រាល់ភាពចៃដន្យ តែងតែជារឿងមួយ ចៀសមិនផុតឡើយ។ ស្រោមអនាម័យរហែក ភ្លេចប្រើថ្នាំពន្យារកំណើតជាច្រចាំ សុទ្ធតែអាចនាំឲ្យមាន ការរួមភេទដោយមិនបាន ការពារបន្ថែមទៀតបានទាំងអស់។ ប៉ុន្តែ បើសិនជាអ្នក ចង់ចៀសវាងការមានផ្ទៃពោះ ដោយចៃដន្យមែននោះ យកល្អ គួរតែប្រើថ្នាំគ្រាប់ពន្យារកំណើតបន្ទាន់ហើយ។ យ៉ាងណាមិញ អ្នកក៏មិនត្រូវពន្យារពេលយូរដែរ។ ចូរចាំថា ដើម្បីទទួលបានប្រសិទ្ធភាព របស់ថ្នាំពន្យារកំណើតល្អបំផុតនោះ គឺការប្រើប្រាស់វាបានលឿន។ ក្រោយពីរួមភេទ មិនបានការពាររួចមក មេជីវិតឈ្មោល អាចរស់នៅក្នុងស្បូន មនុស្សស្រីពី ៧២ ម៉ោង ទៅ ៥ ថ្ងៃឯណោះ ដូច្នេះ ថ្នាំពន្យារកំណើតបន្ទាន់ ភាគច្រើន តែងណែនាំឲ្យប្រើ មុនរយៈពេល ៥ ថ្ងៃ ក្រោយពីរួមភេទមិនបានការពាររួច។
កាលណាអ្នកប្រើ ថ្នាំពន្យារកំណើត បានកាន់តែលឿន អ្នកក៏កាន់តែ មិនសូវមានឱកាស មានផ្ទៃពោះក្រោយពីរួមភេទ មិនបានការពាររួចដែរ។ ក្នុងករណីមួយដែលថា បើសិនជាអ្នករួមភេទ ដោយមិនបានការពារ ក្នុងពេលជ្រុះអូវ៉ុល យកល្អ ត្រូវតែប្រើថ្នាំពន្យារកំណើតបន្ទាន់ភ្លាមៗទៅ។ ទោះបីជាយ៉ាងណាក៏ដោយ បើសិនជាអ្នកជ្រុះអូវ៉ុលរួចហើយ ថ្នាំគ្រាប់ពន្យារកំណើតបន្ទាប់ មិនបាច់ប្រើឡើយ ព្រោះថ្នាំនេះ មានប្រសិទ្ធភាព ក្នុងការទប់ស្កាត់ ការជ្រុះអូវ៉ុលប៉ុណ្ណោះ ដូច្នេះ មេជីវិតឈ្មោល មិនអាចជួបគ្នាបានឡើយ។
បើសិនជាអ្នក ស្ថិតក្នុងពេលវេលា អាចមានកូននោះ យកល្អ គួរតែស្នើឲ្យដៃគូ មានភាពប្រុងប្រយ័ត្ន ឲ្យបានច្រើនផង។ មួយវិញទៀត គួរតែប្រើថ្នាំនេះ ក្រោយពីរួមភេទរួចផង។ តាមការសិក្សាក្នុងឆ្នាំ ២០០១ បានឲ្យដឹងថា អត្រានៃការមានផ្ទៃពោះគឺ ០,៨ ប៉ុណ្ណោះ សម្រាប់ស្ត្រី ដែលប្រើថ្នាំគ្រាប់ពន្យារកំណើត ក្រោយពីរួមភេទមុន ៧២ ម៉ោង តែបើសិនជាពន្យារពេលយូរជាង ៧២ ម៉ោង ឱកាសមានផ្ទៃពោះ នឹងកើនឡើងដល់ ១,៨ ភាគរយទៅវិញ។
ដូច្នេះ បើសិនជាអ្នក ស្ថិតក្នុងពេលវេលា ដែលអាចមានផ្ទៃពោះបាន និងរួមភេទមិនបានការពារទៀតនោះ យកល្អ គួរតែពិគ្រោះជាមួយគ្រូពេទ្យ និងសម្រេចចិត្ត ទៅលើសកម្មភាពបន្ទាប់៕
ថ្នាំពន្យារកំណើតបន្ទាន់ គួរប្រើពេលណាទើបត្រឹមត្រូវ?
