ភាគច្រើន បញ្ហាក្បាច់កាច់ជើង ឬរមួលក្រពើ គឺកើតឡើងដោយខ្លួនឯង ហើយក៏ពិបាកនឹង គ្រប់គ្រងវាផងដែរ។ ជួនកាល វាអាចកើតឡើង ពេលកំពុងតែដើរតាមផ្លូវ គេង ឬអង្គុយក៏មានដែរ។
បញ្ហាមួយនេះ ភាគច្រើន គឺកើតឡើងភ្លាមៗ និងធ្ងន់ធ្ងរតែម្តង។ យើងក៏ធ្លាប់ដឹងហើយថា មូលហេតុរបស់វា គឺដោយសារតែការអស់កម្លាំងរបស់សាច់ដុំ ជំងឺទឹកនោមផ្អែម ខ្សោះជាតិទឹក អតុល្យភាពអេឡិចត្រូលីត្រក្នុងខ្លួន បញ្ហាសរសៃប្រសាទ ការប្រើថ្នាំ និងមានផ្ទៃពោះជាដើម។
ប៉ុន្តែ មានមធ្យោបាយច្រើនណាស់ ដែលអ្នកអាចដោះស្រាយ បញ្ហាក្តាមកាច់ជើង និងរមួលក្រពើនេះបានលឿន និងមានប្រសិទ្ធភាពដូចជា ៖
ស្អំទឹកក្តៅ ឬត្រជាក់
ការឈ្លីដុំទឹកកក ឬថង់ទឹកក្តៅ នៅកន្លែងដែលរមួលក្រពើ នឹងជួយបំបាត់ការរលាក និងបន្ធូរភាពតឹង របស់សាច់ដុំបានដែរ។ ភាគច្រើន ការប្រើវិធីនេះឃើញថា មានប្រសិទ្ធភាព ក្នុងរយៈពេលតែ ២ ទៅ ៣នាទីប៉ុណ្ណោះ។ ប៉ុន្តែ យកល្អ គួរតែធ្វើឲ្យបាន ១០ នាទីអីទៅ។
ញ៉ាំទឹកឲ្យបានច្រើន
គ្រូពេទ្យនិយាយថា អ្នកគួរតែញ៉ាំទឹកពី ៨ ទៅ១០ កែវ ក្នុងមួយថ្ងៃ ដើម្បីជំរុញឲ្យសាច់ដុំ ធ្វើការបានកាន់តែល្អ។
ពត់ពែនខ្លួន
ការហាត់ប្រាណ ដោយពុតពែនខ្លួន អាចជួយបានច្រើន នៅពេលដែលរមួលក្រពើជើង។ អ្នកអាចធ្វើវាដោយអង្គុយលើដី សណ្តូកជើងទៅមុខឲ្យត្រង់។
ញ៉ាំជាតិម៉ាញ៉េស្យូម ឲ្យបានគ្រប់គ្រាន់
ក្រៅពីផ្លែចេក អ្នកក៏អាចទទួលជាតិម៉ាញ៉េស្យូមបានច្រើនដែរ ជាពិសេសពីបន្លែពណ៌បៃតង សណ្តែក ត្រី គ្រាប់ធញ្ញជាតិ សូកូឡាខ្មៅ និងផ្លែប័រ។
ម៉ាស្សា
សម្រាប់មនុស្សមួយចំនួន ការម៉ាស្សាប្រអប់ជើង អាចជាវិធីព្យាបាលដ៏លឿនបំផុត។ អ្នកគួរតែសង្កត់ម្រាមដៃ ទៅលើតំបន់ ដែលកំពុងតែរមួលក្រពើនោះ៕