នៅពេលអ្នករស់នៅ ជាមួយអាការៈថប់បារម្ភច្រើន វាពិតជាធ្វើឲ្យជីវិតប្រចាំថ្ងៃអ្នក ងាយនឹងមានភាពនឿយហត់ និងពោរពេញទៅដោយភាពភ័យខ្លាច និងបារម្ភច្រើនខុសធម្មតា។ ចំពោះរោគសញ្ញាផ្លូវកាយវិញមានដូចជា គេងមិនលក់ អស់កម្លាំង ពិបាកដកដង្ហើម និងតឹងសាច់ដុំ។
យ៉ាងណាមិញ កាលណាអ្នកជំងឺទទួលបានការព្យាបាលគ្រប់គ្រាន់ បូករួមទាំងការពិគ្រោះយោបល់ជាមួយគ្រូពេទ្យ និងការប្រើប្រាស់ថ្នាំ អាចជួយឲ្យពួកគេ វិលមករកជីវិតរស់នៅធម្មតាវិញបាន។ រយៈពេលច្រើនឆ្នាំមកនេះ មានការសិក្សាច្រើនណាស់ បានរកឃើញថា ការដែលបង្កើតបាននូវទម្លាប់មួយចំនួនដូចខាងក្រោមនេះ អាចជួយដោះស្រាយបញ្ហាថប់បារម្ភ បានយ៉ាងអស្ចារ្យ ដោយមិនបាច់ប្រើថ្នាំអ្វីទាំងអស់។
ហាត់ប្រាណទៀងទាត់
ការហាត់ប្រាណ មិនត្រឹមតែមានប្រយោជន៍ ចំពោះរាងកាយទេ ប៉ុន្តែ ក៏ជួយពង្រឹងដល់សុខភាពផ្លូវចិត្តថែមទៀត។ ការហាត់ប្រាណយ៉ាងហោចណាស់ ៣០ នាទីក្នុងមួយថ្ងៃ និងចំនួន ៥ ថ្ងៃក្នុងមួយសប្តាហ៍ឃើញថា អាចជួយកាត់បន្ថយរោគសញ្ញាជំងឺបាក់ទឹកចិត្ត និងថប់បារម្ភបានយ៉ាងល្អ។
តាំងមាធិ
ការសិក្សាបានរកឃើញថា ការតាំងសមាធិទៀងទាត់ ជួយកាត់បន្ថយរោគសញ្ញានៃជំងឺថប់បារម្ភទូទៅបាន។ ការសិក្សាមួយដែលចុះផ្សាយ ក្នុងសារព័ត៌មាន Clinical Psychiatry បានឲ្យដឹងថា ការតាំងសមាធិដែលមានភាពស្ងប់ក្នុងអារម្មណ៍មួយពេល មានប្រយោជន៍ខ្លាំងណាស់ ចំពោះអ្នកជំងឺផ្លូវចិត្ត។
ស្តាប់ចម្រៀង
បើសិនជាអ្នកកំពុងតែជួបបញ្ហាថប់បារម្ភមែន មិនត្រូវមើលងាយការស្តាប់ចម្រៀងឡើយ។ ការស្តាប់ចម្រៀង ដើម្បីបន្ធូរអារម្មណ៍ដូចជា សម្លេងទឹកហូរ និងចម្រៀងបែបលន្លង់លន្លោច អាចជួយបន្ថយស្ត្រេស និងថប់បារម្ភបាន។ ដូច្នេះ ចូររៀបចំចម្រៀងមួយតារាងដើម្បីស្តាប់ ក្នុងពេលធ្វើដំណើរទៅធ្វើការ និងហាត់ប្រាណទៅ។
គេងគ្រប់គ្រាន់
ការសិក្សាបានរកឃើញថា អ្នកជំងឺដែលស់នៅ ជាមួយជំងឺថប់បារម្ភខុសធម្មតា តែងប្រឈមនឹងបញ្ហាគេងមិនលក់ច្រើន។ ដូច្នេះ គួរតែធ្វើយ៉ាងណា បង្កើតជាទម្លាប់មួយ ដើម្បីអ្នកអាចគេងបានយ៉ាងហោចណាស់ ៧ ទៅ ៨ ម៉ោងក្នុងមួយយប់ជារៀងរាល់ថ្ងៃទៅ។
ញ៉ាំអាហារផ្តល់សុខភាព
រឿងនេះពិតជាសំខាន់ណាស់ ចំពោះអ្នកដែលរស់នៅមានជំងឺផ្លូវចិត្ត។ ការសិក្សាបានរកឃើញថា ការញ៉ាំអាហារទាំងឡាយណា ដែលផ្តល់សុខភាពនឹងជួយបន្ថយ រោគសញ្ញាជំងឺថប់បារម្ភបាន។ អ្វីដែលសំខាន់គឺត្រូវចៀសវាងអាហារ ដែលមានជាតិស្ករច្រើន និងគ្រឿងស្រវឹងច្រើន។
លះបង់ទម្លាប់ញ៉ាំជាតិកាហ្វេអ៊ីន
ការដែលញៀនជាតិកាហ្វេអ៊ីន នឹងមិនអាចជួយដោះស្រាយការថប់បារម្ភបានឡើយ។ ផ្ទុយទៅវិញ ការដែលពឹងផ្អែកទៅលើកាហ្វេច្រើនពេក ដើម្បីដោះស្រាយការងារប្រចាំថ្ងៃ អាចបណ្តាលឲ្យកើតជាជំងឺថប់ថប់បារម្ភ និងស្ត្រេសបានថែមទៀតផង។ ទោះបីជាយ៉ាងណាក៏ដោយ អ្នកគួរតែកាត់បន្ថយការញ៉ាំកាហ្វេទៅ បើសិនជាចង់ដោះស្រាយការថប់បារម្ភ។
ចំណាយពេលច្រើន ជាមួយមិត្តភក្តិក្នុងជីវិតពិតប្រាក
រាល់ពេលដែលអ្នកចំណាយពេល អូសចុះឡើងក្នុងកម្មវិធី Facebook, ឬ Instagram នោះ គឺមិមែនជារឿងល្អ ដែលត្រូវធ្វើច្រើននោះទេ។ ការសិក្សាជាច្រើនបានឲ្យដឹងថា ជំងឺថប់បារម្ភ និងបាក់ទឹកចិត្តមានទំនាក់ទំនងគ្នា នឹងកម្មវិធីសង្គមទាំងនេះណាស់។ ការចំណាយពេលវេលា នៅលើបណ្តាញអ៊ីនធើណែតជាមួយមិត្តភក្តិ អាចធ្វើឲ្យកើតបញ្ហាថប់បារម្ភកាន់តែខ្លាំងបាន។ ផ្ទុយទៅវិញ អ្នកគួរតែ Log out កម្មវិធីទាំងនេះ ហើយចំណាយពេលវេលាពិតប្រាកដ ក្នុងជីវិតខាងក្រៅជជែកគ្នា ជាមួយពួកគេនៅខាងក្រៅវិញទៅ៕
ដំណោះស្រាយបែបវិទ្យាសាស្ត្រ ចំពោះការឧស្សាហ៍ថប់បារម្ភ
4 August, 2021