យោងទៅតាមទ្រឹស្តី បាតជើងរបស់យើង ដំណាងឲ្យសរីរាង្គ ជាច្រើនក្នុងរាងកាយ ហើយការម៉ាស្សាបាតជើង ក៏អាចផ្តល់ជាអត្ថប្រយោជន៍ ចំពោះសុខភាពច្រើនណាស់ដែរ។
គេងលក់ស្រួល
តើអ្នកកំពុងតែពិបាកគេងដែរទេ? ដូច្នេះ អ្នកគ្រាន់តែធ្វើការម៉ាស្សាបាតជើងធម្មតាៗ ក៏អាចជួយបំបាត់ អាការៈគេងមិនលក់បានដែរ។ អ្នកគ្រាន់តែអង្គុយចុះ ហើយលើកជើងម្ខាងដាក់លើភ្លៅ បន្ទាប់មក ប្រើមេដៃសង្កត់ នៅពីក្រោមម្រាមមេជើង យ៉ាងហោចណាស់មួយ និងធ្វើបែបនេះ នៅម្រាមផ្សេងៗទៀតផង។ អ្នកក៏អាចបន្តក់ប្រេងដូង ឬប្រេងអូលីវ នៅបាតជើង ដើម្បីម៉ាស្សាបានដែរ។
បន្ថយស្ត្រេស
បើសិនជាអ្នក កំពុងតែមានបញ្ហាតានតឹង ក្នុងអារម្មណ៍ពេញមួយថ្ងៃ ហើយចង់បន្ធូរអារម្មណ៍វិញនោះ ចូរសាកល្បង ធ្វើការម៉ាស្សាបាតជើងទៅ។ ចូរអង្គុយចុះ ហើយលើកជើងម្ខាង ដាក់លើភ្លៅម្ខាងទៀត ហើយយកប្រេង ចាក់លើបាតដៃទាំងសងខាង រួចម៉ាស្សាលើបាតជើងចំនួន ៥ នាទីទៅ។
បំបាត់ការនឿយហត់របស់បាតជើង
បាតជើង គឺជាកន្លែងដែលរងសម្ពាធជាប់មួយ ដោយសារតែវាស្ថិតនៅក្រោម សកម្មភាពទាំងអស់ដែលជើង បានធ្វើពេញមួយថ្ងៃ។ ដូច្នេះ អ្នកគួរតែផ្តល់ការម៉ាស្សា ដើម្បីបន្ធូរភាពតានតឹង របស់វាផងទៅ។
បំបាត់ការឈឺក និងខ្នង
អ្នកជំនាញខាងម៉ាស្សាបាតជើងនិយាយថា ការម៉ាស្សាម្រាមមេជើងតិចបំផុត ៥ នាទី អាចផ្តល់ការបំបាត់អាការៈឈឺកញ្ចឹងកបាន។ អ្នកក៏ប្រហែលជាបំបាត់ អាការៈឈឺខ្នងបានដែរ តាមរយៈការប្រើម្រាមមេដៃ ម៉ាស្សានៅត្រង់បន្ទាត់ ពីម្រាមមេជើងដល់កែងជើង។
អារម្មណ៍កាន់តែល្អ
តើអ្នកចង់បាន អារម្មណ៍សុខស្រួលដែរទេ? អ្នកអាចនឹងទទួលបានអារម្មណ៍នេះ តាមរយៈការសង្កត់ម្រាមដៃ នៅខាងក្រោមចំណុចកណ្តាល នៃបាតមេជើងរយៈពេលមួយនាទី ហើយចាំទៅសង្កត់នៅម្រាមមេជើងមួយទៀត។ ចូរធ្វើបែបនេះ ២ ទៅ ៣ ដងក្នុងមួយថ្ងៃ ដើម្បីអាចបំបាត់ អាការៈបាក់ទឹកចិត្តបាន។
ពង្រឹងដល់របត់ឈាមរត់
វិធីសាស្ត្រដ៏មានប្រសិទ្ធភាពបំផុត ក្នុងការបង្កើនល្បឿននៃការធូរស្រាលឡើងវិញ ក្រោយពីអស់កម្លាំងពេញមួយថ្ងៃនោះ គឺការម៉ាស្សាបាតជើងតែម្តង។ ការម៉ាស្សាជាមួយប្រេង និងការលុញបាតជើងជាមួយនឹងបាល់ ត្រង់បាតកែងជើង សុទ្ធតែជារឿង មានប្រយោជន៍ទាំងអស់។ អ្នកគួរតែធ្វើបែបនេះច្រើនដង ក្នុងរយៈពេលពីរបីនាទី។
បញ្ចុះសម្ពាធឈាម
ពិតណាស់ ការម៉ាស្សាបាតជើង អាចបញ្ចុះសម្ពាធឈាម មនុស្សយើងបាន។ ចូរដកដង្ហើមជ្រៅៗ ហើយប្រើម្រាមមេដៃសង្កត់ឲ្យខ្លាំង នៅត្រង់កន្លែងប្រហោងនៃបាតជើង ហើយដកវិញ ជាមួយនឹងការដកដង្ហើមចេញដែរ៕