Join with Health.com.kh on Telegram

ទោះបីជាសាច់មានផ្ទុកនូវសារធាតុចិញ្ចឹមជាច្រើនក៏ដោយ ក៏មិនមែនមានន័យថា វាអាចផ្គត់ផ្គង់នូវសារធាតុចិញ្ចឹមគ្រប់ប្រភេទពេញលេញដែលរាងកាយត្រូវការចាំបាច់រៀងរាល់ថ្ងៃបានដែរ។ អ្នកគួរចាំថារបបអាហារដែលផ្សំឡើងពីប្រភេទនៃអាហារខុសៗគ្នាទើបអាចផ្ដល់នូវសារធាតុចិញ្ចឹមល្អៗច្រើនប្រភេទផ្សេងៗគ្នា។ ហើយថាតើអ្នកធ្លាប់ឆ្ងល់ទេថា ការទទួលទានតែសាច់សុទ្ធជាអាហារប្រចាំថ្ងៃនឹងផ្ដល់ផលល្អ ឬអាក្រក់ចំពោះសុខភាព? ថ្ងៃវេបនេះសាយសុខភាព Health.com.kh នឹងបង្ហាញឱ្យដឹងពីអ្វីដែលកើតឡើងនៅពេលអ្នកមិនទទួលទានបន្លែផ្លែឈើសោះ ៖

១. អាចមានបញ្ហាឈាមកកក្នុងសសៃឈាម

ទំពាំងបាយជូរ, បន្លែបៃតង និងខ្ទឹមស គឺចាំបាច់ណាស់សម្រាប់រក្សាភាពរាវល្មមនៃឈាមដើម្បីចៀសផុតពីបញ្ហាឈាមកក។ គួបផ្សំជាមួយនឹងវីតាមីន C ដែលមានប្រភពពីក្នុងបន្លែផ្លែឈើនោះហានិភ័យនៃបញ្ហាឈាមខាប់ខ្លាំងនិងកកត្រូវបានកាត់បន្ថយដែលចាំបាច់សម្រាប់រក្សាសុខភាពឈាម ព្រមទាំងបេះដូង។

២. ពិបាកមើលឃើញនៅពេលយប់

ការមើលឃើញច្បាស់ល្អនៅពេលយប់ គឺចាំបាច់ណាស់ ពិសេសវាផ្ដល់សុវត្ថិភាពចំពោះការបើកបរ។ ហើយដើម្បីអាចមើលឃើញវត្ថុផ្សេងៗនៅពេលយប់ ភ្នែកត្រូវការវីតាមីន A គ្រប់គ្រាន់។ វីតាមីននេះអាចត្រូវបានរកឃើញជា ២ ទម្រង់ គឺ retinol និង beta-carotene។ Retinol មានប្រភពពីថ្លើមសត្វ ខ្លាញ់ត្រី និងស៊ុត ប៉ុន្តែអាចបង្កបញ្ហានៅពេលទទួលទានច្រើនពេក។ ខណៈដែលបន្លែផ្លែឈើជាប្រភពដ៏ប្រសើរនៃ beta-carotene។ ដូច្នេះប្រសិនបើអ្នកមិនទទួលទានបន្លែផ្លែឈើសោះនោះបញ្ហាភ្នែកផ្សេងៗប្រាកដជាងាយនឹងលេចឡើង​។

៣. ស្បែកមានពណ៌មិនស្មើគ្នានិងឡើងស្នាមថ្នក់ ឬរង្វង់ខ្មៅក្រោមភ្នែក

ស្នាមរង្វង់ខ្មៅ ឬស្នាមថ្នក់ខ្មៅក្រោមភ្នែកក៏អាចបណ្ដាលមកពីកត្តាផ្សេងៗជាច្រើន រួមបញ្ចូលទាំងការថយចុះនៃលំហូរឈាមដែលនាំឱ្យលេចឡើងនូវស្នាមដូចជាំលើស្បែក។ វីតាមីន K ដែលមានផ្ទុកក្នុងប្រូខូលី ឬផ្កាខាត់ណាខៀវ, ស្ពៃពួយឡេង, ស្ពៃក្ដោប និងសាឡាដអាចជួយឱ្យបេះដូងបូមឈាមបានកាន់តែប្រសើរឆ្លងកាត់ពេញរាងកាយ។ ជាលទ្ធផលបញ្ហានៃការលេចឡើងដូចស្នាមជាំលើស្បែកនឹងត្រូវបានទប់ស្កាត់។ វីតាមីននេះក៏ជួយឱ្យស្បែកមានពណ៌ស្មើគ្នា, ទប់ស្កាត់ការបំផ្លាញ និងស្នាមជាំខៀវលើស្បែកផងដែរ។

៤​. រាងកាយចាប់ផ្ដើមមានក្លិនមិនល្អ

រាល់ប្រភេទនៃអាហារដែលពួកយើងទទួលទានសុទ្ធតែមានឥទ្ធិពលលើក្លិននៃរាងកាយ។ អាស៊ីតអាមីណូនៅក្នុងសាច់ក្រហមបន្សល់ទុកកាកសំណល់ក្នុងពោះវៀនកំឡុងពេលរំលាយអាហារដែលបញ្ចេញក្លិនមិនល្អ។ អង់ស៊ីមពោះវៀនបំបែកកាកសណល់ទាំងនោះដែលបន្ទាប់មកលាយជាមួយពពួកបាក់តេរីលើស្បែកកំឡុងពេលបែកញើស ហើយបង្កក្លិនខ្លួនមិនល្អ។ ក្លិនខ្លួនរបស់អ្នកអាចនឹងប្រែជាមិនល្អកំឡុងពេល ២​ ម៉ោងក្រោយទទួលទានសាច់ក្រហម។ ក្លិនញើស ឬក្លិនខ្លួនមិនល្អព្រោះការទទួលទានសាច់ក្រហមអាចត្រូវបានទៅវិញកំឡុងពេល ២ ទៅ ៣ ម៉ោង ឬយូររហូតដល់ ២ សប្តាហ៍។ ប៉ុន្តែការទទួលទានបន្លែផ្លែឈើវិញុអាចផ្ដល់ឱ្យរាងកាយនូវក្លិនប្រសើរ។ ទោះជាយ៉ាងណាចំពោះបន្លែប្រភេទ Cruciferous ដូចជាផ្កាខាត់ណា ផ្កាខាត់ណាខៀវ ពន្លកផ្កាស្ពៃ និងស្ពៃក្ដោបជាដើមដែលមានផ្ទុកជាតិស្ពាន់ធ័រ និងសារធាតុ cholineបង្កក្លិនខ្លួនមិនល្អ អ្នកគួរលាងសម្អាតបន្លែទាំងនេះជាមួយអំបិលមួយចិបសិន។ ការធ្វើបែបនេះអាចជួយកម្ចាត់សារធាតុបង្កក្លិនខ្លួនមិនល្អ ខណៈដែលរក្សាសមាសធាតុមានប្រយោជន៍។

៥. អាចបង្កបញ្ហានៃជំងឺបាក់ទឹកចិត្ត (Depression)

របបអាហារសុខភាពល្អក៏មានឥទ្ធិពលលើសុខភាពផ្លូវចិត្តគួរឱ្យកត់សម្គាល់ផងដែរ។ ដូច្នេះនៅពេលយើងបដិសេធមិនទទួលទានបន្លែនិងផ្លែឈើនោះ គឺងាយប្រឈមមុខនឹងហានិភ័យនៃជំងឺបាក់ទឹកចិត្តណាស់។

៦. សម្ពាធឈាមឡើងខ្ពស់

បន្លែផ្លែឈើជាអាហារចាំបាច់ដើម្បីរក្សាភាពប្រក្រតីនៃសម្ពាធឈាម។ វេជ្ជបណ្ឌិតជាច្រើនណែនាំឱ្យអ្នកដែលមានបញ្ហាសម្ពាធឈាមឡើងខ្ពស់ប្រកាន់ខ្ជាប់នូវរបបអាហារដែលមានផ្ទុកសម្បូរទៅដោយបន្លែនិងផ្លែឈើ។

៧. កង្វះអាហារូបត្ថម្ភ

សាច់ គឺមិនមានផ្ទុកនូវសារធាតុចិញ្ចឹមទាំងអស់ដែលរាងកាយត្រូវការចាំបាច់ដើម្បីរក្សាបាននូវរូបរាង និងសុខភាពល្អប្រសើរឡើយ។ ភាគច្រើននៃសាច់ គឺមានផ្ទុកសម្បូរតែជាតិប្រូតេអ៊ីន ជាតិដែក ម៉ាញ៉េស្យូម វីតាមីន B និងវីតាមីន D ប៉ុណ្ណោះ។ ដូច្នេះហើយទើបការទទួលទានតែសាច់ជាអាហារប្រចាំថ្ងៃនឹងធ្វើអោយអ្នកជួបប្រទះនូវបញ្ហាកង្វះអាហារូបត្ថម្ភ។ នៅមានបញ្ហាមួយចំនួនផ្សេងទៀតដែលអាចនឹងកើតឡើងចំពោះអ្នក នៅពេលរាងកាយមិនទទួលបានសារធាតុចិញ្ចឹមចាំបាច់គ្រប់គ្រាន់ ហើយភាគច្រើននៃបញ្ហាទាំងនោះ គឺគួរអោយព្រួយបារម្ភណាស់។

៨. បញ្ហាប្រព័ន្ធរំលាយអាហារ

ប្រភពដ៏ប្រសើរបំផុតនៃជាតិសសៃដែលរាងកាយត្រូវការដើម្បីរក្សាបាននូវចលនាពោះវៀនល្អប្រសើរជៀសផុតពីបញ្ហាទល់លាមកនោះ គឺបន្លែ និងផ្លែឈើ។ សាច់គ្មានផ្ទុកជាតិសសៃឡើយ! នេះហើយជាមូលហេតុដែលអ្នកនឹងត្រូវជួបប្រទះអាការៈទល់លាមក ប្រសិនបើអ្នកមិនទទួលទានអ្វីផ្សេងសោះក្រៅពីសាច់។

៩. សុខភាពឆ្អឹងចុះខ្សោយ

បន្លែបៃតងនិងផ្លែឈើក៏ជាប្រភពដ៏ល្អនៃជាតិកាល់ស្យូមដែរ។ ដូច្នេះការមិនរួមបញ្ចូលបន្លែផ្លែឈើក្នុងរបបអាហារប្រចាំថ្ងៃអាចបង្កបញ្ហាឆ្អឹងផ្សេងៗគួរឱ្យកត់សម្គាល់។

១០. សុខភាពខួរក្បាលចុះខ្សោយ

នេះក៏ព្រោះតែបន្លែផ្លែឈើមានផ្ទុកសម្បូរទៅដោយវីតាមីនដែលចាំបាច់សម្រាប់សុខភាពខួរក្បាល ពិសេសវីតាមីន b12 ជួយការពារកោសិកាខួរក្បាលដែលធ្វើឱ្យមុខងារនៃខួរក្បាលកាន់តែមានលក្ខណៈប្រសើរឡើង។ ប្រសិនបើអ្នកមានអារម្មណ៍ថាខ្សោយការចងចាំ ឬសមត្ថភាពនៃការចងចាំមានលក្ខណៈអន់ថយជាងមុន ចូរព្យាយាមទទួលទានអាហារមានផ្ទុកសម្បូរទៅដោយវីតាមីន b12។

១១. បញ្ហាមាត់ធ្មេញ

ការទទួលទានផ្លែប៉ោម ឬបន្លែផ្លែឈើដែលមានផ្ទុកសម្បូរទៅដោយជាតិសសៃអាចជួយសម្អាតធ្មេញតាមបែបធម្មជាតិ និងថែមទាំងបង្កើនការផលិតទឹកមាត់ទៀតផង។ នៅពេលក្នុងមាត់មានជាតិទឹកគ្រប់គ្រាន់នោះជាតិអាស៊ីតគ្រោះថ្នាក់ ក៏ដូចជាបាក់តេរីនឹងត្រូវបានជម្រះចេញ។ បន្លែផ្លែឈើក៏មានផ្ទុកសម្បូរទៅដោយវីតាមីន A និងវីតាមីន C ក៏ដូចជាជាតិកាល់ស្យូមដែលជួយឱ្យធ្មេញរឹងមាំផងដែរ៕