បើតាមអត្ថបទមួយដែលចុះផ្សាយនៅក្នុង HealthDay News កាលពីថ្ងៃ២៣ ខែវិច្ឆិកា ឆ្នាំ២០១៥នេះ ការបំបៅដោះកូនអាចជួយកុំឱ្យមាតាមានហានិភ័យកើតជំងឺទឹកនោមផ្អែមបាន។
ក្រុមអ្នកស្រាវជ្រាវរបស់ Kaiser Permanente Northern California បានធ្វើការតាមដាននារីជាង៩០០នាក់ដែលកើតជំងឺទឹកនោមផ្អែមនៅពេលមានគភ៌ អស់ពេល២ឆ្នាំបន្ទាប់ពីពួកគេបានសម្រាលកូនរួច។ គេបានសង្កេតឃើញថា នារីៗដែលបំបៅកូនតែនឹងទឹកដោះខ្លួនឯងសុទ្ធ មានហានិភ័យកើតជំងឺទឹកនោមផ្អែមប្រភេទ២ចំនួន៥៤%តិចជាងនារីៗដែលឱ្យកូនបៅទឹកដោះគោ។ ហើយនារីៗដែលបំបៅដោះកូនយូរជាង១០ខែ មានហានិភ័យកើតជំងឺទឹកនោមផ្អែមប្រភេទ២ចំនួន៥៧%តិចជាងនារីៗដែលបំបៅកូនតិចជាង២ខែ។
លោកស្រី Erica Gunderson អ្នកដឹកនាំការសិក្សា បានពន្យល់ថា “ការបំបៅដោះកូនប្រៀបបានទៅនឹងការទុកឱ្យរាងកាយសម្រាក ព្រោះជាតិស្ករនិងខ្លាញ់ជាច្រើនត្រូវប្រមូលយកមកផលិតទឹកដោះ រាងកាយមិនពិបាកខំប្រឹងផលិតអាំងស៊ុយលីនទៀតទេ”។ ម្យ៉ាងទៀត “ការបំបៅដោះកូនហាក់ដូចជាធ្វើឱ្យមានការរៀបចំមេតាបូលីសឡើងវិញសារជាថ្មី ដែលក្នុងមួយរយៈកាលមានគភ៌ មេតាបូលីសបានត្រូវធ្វើឱ្យច្របូកច្របល់អស់” នេះបើតាមវេជ្ជបណ្ឌិត Dr. Alison Stuebe សាស្ត្រាចារ្យជំនួយផ្នែកវេជ្ជសាស្ត្រមាតានិងទារកនៃសាកលវិទ្យាល័យ University of North Carolina School of Medicine នៅ Chapel Hill ។ ក្រៅពីនេះ នៅមានយន្តការជីវសាស្ត្រនិងកត្តាសុខភាពនិងឥរិយាបទរស់នៅជាច្រើនទៀត ដែលចូលរួមនៅក្នុងរឿងនេះដែរ។
លោកស្រី Gunderson បានបញ្ជាក់បន្ថែមទៀតថា ការបំបៅដោះកូនមិនធ្វើឱ្យស្រកទម្ងន់នោះទេ ហើយគេគួរតែពិចារណាលើកទឹកចិត្តឱ្យនារីៗដែលមានហានិភ័យកើតជំងឺទឹកនោមផ្អែម ដូចជានារី ធាត់ៗជាដើម ឱ្យបំបៅកូនដោយទឹកដោះបែបនេះ៕
