ធ្លាប់ដឹងទេថាទម្លាប់ពេលយប់មួយចំនួនអាចបណ្ដាលឱ្យអ្នកឡើងគីឡូដែលមិនចង់បាន។ ថាតើទម្លាប់ទាំងនោះមានអ្វីខ្លះ? ថ្ងៃនេះវេបសាយសុខភាព Health.com.kh នឹងបង្ហាញអោយដឹងពីទម្លាប់ដែលអ្នកគួរបញ្ឈប់ប្រសិនបើមិនចង់លើសទម្ងន់ ៖
១. អ្នកគេងមិនបានគ្រប់គ្រាន់
ផលវិបាកដែលនាំឱ្យកើនទម្ងន់ ៖
- វាជះឥទ្ធិពលលើដំណើរការនៃការដុតរំលាយអាហារដែលធ្វើឱ្យយឺតខ្លាំងជាងមុន។
- ការគេងមិនគ្រប់អាចធ្វើឱ្យអ្នកមានអារម្មណ៍ឃ្លាន។
- វាបង្កើនកម្រិតនៃអ័រម៉ូនស្ត្រេស Cortisol។
- អ្នកធ្វើលំហាត់ប្រាណបានតិច ព្រោះមានអារម្មណ៍អស់កម្លាំងហត់។
ការណែនាំ ៖
- អ្នកចាំបាច់គួរគេងឱ្យបានយ៉ាងហោចណាស់ ៨ម៉ោងក្នុងមួយយប់។
២. អ្នកទទួលទានអាហារពេលល្ងាច ឬយប់ច្រើនពេក
ផលវិបាកដែលនាំឱ្យកើនទម្ងន់ ៖
- អ្នកញ៊ាំច្រើនពេក ឬអាហារដែលត្រូវការពេលយូរខ្លាំងដើម្បីរំលាយ។ ជាលទ្ធផលការរំលាយអាហាររបស់អ្នកនឹងយឺតជាងមុន ជាពិសេសនៅពេលយប់។
- អ្នកមានទំនោរមើលទូរទស្សន៍ខណៈពេលទទួលទានដែលអាចជាត់ទុកជាមូលហេតុមួយនាំឱ្យអ្នកញ៊ាំកាន់ច្រើន។
ការណែនាំ៖
- ជ្រើសរើសទទួលទានអាហារពេលល្ងាច ឬពេលយប់ដែលប្រើប្រាស់រយៈពេលតិចដើម្បីរំលាយអាចជាអាហារមានផ្ទុកប្រូតេអ៊ីន និងបន្លែ។
៣. អ្នកគេងភ្លាមក្រោយញ៊ាំអាហារ
ផលវិបាកដែលនាំឱ្យកើនទម្ងន់ ៖
- វាធ្វើឱ្យអ្នកប្រមូលផ្ដុំកោសិកាខ្លាញ់កាន់តែច្រើន។
- អ្នកអាចមានបញ្ហាពាក់ព័ន្ធប្រព័ន្ធរំលាយអាហារ។
ការណែនាំ៖
- យ៉ាងហោចណាស់អ្នកត្រូវរងចាំសម្រាប់រយៈពេលពី ១ម៉ោង ៣០នាទី ទៅ ២ម៉ោងសិន សឹមគេង ឬត្រូវទទួលទានអាហារមួយពេលចុងក្រោយឱ្យបានពី ១ម៉ោង ៣០នាទី ទៅ ២ម៉ោងមុនចូលគេង។
៤. អ្នកញ៊ាំអាហារចៀន ឬបំពងសម្រាប់អាហារពេលល្ងាច
ផលវិបាកដែលនាំឱ្យកើនទម្ងន់៖
- វាមានផ្ទុកកាឡូរីច្រើនពេកដែលអ្នកមិនអាចមានពេលគ្រប់គ្រាន់នឹងដុតបំផ្លាញអស់។
- កោសិកាខ្លាញ់កាន់តែកើនឡើង។
- អ្នកមិនអាចគេងបានស្រួល។
ការណែនាំ៖
- អ្នកគួរជ្រើសរើសអាហារដុត, អាំង ឬចំហុយវិញនៅពេលយប់។
៥. អ្នកទទួលទានអាហារហឹរសម្រាប់អាហារពេលយប់ ឬល្ងាច
ផលវិបាកដែលនាំឱ្យកើនទម្ងន់៖
- គ្រឿងទេសហឹរនិងអាហារហឹរផ្សេងៗអាចបណ្ដាលឱ្យពិបាករំលាយអាហារ។
- អ្នកមិនអាចគេងបានស្កប់។
- នៅពេលយប់ ខណៈដែលអ្នកត្រូវចំណាយពេលរាប់ម៉ោងដោយមិនទទួលទានអ្វីសោះ, អាហារហឹរអាចបង្កអាការៈក្រហាយទ្រូងច្រាលអាស៊ីតក្រពះ។
ការណែនាំ៖
ទោះបីជាអាហារហឹរអាចជួយពន្លឿនដល់ការដុតរំលាយអាហារក្នុងរាងកាយ ប៉ុន្តែអ្នកមិនគួរទទួលទានវានៅពេលយប់ឡើយ។
៦. អ្នកចូលចិត្តញ៊ាំបង្អែមនៅពេលយប់
ផលវិបាកដែលនាំឱ្យកើនទម្ងន់៖
- ស្ករសនិងម្សៅអាចត្រូវបានបំលែងជាកោសិកាខ្លាញ់។
- អ្នកមិនអាចដុតកាឡូរីទាំងនោះបានឡើយនៅពេលយប់។
ការណែនាំ៖
- អ្នកគួរទទួលទានផ្លែឈើជំនួសបង្អែមផ្សេងៗវិញនៅពេលយប់។
៧. អ្នករំលងមិនទទួលទានអាហារពេលល្ងាច ឬយប់
ផលវិបាកដែលនាំឱ្យកើនទម្ងន់៖
- ទម្លាប់នេះមិនជួយឱ្យអ្នកស្រកទម្ងន់បានច្រើនឡើយ ដោយសារការរំលងមិនញ៊ាំអាហារអាចពន្យឺតដំណើរការនៃការដុតរំលាយអាហារក្នុងរាងកាយ។
- វានឹងធ្វើឱ្យអ្នកមានអារម្មណ៍ឃ្លានខ្លាំងជាងមុននៅពេលបន្ទាប់។
- ការរំលងម៉ោងអាហារអាចបង្កបញ្ហាថប់បារម្ភ។
- អ្នកអាចបាត់បង់ជាលិកាសាច់ដុំ ហើយស្បែកប្រែជាយារ។
ការណែនាំ៖
- ទោះបីជាអ្នកមិនមានពេលគ្រប់គ្រាន់ដើម្បីទទួលទានអាហារមួយពេលណាក៏ដោយ ក៏យ៉ាងហោចណាស់គួរព្យាយាមញ៊ាំផ្លែឈើបន្តិចបន្តួចជំនួស។
៨. អ្នកទទួលទានគ្រឿងស្រវឹង ឬកាហ្វេអ៊ីន
ផលវិបាកដែលនាំឱ្យកើនទម្ងន់៖
- គ្រឿងស្រវឹង និងអាហារ ឬភេសជ្ជៈដែលមានផ្ទុកជាតិកាហ្វេអ៊ីនអាចជះឥទ្ធិពលគួរឱ្យបារម្ភដល់ការគេងរបស់អ្នក។
- វាមានផ្ទុកកាឡូរីច្រើន។
ការណែនាំ៖
- ជ្រើសរើសទទួលទានភេសជ្ជៈក្រឡុកបែបធម្មជាតិ ឬទឹកដោះគោក្ដៅៗជំនួសវិញ។ ទោះជាយ៉ាងណាកុំភ្លេចទទួលទានទឹកធម្មតា ១កែវមុនគេងផង៕