Join with Health.com.kh on Telegram

នៅពេលមានបញ្ហារលាកស្បែកដោយសារកម្ដៅថ្ងៃ ថាតើអ្នកមិនគួរធ្វើរឿងអ្វីខ្លះដើម្បីចៀសវាងកុំឱ្យមានបញ្ហាកាន់តែធ្ងន់ធ្ងរឡើង? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) កុំបារម្ភ! ខាងក្រោមវេបសាយសុខភាព Health.com.kh នឹងបង្ហាញឱ្យដឹងពីអ្វីដែលអ្នកមិនគួរធ្វើក្រោយរលាកស្បែកដោយសារកម្ដៅថ្ងៃ ​៖

១. ប្រើប្រាស់ប្រទាលកន្ទុយក្រពើជាមួយគ្រឿងផ្សំណាមួយបន្ថែម

ទោះបីជាប្រទាលកន្ទុយក្រពើអាចជួយបំបាត់ភាពក្រហមនិងសម្រាលអាការៈឈឺចាប់ ប៉ុន្តែត្រូវប្រយ័ត្នចំពោះផលិតផលផ្សំឡើងពីជែលប្រទាលកន្ទុយក្រពើដែលអ្នកប្រើប្រាស់លើស្បែក។ នេះក៏ព្រោះតែគ្រឿងផ្សំបន្ថែម ឬសិប្បនិម្មត្តិមួយចំនួនដូចជា benzocaine ឬ lidocaine អាចបណ្ដាលឱ្យការរលាកកាន់តែធ្ងន់ធ្ងរ ហើយស្បែកអាចប្រែជារមាស់កាន់តែខ្លាំងទៀតផង។ គ្រូពេទ្យឯកទេសខាងសើស្បែកណែនាំឱ្យអ្នកប្រើប្រាស់ជែលប្រទាលកន្ទុយក្រពើសុទ្ធដើម្បីព្យាបាលបញ្ហាស្បែករលាកដោយសារកម្ដៅថ្ងៃ។ ទោះជាយ៉ាងណាប្រសិនបើការរលាកស្បែករបស់អ្នកមានសភាពធ្ងន់ធ្ងរ ចូរកុំស្ទាក់ស្ទើនឹងជួបទទួលការពិនិត្យពីគ្រូពេទ្យជំនាញ។

២. ស្លៀកពាក់សម្លៀកបំពាក់រឹបតឹង

សម្លៀកបំពាក់ដែលរឹបតឹង គឺមិនសាកសមឡើយនៅពេលអ្នកកំពុងជួបប្រទះបញ្ហារលាកស្បែកដោយសារកម្ដៅថ្ងៃ។ ទង្វើនេះអាចបណ្ដាលឱ្យស្បែកពិបាកដកដង្ហើម និងព្យាបាលខ្លួនឯង។

៣. ការទទួលទានកាហ្វេ

ការរលាកស្បែកដោយសារកម្ដៅថ្ងៃជាញឹកញយអាចបង្កអាការៈឈឺក្បាល ហើយខណៈដែលការទទួលទានកាហ្វេមួយពែងហាក់ដូចជាអាចបន្ធូរអាការៈនេះ វាក៏នឹងអាចធ្វើឱ្យអ្នកឈឺកាន់តែខ្លាំងផងដែរ។ ការស្ថិតនៅក្រោមកម្ដៅថ្ងៃយូរពេកអាចបណ្ដាលឱ្យអ្នកបាត់បង់ ឬខ្សោះជាតិទឹកក្នុងរាងកាយ ហើយការទទួលទានទឹកឱ្យបានច្រើនគ្រប់គ្រង គឹចាំបាច់ណាស់សម្រាប់បំពេញជាតិទឹកដែលបាត់បង់។ ក៏ព្រោះតែកាហ្វេអ៊ីនក្នុងកាហ្វេមានលក្ខណៈសម្បត្តិបញ្ចុះទឹកនោម នោះអ្នកនឹងឈឺនោមញឹកជាងធម្មតា ហើយរាងកាយប្រាកដជាបាត់បង់សារធាតុរាវនិងជាតិរ៉ែចាំបាច់កាន់តែច្រើន។

៤. ប្រើប្រាស់គ្រឿងសម្អាងបិទបាំងលើស្បែកដែលមានបញ្ហា

ក៏ដូចនឹងការស្លៀកសម្លៀកបំពាក់រឹបតឹងដែរ ការប្រើប្រាស់គ្រឿងសម្អាងលើស្បែកអាចបណ្ដាលឱ្យស្បែកពិបាកនឹងដកដង្ហើម។ ប្រសិនបើអ្នកចាំបាច់ត្រូវតែប្រើប្រាស់គ្រឿងសម្អាងនោះ ចូរប្រាកដថាចៀសវាងប្រើប្រាស់ច្រើនពេក និងជ្រើសរើសជក់ដែលមានសសៃទន់។

៥.​ ខាត់ស្បែក

ស្បែកដែលរលាកអាចនឹងមិនស្អាតគួរឱ្យចង់មើល ហើយអ្នកប្រាកដជាចង់ខាត់វាចេញ។ កុំឱ្យសោះ! ការធ្វើបែបនេះអាចបង្កការខូចខាតដល់ស្បែកកាន់តែធ្ងន់ធ្ងរឡើង ខណៈដែលផលិតផលខាត់ស្បែកជះឥទ្ធិពលខ្លាំងលើស្បែក។ ជំនួសមកវិញ អ្នកគួរអនុញ្ញាតឱ្យស្បែកដែលមានបញ្ហាជាសះស្បើយបាត់ទៅវិញដោយធម្មជាតិ វាមិនយូរជាង ៧ថ្ងៃឡើយ៕