ពពួកថ្នាំផ្សះ ជាធម្មតាត្រូវលេបពីម្តងទៅបួនដងក្នុងមួយថ្ងៃ។ លោកអ្នកគួរតែលេបថ្នាំនេះចន្លោះពេលស្មើៗគ្នា និងពេលវេលាដូចគ្នាជារៀងរាល់ថ្ងៃ។ វាអាចជួយរក្សាកម្រិតថ្នាំនៅក្នុងឈាមអោយនៅថេរ។
ការដែលលេបថ្នាំមិនបានទៀងទាត់ ឬមិនតាមវេជ្ជបញ្ជា គឺជាមូលហេតុមួយធ្វើអោយពពួកមេរោគស៊ាំនឹងថ្នាំ ហើយធ្វើអោយជំងឺរបស់លោកអ្នកពិបាកនឹងព្យាបាល។ ដូច្នេះ ការលេបតាមកម្រិត និងតាមពេលវេលាត្រឹមត្រូវ គឺជាកត្តាចាំបាច់នៅពេលដែលលោកអ្នកប្រើពពួកថ្នាំផ្សះ។
តែពេលខ្លះ ការភ្លេចភ្លាំងគឺជាបញ្ហាដ៏ចំបងមួយដែលគេច្រើនជួបប្រទះ។ ប្រសិនបើលោកអ្នកលំបាកក្នុងការចងចាំពីការលេបថ្នាំ លោកអ្នកអាចជ្រើសរើសយកវិធីសាស្ត្រមានប្រយោជន៍មួយចំនួនដូចខាងក្រោមនេះ ៖
• លេបថ្នាំរួមជាមួយនឹងសកម្មភាពប្រចាំថ្ងៃផ្សេងទៀតដូចជា នៅពេលលោកអ្នកដុសធ្មេញ ឬញ៉ាំអាហារ ប៉ុន្តែ ត្រូវពិនិត្យមើលថាតើ ថ្នាំរបស់លោកអ្នកត្រូវបានណែនាំអោយប្រើមុន ឬបន្ទាប់ពីញ៉ាំអាហារ។
• បន្ទាប់ពីលេបម្តងៗ ត្រូវធ្វើកំណត់ត្រាមួយនៅក្នុងកំណត់ហេតុប្រចាំថ្ងៃ ឬនៅលើប្រតិទិនរបស់លោកអ្នក។
• ដាក់សំលេងរោទិ៍ ដើម្បីរំលឹកលោកអ្នកពីពេលវេលាដែលត្រូវលេបថ្នាំ។
ប្រសិនបើលោកអ្នកនៅតែភ្លេចលេបថ្នាំ សូមសួរគ្រូពេទ្យ ឬឱសថការីរបស់លោកអ្នកអំពីវិធីណាផ្សេងទៀត។ លោកអ្នកគួរតែប្រើប្រាស់ថ្នាំផ្សះអោយបានអស់ទៅតាមវេជ្ជបញ្ជា បើទោះជាលោកអ្នកចាប់ផ្តើមមានអារម្មណ៍ថា បានប្រសើរជាងមុនហើយក៏ដោយ។ ប្រសិនបើលោកអ្នកមិនប្រើអោយអស់ទេ ឬប្រសិនបើលោកអ្នកខកខានមិនបានប្រើច្រើនដងពេក នោះការចម្លងមេរោគអាចនឹងលាប់ឡើងវិញ៕