Join with Health.com.kh on Telegram

​តាម​ការសិក្សា​មួយ ដែល​ចុះផ្សាយ​ក្នុង​សារព័ត៌មាន Journal of Clinical Lipidology បាន​រកឃើញថា ការ​ញ៉ាំ​ផ្លែ​ប័រមួយ​ផ្លែ អាច​ថែរក្សា​សុខភាព​បេះ​ដូង​បាន​យ៉ាង​ល្អ​។ ដូច្នេះ ការ​ញ៉ាំ​ផ្លែ​ប័រ មិន​ត្រឹមតែ​ជួយ​គ្រប់គ្រង​កូ​ឡេ​ស្តេ​រ៉ុល​ទេ តែ​ក៏​ជួយ​ការពារ ឥទ្ធិពល​របស់​បេះដូង​ដែរ​។ ផ្លែ​ប័រ ផ្ទុក​ទៅដោយ​ជាតិ​ខ្លាញ់ Monounsaturated Fats (MUFAs) ខ្លាញ់​ផ្តល់​សុខភាព ជាតិ​សរសៃ និង​អង់​ទី​អុក​ស៊ីដង់​។ យ៉ាងណាមិញ ផ្លែឈើ​មួយ​នេះ មាន​លក្ខណៈសម្បត្តិ ៣ យ៉ាង ដែល​អាច​ឲ្យជួយ​បេះដូង មាន​សុខភាព​ល្អ​បាន​។

ខ្លាញ់​ផ្តល់​សុខភាព​
មូលហេតុ​ដ៏​សំខាន់ របស់​ជំងឺ​សរសៃឈាម​បេះដូង គឺជា​ការកើនឡើង​ជា​តិកូ​ឡេ​ស្តេ​រ៉ុលក្នុង​សរសៃឈាម​អាកទែ ដែល​នាំ​ឲ្យ​ស្ទះ​ដល់​សរសៃឈាម​បាន​។ យ៉ាងណាមិញ អ្នក​អាច​កាត់បន្ថយ​ការ​ប្រឈម​នេះ​បាន តាមរយៈ​ការថែរក្សា​កម្រិត​កូ​ឡេ​ស្តេ​រ៉ុល ឲ្យ​ស្ថិតក្នុងស​ភាព​ធម្មតា​។ អ្នក​គ្រាន់តែ​បង្កើន​ការ​ញ៉ាំ MUFAs និង PUFAs (Polyunsaturated Fatty Acids) ប៉ុណ្ណោះ​។ ខ្លាញ់​ផ្តល់​សុខភាព​ទាំង​នេះ មិន​ត្រឹមតែ​កាត់បន្ថយ​កូ​ឡេ​ស្តេ​រ៉ុល​សរុប និង​កូ​ឡេ​ស្តេ​រ៉ុអាក្រក់​ទេ តែ​ក៏​ជួយ​បង្កើន ចំនួន​កូ​ឡេ​ស្តេ​រ៉ុល​ល្អ បាន​បន្តិចបន្តួច​ដែរ​។

អង់​ទី​អុក​ស៊ីដង់​
ផ្លែ​ប័រ មាន​វីតាមីន C, E និង K ដែល​ជា​ប្រភេទ​វីតាមីន រលាយ​ក្នុង​ខ្លាញ់ និង​ជា​អង់​ទី​អុក​ស៊ីដង់ដ៏​អស្ចារ្យ ដូច្នេះ វា​នឹង​ជួយ​អ្នក​គ្រប់គ្រង កូ​ឡេ​ស្តេ​រ៉ុល​បាន​យ៉ាង​ល្អ​។ អង់​ទី​អុក​ស៊ីដង់ ជួយ​ទប់ស្កាត់​ការធ្វើ​អុកស៊ីតកម្ម​របស់កូ​ឡេ​ស្តេ​រ៉ុល​អាក្រក់ ដូច្នេះ វា​នឹង​មិន​អាច​បង្ក​ជា កំណក​ក្នុង​សរសៃឈាម បង្ក​ជា​ជំងឺ​បេះដូង​ទៀតឡើយ​។

ជាតិ​សរសៃ​
របប​អាហារ​សម្បូរ​ជាតិ​សរសៃ មិន​ត្រឹមតែ​ជួយ​ពង្រឹង​ដល់​សុខភាព នៃ​ការរំលាយ​អាហារ​ទេ តែ​ក៏​ជួយ​ថែរក្សា​កូ​ឡេ​ស្តេ​រ៉ុល ឲ្យនៅ​ធម្មតា​ដែរ​។ ផ្លែ​ប័រ មាន​ជាតិ​សរសៃ​រលាយ ដែល​អាច​ជួយ​បឺត​ស្រូប​ទឹកប្រមាត់ និង​បញ្ចេញ​ចោល​តាម​លាមក​។ ដើម្បី​ដោះស្រាយ នឹង​ការបាត់បង់​ទឹក​ប្រមាត់ ថ្លើម​នឹង​ចាប់ផ្តើម​សំយោគ​ទឹកប្រមាត់​បន្ថែមទៀត ដែល​ត្រូវ​ការកូ​ឡេ​ស្តេ​រ៉ុល​មក​ផលិត ដូច្នេះ វា​នឹង​កាត់បន្ថយ​កូ​ឡេ​ស្តេ​រ៉ុល​អាក្រក់ ចេញពី​ក្នុង​ឈាម​ថែមទៀត​៕