niacin (វីតាមីន B3) ជាជីវជាតិដ៏សំខាន់មួយសម្រាប់បំលែងខ្លាញ់ទៅជាថាមពលប្រើប្រាស់ក្នុងរាងកាយ។
បញ្ចុះកូឡេស្តេរ៉ុលអាក្រក់
ទោះបីជាបង្គាមានជាតិខ្លាញ់ប្រភេទ Saturated Fat ក៏ដោយ ក៏តាមការស្រាវជ្រាវតាមបែបវេជ្ជសាស្ត្របានឱ្យដឹងថា អាហារសមុទ្រប្រភេទនេះពិតជាជួយបញ្ចុះកូឡេស្តេរ៉ុលអាក្រក់បាន។ បើសិនជាខ្លាញ់ប្រភេទ Saturated Fatមានក្នុងបង្គានៅតែរំខានដល់អ្នកមែននោះ អ្នកក៏អាចជ្រើសរើសការចម្អិនដែល ផ្តល់សុខភាពវិញទៅដូចជា ការអាំង ឬស្ងោរជាដើម៕