នាងខ្ញុំអាយុ ៣២ឆ្នាំ រៀបការរួច ហើយមានកូនពីរនាក់ទផតផង។ ថ្មីៗនេះ ខ្ញុំសម្គាល់ឃើញថា សុដន់ខ្ញុំម្ខាងដូចជាមានអារម្មណ៍តឹងខ្លាំងពេលពាក់អាវទ្រនាប់។ នៅពេលខ្ញុំមើលទៅ ឃើញថា សុដន់ខាងឆ្វេងខ្ញុំធំជាងខាងស្តាំទៅវិញ។ ដូច្នេះតើខ្ញុំគួរបារម្ភអំពីរឿងនេះដែរទេ?
ជាធម្មតា សុដន់ម្ខាងតែងតែធំជាងម្ខាងទៀតបន្តិច ហើយវាក៏មិនមែនជារឿងដែលត្រូវខ្វល់ខ្វាយដែរ។ មានស្ត្រីមួយចំនួនតូចបំផុតដែលមានសុដន់ទំហំប៉ុនគ្នាទាំងស្រុង។ ប៉ុន្តែបើសិនជាអ្នកគិតថា ការលូតលាស់របស់សុដន់ម្ខាងធំជាងម្ខាងទៀតភ្លាមៗ ឬត្រឹមតែរយៈពេលមួយប់ យកល្អគួរតែទៅជួបពេទ្យជំនាញរោគស្ត្រីដើម្បីពិនិត្យហើយ។ ខាងក្រោមនេះគឺជាមូលហេតុមួយចំនួនដែលនាំឲ្យសុដន់ម្ខាងធំជាងម្ខាង៖
បំបៅដោះកូន
បើសិនជាថ្មីៗនេះអ្នកសម្រាលកូន ឬនៅបំបៅដោះកូន សុដន់ម្ខាងប្រហែលជាធំជាងម្ខាងទៀតមិនខានទេ។ រឿងនេះដោយសារតែ សុដន់ម្ខាងទៀតមិនផលិតទឹកដោះច្រើនដូចម្ខាងដែលបំបៅកូន។ ករណីបែបនេះ អ្នកអាចឆ្លាសសុដន់ម្ខាងដែលតូចជាងនោះបំបៅកូនម្តង។
គីស
បើសិនជាកើតជាគីសទឹកក្នុងសុដន់ អ្នកអាចនឹងឃើញមានការរីកធំរបស់សុដន់បណ្តោះអាសន្ន។ វាអាចជាដុំគីសស្លូត ដែលអាចពិនិត្យដឹងដោយគ្រូពេទ្យ។
ការបង្ករោគ
ពេលខ្លះ សុដន់អាចទៅជារលាកជាលិកាពីខាងក្នុង។ រឿងនេះច្រើនតែប៉ះពាល់លើសុដន់ម្ខាង ហើយក៏អាចនាំឲ្យឈឺចាប់ ហៀរទឹកចេញពីក្បាលសុដន់ និងហើមសុដន់ដែរ។ បើសិនជាអ្នកកំពុងតែជួបអាការៈទាំងនេះមែន នោះការរីកធំរបស់សុដន់អ្នកគឺជាការរលាកសុដន់ទេ។ ដូច្នេះចូរទៅឲ្យពេទ្យពីនិត្យឲ្យបានលឿនបំផុត។
ខ្ទុះក្នុងសុដន់
ការកខ្ទុះដែលមានការឈឺចាប់ខ្លាំងអាចកើតឡើងក្នុងសុដន់ រហូតដល់ធ្វើឲ្យសុដន់នោះទៅជារីកធំ និងតឹង។ ករណីបែបនេះ វាអាចនឹងធ្វើឲ្យក្តៅនៅនឹងកន្លែង ឬក្តៅខ្លួនបន្ថែមទៀត។
ដុំសាច់មហារីកសុដន់
ករណីដែលមានការលូតលាស់ជាលិកាមិនធម្មតា ឬដុំសាច់ក្នុងសុដន់ វាអាចធ្វើឲ្យសុដន់ទៅជាធំជាងមុនបាន។ ករណីខ្លះ បើដុំសាច់នោះស្លូត គឺមិនបាច់បារម្ភអ្វីទេ ប៉ុន្តែបើវាកាច់វិញ អ្នកត្រូវតែស្វែងរកដំណោះស្រាយឲ្យបានលឿនបំផុត៕