មុនឡើងក្រហមពេញមុខ? រូបមន្តធម្មជាតិ ៥នេះជួយបាន

មុនប្រែជាពណ៌ក្រហមបណ្ដាលមកពីប្រព័ន្ធភាពស៊ាំរាងកាយកំពុងព្យាយាមប្រយុទ្ធប្រឆាំងនឹងការឆ្លងមេរោគ។ ការញេចមុន គឺមិនល្អឡើយ ខណៈដែលវាមានតែធ្វើឱ្យបញ្ហាកាន់តែអាក្រក់ឡើងប៉ុណ្ណោះ។ ទោះជាយ៉ាងណាកុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីគន្លឹះងាយៗជួយដោះស្រាយបញ្ហាមុនឡើងក្រហម ៖

១. ដុំទឹកកក

អ្វីដែលអ្នកត្រូវធ្វើ គឺគ្រាន់តែរុំដុំទឹកកកក្នុងក្រណាត់ស្អាតមួយមុននឹងដាក់ស្អំសង្កត់ថ្នមៗលើមុន។

២. ថ្នាំគ្រាប់អាស្ពីរីន

អ្វីដែលអ្នកត្រូវធ្វើ គឺគ្រាន់តែដំអាស្ពីរីន ១ ឬ ២ គ្រាប់ឱ្យម៉ដ្ឋ រួចបន្ថែមទឹកប៉ុន្មានដំណក់ចូលឱ្យក្លាយជាល្បាយខាប់ៗ។ បន្ទាប់មកលាបល្បាយលើមុនដែលឡើងក្រហម។ រងចាំបាច់សម្រាប់រយៈពេលពី ១៥ ទៅ ២០ នាទី សឹមលាងសម្អាតចេញជាមួយទឹកត្រជាក់។

៣. ម្សៅ Baking soda

អ្នកអាចលាយម្សៅ Baking soda ១ ស្លាបព្រាកាហ្វេជាមួយទឹកធម្មតាពី ២ ទៅ ៣ ដំណក់។ កូរឱ្យសព្វ សឹមលាបល្បាយលើមុនដែលក្រហម។ ទុកចោលសម្រាប់រយៈពេល ៣០ នាទី សឹមលាងសម្អាតចេញជាមួយទឹកត្រជាក់។

៤. តែបៃតង

ឆុងតែបៃតង ១ ពែង និងទុកឱ្យត្រជាក់សិន សឹមប្រើប្រាស់ដុំសំឡីជ្រលក់ក្នុងទឹកតែបៃតង រួចលាបលើមុន។ ទុកចោលរហូតដល់ស្ងួត សឹមលាងសម្អាតចេញជាមួយទឹកត្រជាក់។

៥. បន្ទះត្រសក់

គ្រាន់តែចិតត្រសក់ជាបន្ទះស្ដើងៗ រួចទុកក្នុងទូរទឹកកកសម្រាប់រយៈពេលប៉ុន្មាននាទីឱ្យត្រជាក់ សឹមប្រើបិតលើមុនដែលឡើងក្រហម។ ទុកចោលសម្រាបរយៈពេលពី ១៥ ទៅ ២០ នាទី ឬរហូតត្រសក់លែងត្រជាក់។ លាងសម្អាតមុខចេញជាមួយទឹកធម្មតា៕