ស្ត្រេសកើតមាននៅពេលដែលអ្នកទទួលបាននូវសម្ពាធមួយចំនួន ពីកន្លែងធ្វើការ, សាលារៀនឬ បញ្ហានៃទំនាក់ទំនងផ្សេងៗក្នុងសង្គម ដែលវាលើសពីសមត្ថភាពរបស់អ្នកក្នុងការប្រឈមនឹងវា។ មានស្ត្រេសមួយចំនួន អាចនឹងផ្តល់នូវអត្ថប្រយោជន៍ក្នុងពេលនោះ ដោយវាបានបង្កើននូវ ការផ្តល់កម្លាំង និងថាមពលដើម្បីជួយឲ្យមនុស្ស ឆ្លងកាត់ដំណាក់កាលនោះបានដោយជោគជ័យ ដូចជាការប្រឡង ឬការសម្រេចកិច្ចការអ្វីមួយឲ្យទាន់ពេលវេលា។ ទោះជាយ៉ាងណាក្តី កម្រិតនៃស្ត្រេសខ្លាំងពេកអាចនឹងផ្តល់ផលលំបាកជាច្រើនដល់សុខភាព ដែលវាអាចនឹងប៉ះពាល់ដល់ប្រព័ន្ធភាពសុំាំ ប្រព័ន្ធបេះដូងសសៃឈាម ប្រព័ន្ធប្រសាទអង់ដូគ្រីន និងធ្វើឲ្យប៉ះពាល់ដល់ផ្នែកផ្លូវអារម្មណ៍ជាខ្លាំង ។
បញ្ហាស្ត្រេសរុំារ៉ៃដែលមិនបានទទួលនូវការព្យាបាល នឹងធ្វើឲ្យស្ថានភាពសុខភាពកាន់តែធ្ងន់ធ្ងរនឹងអាចកើតមាននូវជំងឺដូចជា៖ ថប់បារម្ភ, គេងមិនលក់,ឈឺសាច់ដុំ, លើសសម្ពាធឈាម និងប្រព័ន្ធការពារចុះខ្សោយ ឬធាត់ជាដើម ។ខាងក្រោមនេះគឺជាដំណោះស្រាយដែលអ្នក គួរអនុវត្តដើម្បីប្រឈមនឹងស្ត្រេសឲ្យបានធូរស្រាល ៖
១. សម្រាកចេញពីកត្តាដែលនាំឲ្យមានស្ត្រេស
វាអាចនឹងពិបាកក្នុងការចាកចេញពីគម្រោងការងារធំមួយ, ទារកដែលតែងតែយំម្នាក់ ឬ វិក័យបត្រចំណាយលើអ្វីមួយ ។ ប៉ុន្តែនៅពេលដែលអ្នកផ្តល់ឱកាសឲ្យខ្លួនឯងចាកចេញពីវា នោះអ្នកនឹងផ្តល់ឲ្យខ្លួនឯងនូវពេលវេលា សម្រាប់ធ្វើអ្វីផ្សេងៗទៀត។ ជាការពិតអ្នកនៅតែត្រូវចំណាយលុយ លើវិក័យបត្រទាំងនោះ តែចូរចំណាយពេល ២០នាទី ថែរក្សាខ្លួនអ្នក និងធ្វើអ្វីដែលអ្នកចង់ធ្វើដើម្បីសម្រាលនូវអារម្មណ៍តានតឹងនេះ ។
២.ហាត់ប្រាណ
ចំនួននៃការស្រាវជ្រាវបានកើនឡើងនូវការរកឃើញថា ការហាត់ប្រាណផ្តល់អត្ថប្រយោជន៍ដល់សុខភាពផ្លូវចិត្តរបស់អ្នកក៏ដូចជារាងកាយរបស់អ្នកផងដែរ ។ យើងដឹងហើយថា ការធ្វើលំហាត់ប្រាណកាន់តែច្រើននឹងកាន់តែផ្តល់ផលល្អចំពោះសុខភាព ប៉ុន្តែត្រឹមតែការដើរ , រត់,ហែលទឹក ឬរាំឲ្យបាន២០នាទី នោះកម្រិតនៃស្ត្រេសក៏អាចធូរស្រាល និងមានប្រសិទ្ធភាពបានជាច្រើនម៉ោងបានផងដែរ ។
៣.ញញឹម និងសើចឲ្យបានច្រើន
ខួរក្បាលរបស់យើង គឺមានទំនាក់ទំនងជាមួយនឹងផ្លូវអារម្មណ៍ និងការបង្ហាញនូវលើទឹកមុខ។ នៅពេលដែលមនុស្សស្ត្រេស ពួកគេជារឿយៗតែងតែបង្ហាញវានៅលើទឹកមុខរបស់ពួកគេ ។ ដូច្នេះការសើច ឬញញឹមអាចជួយសម្រាលនូវសម្ពាធ និងធ្វើឲ្យសា្ថនភាពប្រសើរឡើង ។
៤.ទទួលនូវការគាំទ្រផ្នែកសង្គម
ទាក់ទងទៅកាន់មិត្តភក្តិ ដោយការតេទូរស័ព្ទ និងផ្ញើរអ៊ីម៉េល ។ នៅពេលដែលអ្នកចែករំលែកការព្រួយបារម្ភ ឬអារម្មណ៍ជាមួយនឹងមនុស្សដទៃទៀត វាពិតជាអាចជួយកាត់បន្ថយស្ត្រេសរបស់អ្នកបាន ។ ប៉ុន្តែវាជាការចាំបាច់ ដែលអ្នកត្រូវប្រាកដថាមនុស្សដែលអ្នកជ្រើសរើសនឹង និយាយប្រាប់ គឺជាមនុស្សដែលអ្នកអាចជឿជាក់ទុកចិត្តបាន ដែលអាចយល់ និងវាយប្រហារអ្នក ។
៥.ការតាំងសមាធិ
ការតាំងសមាធិ និងការបន់ស្រន់ផ្នែកផ្លូវចិត្ត នឹងជួយឲ្យសុខភាពផ្លូវចិត្តនិងរាងកាយ បានទទួលនូវការសម្រាក និងផ្ចង់អារម្មណ៍ទៅលើអ្វីមួយ។ ការប្រមូលផ្តុំអារម្មណ៍បានល្អ អាចនឹងជួយមនុស្សឲ្យមើលឃើញនូវអ្វីដែលថ្មី បង្កើតនូវការស្រលាញ់ខ្លួនឯង និងការលើកលែងទោសឲ្យខ្លួនឯង។ ការតាំងសមាធិ ក៏មិនខុសពីការហាត់ប្រាណគឺនឹងធ្វើឲ្យអ្នកមានអារម្មណ៍ស្រស់ស្រាយ និងសុខភាពផ្នែកផ្លូវចិត្តល្អ ៕