នៅពេលដែលអ្នកដាស់កូនឱ្យក្រោកពីគេង អ្នកត្រូវតែប្រើវិធីដែលត្រូវទើបមិនប៉ះពាល់ដល់កូន ដូចនេះតើមានវិធីណាដែលសាកសមក្នុងការយកមកប្រើដើម្បីដាស់កូនឱ្យក្រោកពីគេងនោះ?
ផ្តាំទុកមុន
នៅមុនពេលដែលកូនចូលគេង អ្នកត្រូវតែប្រាប់កូនទុកជាមុនថា អ្នកនឹងដាស់គេនៅថ្ងៃស្អែកនៅម៉ោងប៉ុន្មាន ដើម្បីឱ្យកូនមានចិត្តត្រៀមទុកជាមុន។
ប្រើពន្លឺ
នៅពេលព្រឹក បើកូនគេងក្នុងបន្ទប់ដែលងងឹត ហើយគ្មានពន្លឺចូល អ្នកអាចបើកអំពូលដែលមានពន្លឺខ្សោយដើម្បីដាស់កូនបាន ព្រោះពន្លឺអាចជួយអ្នកដាស់កូនឱ្យក្រោក ហើយវាថែមទាំងអាចជួយដាស់ខួរក្បាលកូនទៀតផង បើអ្នកគ្មានអំពូលតូចនេះ អ្នកអាចដើរចូលបន្ទប់កូន បន្ទាប់មកបើកវាំងននថ្មមៗ ដើម្បីឱ្យពន្លឺចាំងចូល នោះកូនក៏ឆាប់ក្រោកឡើងដូចគ្នា។
ប្រើក្លិនអាហារពេលព្រឹក
អ្នកអាចយកអាហារពេលព្រឹកទៅដាក់នៅក្បាលដំណេកកូន ដើម្បីឱ្យក្លិននៃអាហារនោះដាស់ខួរក្បាលកូនឱ្យក្រោកពីគេងបាន។
ប្រើចម្រៀង
អ្នកអាចប្រើចម្រៀងដែលមានលក្ខណៈស្រទន់មកដាស់កូនឱ្យក្រោកឡើងបាន ដោយបើកសម្លេងតិចៗ មិនត្រូវបើកលឺខ្លាំងៗនោះទេ នោះវានឹងបញ្ជូលទៅឱ្យខួរក្បាលដើម្បីដាស់ខួរក្បាលឱ្យក្រោក នោះកូននឹងអាចក្រោកឡើងដូចគ្នា។
ប៉ះគ្រែកូន
អ្នកអាចចូលក្នុងបន្ទប់កូនដោយដើរថ្មមៗ បន្ទាប់មកយកដៃអ្នកប៉ះគ្រែរបស់កូន ឬអង្គុយនៅលើគ្រែរបស់កូន ដើម្បីឱ្យកូនដឹងថាគេដល់ម៉ោងក្រោកពីគេងហើយ បន្ទាប់មកអ្នកអាចហៅឈ្មោះរបស់កូនដោយប្រើសម្លេងថ្មមៗបាន។
ប្រើរបៀបតែមួយ
នៅពេលដែលអ្នករកឃើញវិធីដែលងាយស្រួលដាស់កូនឱ្យក្រោកពីគេង អ្នកត្រូវតែប្រើវិធីនោះឱ្យជាប់ ព្រោះវាអាចធ្វើឱ្យកូនក្រោកពីគេងយ៉ាងងាយដោយមិនចាំចាប់នឿយហត់ដើម្បីដាស់គេឡើយ៕