តើអ្នករាងដូចជាអស់កម្លាំង ហើយហាក់ដូចជាមានកង្វល់និងមានស្ត្រេស មែនទេ? ទាំងអស់នេះអាចជាលទ្ធផលនៃការគេងមិនបានគ្រប់គ្រាន់ហើយ។ ការគេងលក់ល្អអាចជួយធ្វើឱ្យអ្នកមានអារម្មណ៍ជ្រះថ្លា មានខួរក្បាលស្រឡះ និងដំណើរការមេតាបូលីសល្អប្រសើរ។
បើតាមការសិក្សាមួយនៅក្នុងឆ្នាំ២០០៩ ដែលដឹកនាំធ្វើដោយវិទ្យាស្ថាន Institut du Sommeil et de la Vigilance មនុស្សពេញវ័យអាយុពី២៥ដល់៣៥ឆ្នាំដេកជាមធ្យម៧ទៅ៨ម៉ោងក្នុង១យប់ៗ ក៏ប៉ុន្តែមានជនជាតិបារាំងប្រហែលជា៣០%ដែលគេងបានតិចជាង៧ម៉ោង។
ចង់គេងឱ្យបានល្អមិនមែនជារឿងអ្វីពិបាកទេ គឺអ្នកគ្រាន់តែត្រូវចូលគេងឱ្យបានទៀងទាត់ម៉ោង តែប៉ុណ្ណោះបានហើយ។
តើម៉ោងពេលចូលគេងវាមានការប៉ះពាល់ដល់គុណភាពនៃការគេងយ៉ាងដូចម្តេច?
ពួកអ្នកស្រាវជ្រាវរបស់សាកលវិទ្យាល័យវ៉ាស៊ីងតោនបានរកឃើញថា ម៉ោងពេលចូលគេងក៏មានសារសំខាន់ដូចជាចំនួនម៉ោងដែលគេបានគេងលក់ដូច្នោះដែរ។ បើកាលណាម៉ោងចូលគេងផ្លាស់ប្តូរចុះឡើង បើទោះជាគេគេងបានគ្រប់ចំនួនម៉ោងក៏ដោយក៏គុណភាពនៃការគេងមិនបានល្អទេ ហើយវាធ្វើឱ្យប្រព័ន្ធអ៊ីមុយនីតេចុះខ្សោយថែមទៀត។ ហើយការផ្លាស់ប្តូរម៉ោងចូលគេងញឹកញាប់អាចបង្កគ្រោះថ្នាក់ដល់សុខភាពបាន។
ចង្វាក់គេង-ភ្ញាក់ (rythme circadian du sommeil)
ចង្វាក់គេង-ភ្ញាក់នេះប្រៀបបានដូចជានាលិកាជីវសាស្ត្រមួយ ដែលមានចំពោះគ្រប់មនុស្សនិងសត្វ ហើយមានរយៈពេលប្រហាក់ប្រហែលនឹង២៤ម៉ោង។ គឺជាចង្វាក់ដែលបែងចែកថាពេលណាជាពេលគេង និងពេលណាជាពេលភ្ញាក់រឮកដឹងខ្លួន។ ចំពោះមនុស្សយើង ចង្វាក់គេង-ភ្ញាក់នេះមានតួនាទីសំខាន់ខ្លាំងណាស់ចំពោះយន្តការជាច្រើន ដូចជាចរន្តឈាមរត់ ការដុះសក់ ពេលគេងនិងពេលភ្ញាក់ ហើយនិងសីតុណ្ហភាពរាងកាយជាដើម។
ចង្វាក់គេង-ភ្ញាក់ដែលស្ថេរមិនប្រែប្រួលធ្វើឱ្យសរីរាង្គមានដំណើរការល្អដូចប្រក្រតី ម្ល៉ោះហើយសុខភាពក៏ល្អដែរ។ ក៏ប៉ុន្តែបើសិនជាចង្វាក់គេង-ភ្ញាក់នេះត្រូវបានធ្វើឱ្យច្របូកច្របល់ ដោយការផ្លាស់ប្តូរម៉ោងចូលគេង (ដោយការធ្វើការពេលយប់ ឬធ្វើដំណើរតាមយន្តហោះទៅទីកន្លែងផ្សេង) នោះវានឹងធ្វើឱ្យបាត់លំនឹងនៃការគេង ដែលធ្វើឱ្យសុខភាពមិនល្អទេ។
តើធ្វើយ៉ាងណាដើម្បីឱ្យបានគេងលក់ល្អ?
- ទី១ គឺត្រូវចូលគេងឱ្យទៀងទាត់ពេលវេលា គឺចូលគេងនៅម៉ោងដដែល រួចភ្ញាក់មកវិញនៅម៉ោងដដែលដែរ ។
- ទី២ គឺត្រូវគេងឱ្យបាន៧ម៉ោងយ៉ាងតិចក្នុង១យប់ៗ។
ម្យ៉ាងទៀត អ្នកត្រូវទុកពេល១ម៉ោងក្រោយពីងើបពីគេងដើម្បីឱ្យស្វាងងងុយនិងរៀបចំខ្លួនមុននឹងធ្វើអ្វីមួយ និង១ម៉ោងទៀតមុននឹងគេងលក់ ដូច្នេះត្រូវទម្លាប់ចូលគេងឱ្យបាន៩ម៉ោងមុន។
ឧទាហរណ៍ថាបើអ្នកត្រូវចេញទៅធ្វើការនៅម៉ោង៧ព្រឹកស្អែក អ្នកត្រូវចូលគេងនៅម៉ោង១០យប់នេះ (៩ម៉ោងមុន)៖ ដោយគិតថាអ្នកអាចត្រូវការពេល១ម៉ោងដើម្បីឱ្យគេងលក់ រួចហើយគេងចំនួន៧ម៉ោង និងត្រូវការពេលចំនួន១ម៉ោងទៀតដើម្បីរៀបចំខ្លួនមុននឹងចេញទៅធ្វើការ ។ បើទម្លាប់បែបនេះឱ្យបានជាប់ ដល់យូរៗទៅវាទៅជាធម្មតាមិនចាំបាច់ខំប្រឹងទេ ហើយអ្នកនឹងសង្កេតឃើញថាសុខភាពរបស់អ្នកនឹងបានកាន់តែប្រសើរឡើងជាមិនខានទេ៕
