បុរសម្នាក់ត្រួវបានគេវាស់លិង្គក្នុងតុលាការប្រទេសនូវែលសេឡង់ កាលពីថ្ងៃអង្គារ ទី២២ ខែឧសភា បន្ទាប់ពីស្ត្រីម្នាក់បានចោទប្រកាន់គាត់ថាបានបៀតបៀនកេរ្តិ៍ខ្មាស ហើយបានអះអាងពីទំហំលិង្គ របស់គាត់ធ្វើជាភ័ស្តុតាង។
ជនជាប់ចោទឈ្មោះ ដេវីត ស្កុត (David Scott) ជាសមាជិកក្រុមប្រឹក្សាជាប់ឆ្នោតមកពីកោះកាពីទី (Kapiti) ប្រទេសខាងលើនេះបានអះអាងថា គាត់គ្មានទោសទេ ពីព្រោះកាលពីឆ្នាំមុនគាត់មិនបាន យកលិង្គរបស់គាត់ទៅញលត្រដុសខ្នងបុគ្គលិកក្រុមប្រឹក្សាស្ត្រីម្នាក់នោះឡើយ។
គេហទំព័រព័ត៌មាន the stuff.co.nz បានចុះផ្សាយថា ស្ត្រីដើមចោទបានអះអាងថា វត្ថុដែលនាង មានអារម្មណ៍ថាប៉ះខ្នងរបស់នាងគឺមានប្រវែងចន្លោះពី ១០ ទៅ ១២ សង់ទីម៉ែត្រ។
ដោយសារតែនាងអះអាងបែបនេះ ចៅក្រម ភីតធ័រ ហប់ស៍ (Peter Hobbs) បានអនុញ្ញាតឱ្យ វេជ្ជបណ្ឌិតនាំចុងចោទវ័យ ៧២ ឆ្នាំរូបនេះទៅវាស់លិង្គដោយប្រើបន្ទាត់ឈើក្នុងបន្ទប់ឃុំខ្លួនរបស់តុលាការ។
មេធាវីការពារក្តីលោក ដេវីត ស្កុត បានទាញទឡ្ហីករណ៍ថា តាមពិតកាបូបលុយរបស់ចុងចោទទេ ដែលបានប៉ះខ្នងដើមចោទដោយចៃដន្យ នៅពេលគាត់ដើរហួសនាង។
ប៉ុន្តែដើមចោទបានអះអាងថា វត្ថុដែលប៉ះខ្នងនាងមិនអាចជាកាបូបលុយ ទូរស័ព្ទ ឬអ្វីផ្សេងឡើយ ក្រៅពីលិង្គរបស់បុរស។ ទោះជាយ៉ាងណា លទ្ធផលមិនទាន់ដឹងយ៉ាងណាទេ ពីព្រោះសវនាការនេះ កំពុងបន្ត៕
ប្រភព៖ rasmeinews.com