Join with Health.com.kh on Telegram

ភាគច្រើននៃពួកយើងប្រហែលជាមិនធ្លាប់ដឹងទេថាការកោស ឬដុសសម្អាតលើអណ្ដាតសំខាន់ខ្លាំងប៉ុណ្ណា។ ថាតើទម្លាប់នេះអាចផ្ដល់អត្ថប្រយោជន៍អ្វីខ្លះ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីមូលហេតុដែលអ្នកចាំបាច់គួរសម្អាតអណ្ដាតជាប្រចាំ ៖

១. ជួយឱ្យខ្យល់ដង្ហើមមានលក្ខណៈប្រសើរឡើងជាងមុន

កំទេចកំទីអាហារ, បាក់តេរី និងសូម្បីតែកោសិកាងាប់ៗអាចប្រមូលផ្ដុំគ្នាពេញលើអណ្ដាតពីមួយពេលទៅមួយពេលដែលបង្កជាបញ្ហាធុំក្លិនមាត់ ឬក្លិនខ្យល់ដង្ហើមមិនល្អ។ ទោះជាយ៉ាងណាការកោស ឬដុសសម្អាតអណ្ដាតជាប្រចាំអាចជួយទប់ស្កាត់បញ្ហានេះគួរឱ្យកត់សម្គាល់។ ប៉ុន្តែក្នុងករណីខ្យល់ដង្ហើមមិនល្អនៅតែមិនមានភាពប្រសើរឡើងសូម្បីតែអ្នកបានអនុវត្តអនាម័យមាត់ធ្មេញជាប្រចាំហើយនោះ ចូរកុំស្ទាក់ស្ទើនឹងជួបពិគ្រោះជាមួយគ្រពេទ្យជំនាញ ខណៈដែលវាអាចជាអាការៈមួយនៃបញ្ហាសុខភាព។

២. ទប់ស្កាត់ការឆ្លងមេរោគក្នុងមាត់

ការសិក្សាស្រាវជ្រាវជាច្រើនបានបង្ហាញថាការកោស ឬដុសសម្អាតអណ្ដាតអាចជួយកាត់បន្ថយកម្រិតនៃបាក់តេរីគ្រោះថ្នាក់ mutans streptococci ដែលបង្កបញ្ហាពុកធ្មេញបានយ៉ាងប្រសើរ។ អណ្ដាតជាផ្នែកមួយក្នុងមាត់ដែលមានផ្ទុក ឬជាប់បាក់តេរីច្រើនជាងគេ ដូច្នេះហើយទើបការកោស ឬដុសសម្អាតវាឱ្យបានត្រឹមត្រូវជាប្រចាំ គឺសំខាន់ណាស់សម្រាប់រក្សាសុខភាពមាត់ធ្មេញ។

៣. ជួយឱ្យអ្នកដឹងរសជាតិអាហារបានប្រសើរជាងមុន

ការសិក្សាស្រាវជ្រាវមួយបានឱ្យដឹងថាការសម្អាតអណ្ដាលអាចជួយឱ្យការដឹងរសជាតិមានលក្ខណៈប្រសើរឡើងជាងមុន។ អណ្ដាត គឺត្រូវបានគ្របដណ្ដប់ដោយផ្នែកទទួលដឹងរសជាតិហៅថា papillae។ នៅពេល papillae ត្រូវបានគ្រប់ដណ្ដប់ដោយកំណកនៃកំទេចកំទីអាហារ, កោសិកាងាប់ៗ និងបាក់តេរីច្រើននោះការដឹងរសជាតិរបស់អ្នកនឹងប្រែជាមិនល្អ៕