នរណាៗក៏ត្រូវការជំនួយពីខាងក្រៅខ្លួនដែរនៅក្នុងមួយជីវិត ដើម្បីដោះស្រាយបញ្ហាទំនាក់ទំនង ការធ្លាក់ទឹកចិត្ត ការថប់អារម្មណ៍ ការសោកសៅ ការប្រើបំពានសារធាតុញៀន និងបញ្ហាសុខភាព។ល។ និង។ល។ គេអាចរកជំនួយពីក្រុមគ្រួសារ មិត្តភក្តិ សមាគមសង្គហសង្គ្រោះ ឬពីអ្នកប្រកបវិជ្ជាជីវៈខាងសុខភាព បាន។ ក៏ប៉ុន្តែគេក៏អាចទទួលជំនួយពីសៀវភៅ បានដែរ។ ការរកជំនួយពីសៀវភៅនេះ គេហៅថាជា”ការព្យាបាលដោយអានសៀវភៅ bibliotherapy “។
គេពិបាកខ្លាំងណាស់នឹងកំណត់ថាតើសៀវភៅមួយណាអាចជួយអ្នកណាបាន ព្រោះវាមានសៀវភៅមានរូបភាព សៀវភៅអាចចេញជាសម្លេង កំណាព្យ រឿងប្រលោមលោក សៀវភៅស្តីពីការងារ។ល។
សាស្ត្រាចារ្យពីរនាក់របស់សាកលវិទ្យាល័យ Oregon State University គឺលោក Pehrsson និងលោក McMillen មានជំនឿជឿជាក់ថាសៀវភៅពិតជាអាចជួយមនុស្សបាន ហើយបានបង្កើតគម្រោងការមួយមានឈ្មោះហៅថា”គម្រោងការព្យាបាលដោយអានសៀវភៅ the Bibliotherapy Project ” ដែលសព្វថ្ងៃនេះមានមូលដ្ឋាននៅឯសាកលវិទ្យាល័យ Central Michigan University ។ គាត់បានរៀបរាប់អំពីអត្ថប្រយោជន៍នៃការព្យាបាលដោយអានសៀវភៅដូតតទៅនេះ៖
- ជួយឱ្យគេចវេសពីបញ្ហាបានមួយរយៈ
- បង្កើនការស្គាល់ខ្លួនឯង និងការយល់ដឹងពីខ្លួនឯង
- បញ្ជាក់ច្បាស់អំពីតម្លៃរបស់មនុស្ស
- បង្កើនការឱ្យតម្លៃលើខ្លួនឯង អត្តសញ្ញាវប្បធម៌និងចក្ខុវិស័យ
- ធ្វើឱ្យមានការយល់ដឹងពីខ្លួនឯងនិងពីអ្នកដទៃ
- ធ្វើឱ្យមនុស្សយល់ថាមិនមែនមានតែគេម្នាក់ទេដែលមានបទពិសោធន៍ផ្ទាល់ខ្លួននោះ
- ធ្វើឱ្យមានផាសុកភាព សេចក្តីសង្ឃឹម និងការជឿជាក់
- កាត់បន្ថយស្ត្រេសនិងការថប់អារម្មណ៍
- ជំរុញឱ្យមានការផ្លាស់ប្តូរ
- ផ្តល់ចំណេះដឹងនិងបំណិននៅក្នុងការដឹកនាំមនុស្សឱ្យចេះសម្របខ្លួនជាមួយនឹងការលំបាក។
បើសិនជាអ្នកចង់គេចវេសពីបញ្ហាមួយរយៈកាល សូមជ្រើសរើសយកសៀវភៅមួយដែលអ្នកចង់អាន មិនចាំបាច់ជាសៀវភៅដែលត្រូវតែអាន នោះទេ។ តែបើចង់ដោះស្រាយបញ្ហាណាមួយជាក់ស្តែង នោះអ្នកអាចរកមើលសៀវភៅដែលអ្នកត្រូវការ។ សព្វថ្ងៃគេងាយនឹងរកបាននូវសៀវភៅណាមួយដែលគេត្រូវការណាស់ ព្រោះអាចរកតាមបណ្ណាល័យ បណ្ណាគារ ឬតាមអាំទែរណិតក៏បាន។
សូមសាកល្បងការអានសៀវភៅលមើល កាលណាអ្នកមានបញ្ហាខាងផ្លូវចិត្តណាមួយ។