ការគេងមិនបានគ្រប់គ្រាន់ ឬតិចជាង៨ម៉ោងក្នុងមួយថ្ងៃ គឺពិតជាផ្តល់ផលអាក្រក់ជាច្រើនយ៉ាង ចំពោះរាងកាយរបស់អ្នក។
នៅពេលដែលរាងកាយមនុស្សយើង មិនអាចទទួលបានការសម្រាកឲ្យបានគ្រប់គ្រាន់ នោះប្រាកដណាស់ វានឹងទទួលរងគ្រោះនូវវិបត្តិសុខភាពមួយក្នុងពេលបច្ចុប្បន្ន ឬថ្ងៃក្រោយ។ ដំណើរការផ្នែកបញ្ញាស្មារតី ចំពោះការចងចាំក្នុងរយៈពេលខ្លី និងវែង គឺជាផលប៉ះពាល់ ដ៏ធ្ងន់ធ្ងរមួយ។ តើអ្នកធ្លាប់ព្យាយាមផ្តោតអារម្មណ៍ទៅលើកិច្ចការអ្វីមួយ ខណៈពេលដែលខួរក្បាលរបស់អ្នកអស់ថាមពលរលីងដែរឬទេ? ចំណុចដែលគួរឲ្យបារម្ភជាងគេនោះគឺ វិបត្តិនៃការគេងគឺមានទំនាក់ទំនងយ៉ាងខ្លាំង ទៅនឹងបញ្ហាសុខភាព ដូចជាការកើនទម្ងន់លើសកម្រិត,មានជំងឺទឹកនោមផ្អែម និងជំងឺមហារីក។
វាជាការចាំបាច់ ក្នុងការកំណត់ពីមូលហេតុដែលធ្វើឲ្យអ្នកមិនអាចគេងបានលក់ស្រួល និងវិធីដែលអ្នកធ្លាប់អនុវត្ត និងដោះស្រាយចំពោះបញ្ហានេះ ។ ជាមួយនឹងដំណោះស្រាយបែបធម្មជាតិ អ្នកអាចផឹកតែធម្មជាតិនេះជារៀងរាល់យប់ ដើម្បីជួយសម្រួលឲ្យដំណេករបស់អ្នកបានស្កប់ស្កល់ដោយសារតែឥទ្ធិពលនៃក្លិន និងរសជាតិដ៏អស្ចារ្យរបស់វា ។
វិធីបង្កើតតែចេក
ដូចដែលយើងធ្លាប់បានដឹងពីមុនមកហើយថា ផ្លែចេក ជាពិសេសគឺសម្បករបស់វា គឺមានផ្ទុកនូវបរិមាណដ៏ច្រើននៃប៉ូតាស្យូម និងម៉ាញ៉េស្យូម ។ ខណៈពេលដែលម៉ាញ៉េស្យូម ជួយបង្ការនូវការរំខានដល់ដំណេក សារជាតិទាំងពីរនេះ គឺអាចធ្វើការជាមួយគ្នាដើម្បីជួយសម្រួលសាច់ ដុំ។ ជាការពិត ម៉ាញ៉េស្យូម គឺជាសមាសធាតុរ៉ែដ៏ល្អបំផុតសម្រាប់ការបន្ធូរអារម្មណ៍។ ចូរចងចាំ នេះគឺជាប្រភេទតែធម្មជាតិ ១០០ភាគរយ ដូច្នេះហើយយើងត្រូវការយកផ្លែចេកធម្មជាតិសុទ្ធ ដែលគ្មានប្រើជាតិថ្នាំគីមី ឬថ្នាំសម្លាប់សត្វល្អិត ព្រោះវាតម្រូវឲ្យយើងធ្វើការដាំស្ងោរចេកទាំងសម្បក។ អ្នកគ្រាន់តែចំណាយពេល តិចជាង១០នាទីប៉ុណ្ណោះ ក្នុងការធ្វើវា ហើយយកវាមកទទួលទានមុនពេលចូលគេង ។
គ្រឿងផ្សំ៖
• ផ្លែចេកដែលគ្មានជាតិគីមី ១ផ្លែ
• ទឹកមួយពែង
• ម្ស៉ៅឈើអែម ( អាចជ្រើសរើសដាក់បន្ថែម)
អ្វីដែលអ្នកត្រូវធ្វើនោះ គឺគ្រាន់តែផ្នែកខាងចុងទាំងសងខាងរបស់ផ្លែចេកចេញ ហើយដាក់វាស្ងោរទាំងសម្បកឲ្យបានប្រហែលជា ១០នាទី។ ប្រើប្រដាប់ច្រោះកាកចេញ ហើយចាក់ទឹកដែលបានដាំនោះ ចូលទៅក្នុងកែវ។ អ្នកអាចរោយម្ស៉ៅឈើអែមបន្ថែម ប្រសិនបើអ្នកចង់បន្ថែមរសជាតិរបស់វា ។ ចូរផឹកវាមួយម៉ោង មុនអ្នកចូលគេងជារៀងរាល់យប់ នោះអ្នកនឹងទទួលបាននូវដំណេកស្កប់ស្កល់ជាមិនខានឡើយ៕