តើអ្នកធ្លាប់មានអារម្មណ៍ត្រូវការគេងទៀត ទោះបីជាទើបតែក្រោកបន្ទាប់ពីគេងរាប់ម៉ោងហើយដែរទេ? វាអាចបណ្ដាលមកពីកត្តាស្មានមិនដល់មួយចំនួន។ ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុនៃការគេងបានច្រើនម៉ោងដែរ ប៉ុន្តែមិនឆ្អែតស្កប់ ៖
១. ជំងឺធ្លាក់ទឹកចិត្ត
ផលវិបាកមួយនៃជំងឺធ្លាក់ទឹកចិត្ត គឺការគេងមិនលក់ ឬគេងលក់មិនស្កប់។ ហើយនៅពេលអ្នកមិនបានគេងសោះនោះ អ្នកនឹងមានអារម្មណ៍មិនស្រួលដែលអាចធ្វើឲ្យបញ្ហានៃការធ្លាក់ទឹកចិត្តកាន់តែធ្ងន់ធ្ងរឡើង។ លើសពីនេះទៅទៀត នៅពេលអ្នកគេងមិនបានគ្រប់នោះអ្នកប្រាកដជាងាយនឹងមានអារម្មណ៍សោកសៅមិនសប្បាយចិត្តនៅថ្ងៃបន្ទាប់។ ធ្លាប់ដឹងទេថាអ្នកដែលចូលគេងយប់ជ្រៅច្រើនតែមានគំនិត ឬការគិតអវិជ្ជមាន? ហើយការគិតបែបនេះច្រើន គឺតែងផ្សារភ្ជាប់នឹងការវិវត្តន៍ទៅជាជំងឺធ្លាក់ទឹកចិត្ត។
២. ជំងឺថប់បារម្ភ
គ្មានជំងឺផ្លូវចិត្តណាដែលអាចធ្វើឱ្យអ្នកពិបាកនឹងមានអារម្មណ៍ស្រស់ស្រាយ ឬមានថាមពលក្រោយគេងបានច្រើនជាងជំងឺថប់បារម្ភឡើយ។ បន្ថែមពីនេះការគេងមិនលក់ក៏ជារោគសញ្ញាទូទៅបំផុតមួយនៃជំងឺថប់បារម្ភផងដែរ។ ទោះជាយ៉ាងណាអ្នកគួរព្យាយាមយកឈ្នះលើបញ្ហានេះឱ្យបាន។ កង្វះនៃការគេងអាចបង្កើនកម្រិតនៃអ័រម៉ូនស្ត្រេសដែលធ្វើឱ្យស្ថានភាពនៃជំងឺកាន់តែយ៉ាប់ឡើងគួរឱ្យព្រួយបារម្ភ។
៣. ស្ត្រេស
ភាពស្ត្រេស ឬតានតឹងក្នុងអារម្មណ៍ខ្លាំងអាចជាមូលហេតុចម្បងបំផុតមួយនៃបញ្ហាធ្ងន់ធ្ងរផ្សេងៗពាក់ព័ន្ធជាមួយការគេង។ អ្នកអាចនឹងជួបប្រទះបញ្ហានៃជំងឺគេងមិនលក់ ឬគេងមិនបានស្កប់សោះ ប្រសិនបើអ្នកស្ត្រេសជាប់ជាប្រចាំរយៈពេលយូរ។ អ្វីដែលគួរអោយព្រួយបារម្ភថែមទៀតនោះ គឺការគេងមិនស្កប់គ្រប់គ្រាន់ជះឥទ្ធិពលមិនល្អជាច្រើនចំពោះសុខភាព។ នៅពេលថ្នាំគេងលក់មិនអាចជួយអ្វីអ្នកបានទៀតនោះ វាដល់ពេលដែលគួរប្រញាប់ទៅជួបគ្រូពេទ្យហើយ។
៤. ការឈឺចាប់រ៉ាំរ៉ៃ
ក្រៅពីរបួសរាងកាយ អាការៈឈឺខ្នង និងជំងឺរលាកសន្លាក់ នៅមានកត្តាច្រើនណាស់ដែលនាំឱ្យការឈឺចាប់រ៉ាំរ៉ៃកើតឡើង រួមបញ្ចូលទាំងជំងឺផ្លូវចិត្តដូចជាថប់បារម្ភ និងធ្លាក់ទឹកចិត្ត។ សម្រាប់អ្នកដែលមានបញ្ហាឈឺចាប់រ៉ាំរ៉ៃ គឺមិនងាយនឹងគេងលក់បានស្កប់ឡើយ ជាពិសេសប្រសិនបើអាការៈនេះធ្វើទុក្ខខ្លាំងនៅពេលយប់។
៥. គេងស្រមុក ឬគេងមិនដកដង្ហើម
អាការៈគេងស្រមុកខ្លាំង ឬគេងមិនដកដង្ហើម (sleep apnea) ដែលអាចនាំឱ្យអ្នកអាចភ្ញាក់ដឹងខ្លួនច្រើនដងក្នុងមួយយប់ៗ។ ជួនកាលវាផ្សារភ្ជាប់នឹងទម្ងន់របស់អ្នក ប៉ុន្តែមិនមែនរហូតនោះទេ។ អាឡែកស៊ីច្រមុះនិងជំងឺហឺតក៏អាចបង្កបញ្ហាដល់ការដកដង្ហើមគួរឱ្យកត់សម្គាល់ផងដែរ។ ដូច្នេះចូរកុំស្ទាក់ស្ទើនឹងជួបពិគ្រោះជាមួយគ្រូពេទ្យជំនាញដើម្បីទទួលបានការធ្វើរោគវិនិច្ឆ័យនិងការព្យាបាលត្រឹមត្រូវ។
សម្គាល់! កុំស្ទាក់ស្ទើនឹងទៅជួបពិគ្រោះជាមួយគ្រូពេទ្យជំនាញ ប្រសិនបើអាការៈនៃការគេងមិនបានស្កប់ ឬពិបាកគេងលក់កើតមានជាប់សឹងតែរាល់យប់៕