ចំពោះអ្នកដែលមិនចូលចិត្តស្តាប់ចម្រៀង ចាប់ពីថ្ងៃនេះទៅ អ្នកគួរតែចូលចិត្តស្តាប់ ព្រោះវាល្អចំពោះសុខភាពអ្នកណាស់។ ដូចនេះតើវាល្អចំពោះសុខភាពអ្នកដូចម្តេចខ្លះទៅ?
កាត់បន្ថយសម្ពាធអារម្មណ៍អ្នក
នៅពេលដែលអ្នកមានអារម្មណ៍តានតឹង ហើយភ័យ នោះបេះដូងអ្នកនឹងលោតញាប់ ដូចនេះអ្នកអាចស្តាប់ចម្រៀងបាន នោះវានឹងកាត់បន្ថយមិនឱ្យបេះដូងអ្នកលោតញាប់នោះទេ ហើយមានការស្រាវជ្រាវមួយបញ្ជាក់ថា នៅមុនពេលដែលអ្នកចូលបន្ទប់វះកាត់ អ្នកអាចស្តាប់ចម្រៀនបាន វានឹងជួយអ្នកកាត់បន្ថយអារម្មណ៍ដែលភ័យបាន វាប្រសើរជាងការលេបថ្នាំទៀតផង។
កាត់បន្ថយភាពឈឺចុកចាប់
អ្នកស្រាវជ្រាវបានបែងចែកមនុស្ស៦០នាក់ជាពីក្រុម មួយក្រុមស្តាប់ចម្រៀងមុនចូលបន្ទប់វះកាត់ ឯមួយក្រុមទៀតចូលបន្ទប់វះកាត់ធម្មតា ដោយមិនស្តាប់ចម្រៀងឡើយ ហើយក្រោយពេលដែលវះកាត់រួច អ្នកជំងឺដែលស្តាប់ចម្រៀងមុនចូលបន្ទប់វះកាត់ពុំមានអាការៈឈឺមុខរបួសខ្លាំងឡើយ។
ជំនួយដល់ការចងចាំរបស់អ្នក
អ្នកអាចស្តាប់ចម្រៀងនៅពេលដែលអ្នកទំនេរបាន ព្រោះវាអាចជួយឱ្យខួរក្បាលអ្នកមានការចងចាំល្អ ហើយតាមអ្នកស្រាវជ្រាវបានឱ្យដឹងថា អ្នកដែលមានជំងឺដាច់សរសៃឈាមមួយចំនួនក្រោយពេលដែលស្តាប់ចម្រៀងរួច ចំណាំអក្សរ និងមានអារម្មណ៍មូលជាងអ្នកជំងឺដែលមិនស្តាប់។
អ្នកកំដរពេលហាត់ប្រាណ
នៅពេលដែលអ្នកហាត់ប្រាណបណ្តើរ រួចស្តាប់ចម្រៀងបណ្តើរ វានឹងអាចពន្យារពេលហាត់ប្រាណរបស់អ្នកបានយូរ ថែមទាំងអាចជួយអ្នកឱ្យមានអារម្មណ៍ស្រស់ស្រាយ កាត់បន្ថយសម្ពាធ និងធ្វើឱ្យអ្នកមានអារម្មណ៍បំពេញការងារបានល្អទៀតផងក្រោយពេលដែលហាត់ប្រាណរួច៕