ចាប់តាំងពីខែមករាមក មានប្រធានបទមួយបន្តទទួលបានការជជែកវែកញែកច្រើននៅលើវិបសាយពិភាក្សារបស់ Apple។ ប្រធានបទគឺទាក់ទងនឹងការប្រេះកញ្ចក់ការពារឡេនកាមេរ៉ាភ្លោះរបស់ iPhone X។
iPhone X មានផ្នែកខាងក្រោយផលិតពីកញ្ចក់ ពេលដែលធ្លាក់ប្រាកដជាមានបែកប្រេះ។ ប៉ុន្តែអ្នកប្រើ iPhone X មួយចំនួនដែលជួបបញ្ហាប្រេះឡេនកញ្ចក់ឡេននេះ បានបញ្ជាក់ថាទូរសព្ទរបស់ពួកគេមិនធ្លាប់ធ្លាក់នោះទេ។
មានការលើកឡើងផ្សេងៗគ្នាពីមូលហេតុដែលនាំឲ្យមានការប្រេះនេះ ដោយមានខ្លះថាមកពីបញ្ហាអាកាសធាតុ និង ខ្លះទៀតថាមកពីចន្លោះប្រហោងនៃការផលិត។ ម្ចាស់ iPhone X មួយរូបបានឲ្យដឹងថាហាង Apple ទារថ្លៃ ៥៤៩ ដុល្លារដើម្បីជួសជុលស្នាមប្រេះមួយនេះ ព្រោះជាបញ្ហាដែលមិនស្ថិតនៅក្នុងកញ្ចប់ AppleCare+ របស់ Apple។
មកទល់ពេលនេះមិនទាន់ឃើញមានការឆ្លើយតបពី Apple នៅឡើយទេ៕
ប្រភព៖ sabay.com.kh
