Join with Health.com.kh on Telegram

ភាគច្រើននៃពួកយើងប្រហែលជាមិនធ្លាប់ដឹងទេថាមានអាហារមួយចំនួនអាចជួយសម្រួលការរំលាយអាហារដែលចាំបាច់ណាស់ដើម្បីអាចស្រូបយកសារធាតុចិញ្ចឹមបានពេញលេញ។ មានអ្វីខ្លះទៅ? ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអាហារដែលល្អសម្រាប់ប្រព័ន្ធរំលាយអាហារ ៖

១. ត្រីសម្បូរខ្លាញ់

ជាប្រភពដ៏ល្អបំផុតនៃអាស៊ីតខ្លាញ់អូមេហ្កា ៣ ដែលជួយកាត់បន្ថយការរលាកក្នុងក្រពះ ឬជញ្ជាំងពោះវៀនធំ។ ជាលទ្ធផលការរំលាយអាហារកាន់តែមានលក្ខណៈប្រសើរឡើងនិងសម្រួលចលនាពោះវៀន។ ដូច្នេះដើម្បីជាការប្រសើរកុំភ្លេចទទួលទានត្រីសម្បូរខ្លាញ់។

២. ត្រសក់

មានផ្ទុកសម្បូរទៅដោយវីតាមីន, ជាតិរ៉ែ និងសារធាតុប្រឆាំងអុកស៊ីតកម្ម ព្រមជាមួយលក្ខណៈសម្បត្តិប្រឆាំងការរលាក។ ត្រសក់ក៏ជាប្រភពដ៏ប្រសើរនៃជាតិសសៃ និងជាតិទឹកដែលជួយទប់ស្កាត់អាការៈទល់លាមកដោយបន្ទន់លាមក និងសម្រួលចលនាពោះវៀន។ សារធាតុប្រឆាំងអុកស៊ីតកម្មទប់ស្កាត់ការប្រមូលផ្ដុំនូវជាតិពុលដែលតែងបង្កបញ្ហាពិបាករំលាយអាហារនិងឆ្លងមេរោគក្រពះ។

៣. ល្ហុង

ផ្លែឈើនេះមានផ្ទុកអង់ស៊ីមសម្រួលការរំលាយអាហារហៅថា papain។ វាសម្រួលដំណើរការរំលាយអាហារដោយជួយបំបែកប្រូតេអ៊ីន។ Papain ក្នុងផ្លែល្ហុងក៏ជួយទប់ទល់នឹងចង្កោម​រោគសញ្ញា​ជំងឺ​រលាក​ពោះវៀនដូចជាទល់លាមកនិងហើមពោះផងដែរ។

៤. យ៉ាអួរ

ជាប្រភពដ៏ប្រសើរនៃបាក់តេរីល្អៗដែលជួយរក្សាតុល្យភាពក្នុងពោះវៀន។ ការរក្សាបាននូវតុល្យភាពបាក់តេរីល្អក្នុងពោះវៀន គឺចាំបាច់ណាស់សម្រាប់សុខភាពប្រព័ន្ធរំលាយអាហារ។

៥. គីមឈី

អាហារនេះផ្សំឡើងពីស្ពៃបូកគោនិងមានលាយការ៉ុតដែលជាប្រភពដ៏ប្រសើរនៃជាតិសសៃ, ជាតិដែក, កាល់ស្យូម, វីតាមីន A, វីតាមីន B និងវីតាមីន C ព្រមទាំងមានផ្ទុកប្រូបាយអូទិកដែលល្អណាស់សម្រាប់បាក់តេរីល្អៗក្នុងពោះវៀនជួយសម្រួលដល់ការរំលាយអាហារ។ បាក់តេរីល្អក្នុងពោះវៀនក៏ជួយដល់ការរំលាយអាហារតាមរយៈការបញ្ចេញនូវអង់ស៊ីមដែលជួយដល់ការរំលាយអាហារផងដែរ។

៦. ផ្លែចេក

ផ្លែឈើនេះមានផ្ទុកសម្បូរទៅដោយជាតិសសៃ និងសារធាតុ pectin ដែលជួយសម្រួលចលនាពោះវៀន ព្រមទាំងការរំលាយកាបូអ៊ីដ្រាត។ ចេកក៏ជាអាហារជួយរក្សាកម្រិតនៃជាតិស្ករក្នុងឈាមមិនឱ្យឡើងខ្ពស់ផងដែរ។ ចូរព្យាយាមទទួលទានចេកជាប្រចាំ។

៧. ល្ពៅ

ជាប្រភពដ៏ប្រសើរនៃជាតិសសៃដែលមានអត្ថប្រយោជន៍ណាស់សម្រាប់រក្សាប្រព័ន្ធរំលាយអាហារ ពិសេសអាចជួយព្យាបាលអាការៈទល់លាមកបានយ៉ាងប្រសើរ។

៨. ត្រសក់ស្រូវ

ត្រសក់ស្រូវមានផ្ទុកសម្បូរទៅដោយជាតិសសៃ dietary fiber និងជាតិទឹកខ្ពស់ដែលល្អណាស់សម្រាប់សម្រួលការរំលាយអាហារនិងទប់ស្កាត់អាការៈទល់លាមក៕

ទំនាក់ទំនងផ្សាយពាណិជ្ជកម្មសូមទូរស័ព្ទមកលេខ 011688855
អត្ថបទទាក់ទង